Адæймагады уæвынадæй фæстæмæ алы дугты дæр кафтæн уыд йæхи сæрмагонд нысаниуæг. Æрыгон чызг уæлдай рæсугъддæр æмæ кадджындæрыл нымад цыд кафынмæ арæхстдзинадæй.
Фæстæдæр фæзындысты спорт, акробатикæ æмæ кафт чи баиу кодта, ахæм аивады хуызтæ. Уыдонæй сæ иу у аивадон гимнастикæ. Аивадон гимнастикæ йæ миниуджытæм гæсгæ нымад у спорты æппæты зындæр хуызтæй сæ иуыл. Йæ сæйрагдæр домæнтæ сты музыкæйы зæлтæ æмæ алыгъуызон спортивон элементтимæ кафт æмæ акробатикон змæлдтытæ аив æххæст кæнын, уæнгты тасынад, музыкалон цæттæдзинад, спортивон арæхстдзинад.
Ныртæккæ Уæрæсейы æппæты зындгонддæр аивадон гимнасткæйыл нымад у Алинæ Кабаева. Сæйраджыдæр Алинæйы хъæппæрисæй абон нæ республикæйы уæвынад кæны спортивон комплекс Олимп, кæцы арæзт æрцыд, Хуссар Ирыстоны рæзгæ фæлтæр, хæстон зын уавæртæм нæ кæсгæйæ, аивадон гимнастикæйæ цы арæхстдзинад равдыстой, уый Алинæ йæ зæрдæмæ арф кæй айста, уый тыххæй. Ацы цауæн ис йæхи истори, йæ райдайæн баст у хуссарирыстойнаг чызг, ныртæкккæ дзæнæттаг Гæбæраты Людæимæ. Людæ райгуырд 1960 азы апрелы мæйы, Цхинвалы. Скъолайы кары куы бацыд, уæд æй йæ ныййарджытæ бакодтой 5-æм астæуккаг скъоламæ. Уæд Людæйы чи зыдта, уыдон куыд загътой, афтæмæй уый, саби уæвгæйæ, йе уæнгты тасындзинадæй æппæрста дисы. Уымæ гæсгæ уый бацыд спортивон гимнастикæйы секцимæ. Йе ’ввахс æмгар, йæ сабибонты æппынæдзух кæй фарсмæ уыд, йæ царды фæндæгтæ йын лæмбынæгæй чи зоны, уый, ныртæккæ аивадон гимнастикæйы федерацийы президент, тренер Цхуырбаты Земæйы ныхæстæм гæсгæ, ам Людæйæн цадæггай хæлын райдыдта йæ курдиат, уыд ын æнтыстытæ. «Людæ йæ тырнындзинады æмæ йæ куыстуарзондзинады руаджы равдыста стыр æнтыстытæ. Нæ тренер Гочиашвили Джейран банкъардта Людæйы курдиат æмæ йемæ куыста тынг бирæ рæстæг. Людæ дæр архайдта, тырныдта размæ æмæ йын уымæ гæсгæ бантыст бирæ. Радон ерысты хайад райсыны фæстæ Людæ хаст æрцыд споривон гимнастикæйæ Гуырдзыстоны æмбырдгонд командæйы скондмæ. Уым равдыста, куыд бæрзонд æмвæзадыл цæттæдзинад, афтæ йæ арæхстдзинад дæр æмæ ссис гимнастикæйæ спорты мастертæм кандидат», — радзырдта Цхуырбаты Земæ.
Хъыгагæн, Людæйæн, æвæццæгæн, æрдзæй лæвæрд нæ уыд спорты мастер суæвыны хъысмæт. Хистæр кълæсты ахуыр кæнгæйæ йæ, гимнастикæйы тренировкæты рæстæджы, фæсайдтой цæгтæ, рахауд бæрзондæй æмæ аскъуыдысты йæ къахы нуæрттæ. Уый уыд Людæйæн хъысмæтæвзарæн. Хъыгагæн, спорты мастеры ном райсынмæ йæ бæллиц ууыл аскъуыд. Фæлæ йæ курдиат æмæ спортмæ уарзондзинад Людæйæн бар нæ радтой, ууыл æрлæууынæн. Астæуккаг скъола каст фæуыны фæстæ бацыд Тбилисы Гуырдзыстоны паддзахадон физкультурон институтмæ спорты факультетмæ. Уым ахуыр кодта Земæ дæр æмæ та цардбæллон чызджытæ ам адарддæр кодтой сæ ахуыр. Институт Сырх дипломыл каст фæуыны фæстæ сæ дыууæ дæр æрыздæхтысты сæ райгуырæн Ирыстонмæ æмæ райдыдтой сæ райсгæ дæсныйæдты фæдыл кусын. Земæ куыста хореографæй, Людæ та гимнастикæйы тренерæй. Уыд сæм бирæ фæндтæ сæ райтынг кæнынæн, фæлæ сын сæ Гуырдзыстоны уæды къухдариуæгады æнæзакъонон архæйдтытæ сæ хъуыры фæбадын кодтой. «Уæды онг махæн кæд æппæт уавæртæ дæр нæ уыд, уæддæр нæ горæты спортскъолайы агъуысты цы спортивон инвентарь уыд, уый нын фадат лæвæрдта рæзгæ фæлтæримæ кусынæн. Хæстон архæйдтыты рæстæджы уыдон хъахъхъæд не ’рцыдысты æмæ ныпаплой сты. Нал нын уыд хуымæтæджы маттæ, обручтæ æмæ æндæр хъæугæ инвентарь. Æдзæллаг уавæрмæ æрхауд скъолайы агъуыст дæр. Æнæ авг рудзгуытæ, уазал хатæнтæ фадат нал лæвæрдтой сывæллæттимæ кусынæн æмæ цадæггай ныппырх сты гимнастикæйы, акробатикæйы æмæ æндæр спортивон къордтæ», — загъта Земæ.
Зынвадат азты æрбалæудæй Хуссар Ирыстоны цард бирæ фадгуыты алæууыд фæстæмæ, уыцы нымæцы спорты алы хуызты дæр. Спортскъолайы куысты уавæртæ кæй нал уыд, уымæ гæсгæ алчи дæр агуырдта царды фæрæзтæ, Людæ та баззад ацы пырх æмæ уазал къуымты, фæлæ нæ фæтыхст сæвзæргæ уавæрты дæр, нæ ныууагъта йæ куыст. Уыйхыгъд архайдта, цæмæй бынтондæр ма фесæфой спорты æмæ гимнастикæйы загъдгонд хуызтæ. Агуырдта, чи сæм цымыдис кодта, ахæм сабиты æмæ куыста семæ пецты фæздæгмæ, æнæ рухс æмæ æнæ уавæртæй. Уым цалдæр азы цы хъомылгæнинæгтимæ куыста, уыдонæй ныртæккæ ам кусынц Бестауты Маринæ, Саулохты Наталья, Зæгъойты Зæринæ, Зассеты Элинæ, Козаты Ланæ, Джиоты Медея æмæ Бестауты Зæринæ.
Людæ йæ удыл æнæауæрдгæйæ ар-хайдта йæ уарзон куысты æнтыстытæ равдисынмæ æмæ йын æнтысгæ дæр бакодта. «2008 азы хæсты фæстæ нæ республикæмæ цыд бирæ зындгонд адæм. Алинæ Кабаева дæр фæуазæг ис нæ горæтмæ æмæ федта пырх, дæрæн æмæ æрдæгмард горæты аивадон гимнастикæйæ сабитæ цы диссаджы номыртæ равдыстой, куыд хорз арæхстысты, уый. Кæй зæгъын æй хъæуы, уый æнхъæл нæ уыд æмæ нал баурæдта йæ цины цæстысыгтæ. Уæд загъта, ам æнæмæнг кæй хъуамæ сараза нырыккон домæнтæн дзуаппдæттæг спортивон комплекс», — радзырдта Земæ. Аивадон къорд, кæцы равдыста Ирыстоны тых, йæ цардбæллондзинад æмæ фидар ныфс фидæны хæр-зиуæгон цардмæ, уыд Гæбæраты Людæйы бацæттæгонд къорд. Ис фидарæй зæгъæн, Людæ кæй нæ бауагъта Хуссар Ирыстоны аивадон гимнастикæйы цырагъ ахуыссын. Ссыгъта йæ ног цæхæрæй æмæ йæ радта фидæны фæлтæртæм. Уыцы цæхæр дарддæр чи хæссы æмæ рæзгæ фæлтæры æнтыстыты бæрзæндтæм чи кæны, уыдонæй сæ сæйрагдæртæй иу у Цхуырбаты Земæ. Земæ æмæ Людæйы хъомылгæ-нинæгтæ, ныртæккæ Земæйы коллегæтæ, Людæйы ном æрымысынц арф æнкъарæнтимæ.
“Гимнастикæйы секцимæ бацæугæйæ, æз нæ хъуыды кодтон мæ фидæны ууыл кусын, фæлæ Людмилæ уыд ахæм тренер, кæцы нæ æртавта йæ уды хъармæй, систа нын йæ зæрдæйæ гимнастикæмæ уарзондзинады цæхæр æмæ нын æй бавæрдта нæ зæрдæты. Астæуккаг скъола каст фæуыны фæстæ сахуыр кодтон дохтыры дæсныйад, фæлæ фæстæмæ куы æрыздæхтæн Цхинвалмæ, уæд мæм йæхимæ фæдзырдта Людæ æмæ мæм бахатыд, цæмæй æз йæ бæсты бакуыстаин иу къуырийы. Æз уæд нæ зыдтон, Людæ кæй тох кæны уæззау низимæ æмæ хос кæнынмæ кæй цæуы. Фæлæ сразы дæн. Уæд, æвæццæгæн, ногæй райхæлд мæ уарзт гимнастикæмæ æмæ абоны онг дæр кусын ам«,- радзырдта Людмилæйы хъомылгæнинæгтæй сæ иу Джиоты Заринæ.
«Цыппараздзыд сабийæ æз бацыдтæн гимнастикæмæ. Уæд, кæй зæгъын æй хъæуы, не ’нкъардтон йæ ахадындзинад мæ фидæны царды. Ацы спорт мын бауарзын кодта Людæ, бавæрдта мын æй ме уонджы алы хайы дæр æмæ мæ бон нал ссис уымæй ахицæн кæнын. Абон дæр мæм афтæ кæсы, Людæ мах бафтыдта, нæ царды æнæмæнг чи хъуамæ уыдаид, фæлæ мах нæхæдæг кæй нæ уыдтам, ахæм фæндагыл. Тынг зын у ахæм хистæрты, ахæм ахуыргæнджыты фесафын», — загъта Козаты Элинæ.
Людæ куы базыдта, нæ горæты нырыккон домæнтыл спорткомплекс кæй сырæздзæнис, уый, уæд йæ цинæн кæрон нал уыд. Йе стыр бæллиц уыд, тагъддæр сырæза æмæ йæ ахуыргæнинæгтимæ сыгъдæг уавæрты бакуса, фæлæ… Цалдæр мæйы нæ фæцард Людæ йæ бæллицы сæххæстмæ. 2014 азы сентябры мæйы йæ не ’хсæнæй атыдта карз низ, мæлæты дзæмбытæй та никуыма ничи аирвæзт. Нал ис не ’хсæн Людæ, фæлæ йæ ном æнустæм баззад уæлæуыл. Ныр æхсæзæм аз нæ горæты спорткомплекс Олимпы йæ номыл уагъд цæуынц фестивалтæ аивадон æмæ эстетикон гимнастикæйæ. «Ахæм хуызы мах сæнусон кодтам Людæйы ном. Уый сарæзта тынг бирæ нæ фæсивæдæн, нæ адæмæн æмæ рох ма хъуамæ уа. Уадз, истори зонæд йæ хъайтарты», — загъта Цхуырбаты Земæ.
Хуыгаты Милена
Comments are closed, but trackbacks and pingbacks are open.