Нафийы цытæн

Ацы бонты Дзауы районы библиотекæйы кусджытæ Харебаты Татьянæйы сæргълæудæй бацæттæ кодтой бæрæгбонон изæр адæмон фыссæг, поэт, публицист, профессор, йæ радтæг адæмы номдзыд фырт Джусойты Нафийы райгуырæн боны цытæн.

Мадзалмæ фæуазæг сты фысджытæ Хъодалаты Герсан, Наниты Асиат, ХИПУ-йы доцент Хуыгаты Илья, РХИ-йы Культурæйы министры хæдивæг Дзеранты Джульеттæ, ацы министрады библиотекæты куысты фæдыл сæйраг специалист  Дриаты Нателæ, тæхæг Остъаты Инал, Дзауы поселочы интеллигенцийы минæвæрттæ æмæ æндæртæ. Æрæмбырдуæвджытæ дзырдтой фыссæджы цард æмæ сфæлдыстады тыххæй.

Бæрæгбонон мадзал бацæуæн ныхасæй байгом кодта Дзауы районы администрацийы Культурæйы хайады хистæр Цхуырбаты Галинæ. Уый бузныджы ныхæстæ зæгъыны фæстæ, мадзалмæ æрбацæуджыты базонгæ кодта кæрæдзиимæ. Уый фæстæ ныхасы бар радта мадзаламонæг, Дзауы скъола-интернаты директор, ирон æвзаг æмæ литературæйы ахуыргæнæг Галуанты Зæлинæйæн. Уый лæмбынæг æрдзырдта Джусойты Нафийы цардвæндаг æмæ сфæлдыстады фæдыл, уыцы нымæцы ахуыргонды чиныг «Фыдæлты туг»-ы тыххæй дæр.

Нафийы тыххæй мадзалы раныхас кодта журнал «Фидиуæг»-ы сæйраг редактор, поэт Хъодалаты Герсан: «Нафи мæ афтæ рæвдыдта, раст цыма йæ кæстæр æфсымæр уыдтæн. Æниу мæ йæ кæстæр æфсымæрæй къаддæр нæ уарзта. Æгæрыстæмæй-иу мын бакодта материалон лæггад дæр, сидзæр кæй уыдтæн, уымæ гæсгæ. Тынг хæларæй цæрын Нафиимæ», – дзырдта Хъодалаты Герсан.

Нафийы тыххæй сæ хъуыдытæ загътой фыссæг Наниты Асиат, æмæ ХИПУ-йы доцент Хуыгаты Илья.

Бæрæгбонон мадзал сæ аивадæй барæсугъд кодтой Дзауы районы Культурæйы хайады хор Дзадтитаты Анисимы сæргълæудæй, Хуыцъейы хъæуы культурæйы хæдзары аивадон къорд «Нартæ», зарæггæнæг Къæбысты Маир æмæ æндæртæ. Банысан кæнын хъæуы уый дæр, æмæ мадзалы кæй азарыдысты, сæрмагондæй, Джусойты Нафийыл фыст æртæ зарæджы. Поэты цытæн зарæг ныффыста Дзадтиаты Анисим æмæ йæ азарыд Культурæйы хайады хор йæ къухдариуæгадæй. Дыккаг зарæг та йыл ныффыста Хуыцъейы хъæуы культурæйы хæдзары аивадон къорд «Нартæ»-йы аивадон къухдариуæгæнæг Хуыгаты Гена. Нафийы фыст æмдзæвгæйыл музыкæ ныффыста зарæггæнæг Къæбысты Маир æмæ йæ сæххæст кодта йæхæдæг. Изæры сывæллæттæ бакастысты Нафийы фыст æмдзæвгæтæ, сæххæст кодтой цалдæр кафты.

Къуыдаргомæй минæвар Хуыгаты Илья банысан кодта: «Ацы комæй Нафийæ дарддæр рацыд бирæ зындгонд адæймæгтæ. Уыдонæй сæ иу у тæхæг Остъаты Инал. Уый бирæ балæггад кодта йæ радтæг ирон адæмæн хæстон рæстæджыты». Хуыгаты Илья Остъаты Иналыл ныффыста æмдзæвгæ,  æмдзæвгæмæ Хуыгаты Гена та ныффыста музыкæ. Бæрæгбонон мадзалы ацы зарæджы сæххæст кодтой вокалон къорд «Нартæ»-йы уæнгтæ. Афтæ йын кæй скад кодтой, уый фæдыл сын бузныджы ныхæстæ загъта Остъаты Инал йæхæдæг дæр.

Джусойты Нафийы райгуырæн боны цытæн бæрæгбонон мадзалы организатортæн арфæйы ныхæстæ загътой Культурæйы министры хæдивæг Дзеранты Джульеттæ æмæ Дриаты Нателæ, ахæм диссаджы мадзал кæй бацæттæ кодтой, уый тыххæй. Уыцы бон æцæг бæрæгбон кæй уыд Дзауы районы, ууыл дзурæг сты æрæмбырдуæвджыты арфæйы ныхæстæ.

Банысан кæнын хъæуы уый дæр, æмæ Дзауы районы библиотекæйы кусджытæ ацы мадзал кæй ауагътой РХИ-йы Культурæйы министрад нæ республикæйы библиотекæты ‘хсæн цы конкурс расидт, уый фæлгæтты. Дзауы районы Культурæйы хайады хистæр Цхуырбаты Галинæ куыд загъта, уымæ гæсгæ ма уый размæ та конкурсы фæлгæтты Хетæгкаты Къостайы цард æмæ сфæлдыстады фæдыл мадзал кæй ауагътой  Къуайсайы библиотекæйы кусджытæ Багаты Асиаты сæргълæудæй. Йæ хайадисджытæ æмæ уазджыты ныхæстæм гæсгæ ацы мадзал дæр уыд цымыдисон.

Зæгъын ма хъæуы уый дæр, æмæ йæ райгуырæн боны цытæн мадзалы тыххæй куы базыдта Джусойты Нафи, уæд телефоны йæ организатортæ æмæ хайадисджытæн арфæйы æмæ стыр бузныджы ныхæстæ  загъта, кæй йæ нæ рох кæнынц, уый тыххæй. Æрæмбырдуæвджыты Нафийæн бафæндыд æнæниздзинад æмæ бирæ азты цæрæнбон æмæ банысан кодтой, зæгъгæ, Нафи у адæймаг-эпохæ, уый у колоритон фигурæ, кæцы йæ цард æгасæй дæр снывонд кодта ирон æвзагæн, зонадæн, йæ адæмæн. Уый у зынгæ æхсæнадон архайæг, ирон адæмы цæсгом, нæ фарн æмæ не ‘гъдау.

Джиоты Е.