Нæ сæйраг хæс – æдасдзинад хъахъхъæнын

Уагъд æрцыдис коронавирусы инфекцийы ныхмæ архайды фæдыл оперативон штабы рабадт. Уагъта йæ   Президент Бибылты Анатоли.

Рабадты Фæлхасгæнджыты бартæ хъахъхъæныны æмæ адæймаджы фæрныгады къабазмæ хъусдарды фæдыл комитеты сæргълæууæг Коцты Маринæ радзырдта Республикæ Хуссар Ирыстоны территорийыл коронавирусæй инфекцийæ рынчындзинады уавæры тыххæй. Уый банысан кодта, зæгъгæ, фæстаг къуырийы уавæрæн саргъгæнæн ис куыд стабилон. «Инфекци парахат кæныны  коэффицент æмæ ма ноджы иу бæрæггæнæн – сæрибар сынтæджыты бæрц, сты иу æмвæзадыл», – загъта Коцты чызг. Уый ма рабадты хайадисджыты базонгæ кодта коронавирусон инфекци парахат кæныны статистикæимæ. Йæ ныхæстæм гæсгæ пандемийы рæстæджы рабæрæг ис фæрынчын уæвыны 2025 цауы, сæнæниз сты 1134 адæймаджы. Медицинон уагдæтты ис 82 рынчыны. Æдæппæт ауагъдæуыд 12023 тесты.

Республикæйы Æнæниздзинад хъахъхъæныны æмæ социалон рæзты министры хæстæ æххæстгæнæг Тотчиты Георги Президенты базонгæ кодта хосгæнæн препараттæй ифтонг кæныны фæдыл ситуациимæ. Уый куыд загъта, афтæмæй абоны бонмæ медицинон уагдæттæ ифтонг сты æппæт æнæмæнгхъæуæг препараттæй коронавирусон инфекцийæ рынчынтæн хос кæныны тыххæй.

Президент бахатыд, цæмæй улæфт бонты æмæ бæрæгбонты медицинон уагдæттæ цæуой ифтонг хосгæнæн препараттæй. «Разæй сты ногазон бирæ улæфтбонтæ. Ацы рæстæгмæ хъæуы медикаменттæ æмæ туаггуыры бæрæг фæсауæрцтæ саразын», – банысан кодта Президент.

Рабадты хайадисджытæ æруынаффæ кодтой РХИ-йы территорийыл коронавирусон инфекци парахат кæныны тасдзинæдтæ фæкъаддæр кæныны фæдыл. Райст æрцыд уы-наффæ карантины уавæртæ фæлæмæгъдæр кæныны тыххæй. Штабы рабадты ног суагъæмæ гæсгæ, бар лæвæрд æрцыд культурон-дзыллон мадзæлттæ уадзынæн, афтæ ма æхсæнадон хæлцады объектты мадзæлттæ уадзынæн дæр. Уымæй дарддæр ма кусджыты куысты дистанцион режиммæ ракæныны тыххæй уынаффæ райсын лæвæрд цæуы, куыстытæ чи дæттынц, уыдонæн.

Оперативон штабы уынаффæмæ гæсгæ бар лæвæрд æрцыд, цæмæй кусой хъæууон чысыл-комплексон скъолатæ.

Уыимæ иумæ 15 январмæ дарддæр уыдзыс-ты ахæм фæкъуындæгдзинæдтæ:

«Сæ куыст урæд æрцæуæд:

– астæуккаг иумиагахуырадон скъолатæн, райдиан кълæстæ æмæ хъæууон чысылкомплектон скъолатæй дарддæр, кæдонæй алкæйы тыххæй дæр ахуыры процессы традицион формæ сног кæныны фæдыл уынаффæ исы Республикæ Хуссар Ирыстоны Ахуырад æмæ зонады министрад Хуссар Ирыстоны фæлхасадон хъусдарды комитетимæ æмразыйæ;

– астæуккаг профессионалон æмæ уæлдæр ахуыргæнæн уагдæттæн;

– сывæллæтты уæлæмхас ахуырады уагдæттæн, физикон культурæ æмæ спорты объекттæй дарддæр.

Скъолайы агъоммæ ахуырадон уагдæтты ахуырадон æмæ хъомыладон процесс сног кæныны тыххæй уынаффæ исы РХИ-йы Ахуырад æмæ зонады министрад Хуссар Ирыстоны фæлхасадон  хъусдарды комитетмæ æмразыйæ.

Бацамындæуыд, цæмæй къаддæр адæм цæуой:

– бæрæгбонон дзыллон мадзæлттæм;

– зиæнттæм æмæ мысæн мадзæлттæм;

– куыстдæтджытæн лæвæрд æрцæуæд ахæм бар, цæмæй тасдзинады къордмæ чи хауынц (æнхъæлцау сылгоймæгтæ, хроникон низтæй рынчын адæймæгтæ), (сæкæрниз, бронхиалон астмæ, уыргты хроникон низтæ, онкологион низтæ, инфаркт, инсульт кæмæн уыд æмæ æндæр ахæмтæ), уыцы кусджытæ раконд æрцæуой куысты дистанцион режиммæ æмæ бахъахъхъæд æрцæуа сæ куыстмызд.

Базарады, æхсæнадон хæлцады объекттæ, сывæллæтты хиирхæфсæн центртæ, физикон культурæ æмæ спорты объекттæ сæ архайд æххæст кæнæд коронавирусон инфекци парахат кæныны тасдзинады уавæрты куыст организаци кæныны фæдыл рекомендацитæм гæсгæ (дезинфекцион æмæ маскæйон режимтæ фæтыхджындæр кæнын, социалон дистанци);

Республикæ Хуссар Ирыстоны территорийыл уæвæг адæймæгтæ, уыдон нымæцы 10 азы карæй уæлæмæ сывæллæттæ æххæст кæнæт маскæйон режим объектты, организациты, исады формæ цахæм у, уымæ нæ кæсгæйæ, афтæ ма адæм дзыллон æгъдауæй кæм æмбырд кæнынц, уыцы бынæтты, æхсæнадон транспорты, такситы;

Коронавирусон инфекцийæ рынчынтæн контакт кæимæ уыд, уыдон хъуамæ уой, кæм цæрынц, уым хæдизоляцийы, рынчынимæ йын фæстаг контакт кæд уыд, уымæй 14 календарон боны æмгъуыдмæ;

Фæтыхджындæр уæд æхсæнадон транспорты, такситы, афтæ ма адæм дзыллон æгъдауæй кæм æмбырд кæнынц, ахæм æндæр бынæтты дезинфекцийы режим;

Фæлхасгæнджыты бартæ хъахъхъæныны къабазы хъусдарды фæдыл комитет æмæ горæт Цхинвалы администраци æркæсæд Исахъы уынджы  ногазон армукъа ауадзыны фадатмæ, эпидемийы ныхмæ мадзæлттæ хъахъхъæнгæйæ (социалон дистанци, маскæйон æмæ дезинфекцион режимтæ).

Бестауты Валя