Куыд хъусын кодтам, афтæмæй 4 августы Информаци æмæ мыхуыры паддзахадон комитеты пресс-центры пресс-конфернци уагъд æрцыд Мидхъуыддæгты министр Наниты Игорæн. Мадзалы хайад райстой Мидхъуыддæгты министры фыццаг хæдивæг, Криминалон милицийы хистæр, инæлар-майор  Уалыты Муртаз, наркотиктæ æнæ закъонæй уæй кæныны ныхмæ тохы фæдыл Мидхъуыддæгты министрады управленийы хистæр  Дзæхойты Алим, Æнахъомты ‘хсæн бархалынадтæ аиуварс кæныны фæдыл Мидхъуыддæгты министрады хайады хистæр Гатайты Лали.

Наниты Игорь дзыллон информацион фæрæзты минæвæрттæн радзырдта республикæйы  криминогенон уавæры, Мидхъуыддæгты министрады куысты тыххæй, афтæ дзуаппытæ радта журналистты фарстатæн.

Мадзалы райдиан Наниты Игорь банысан кодта, зæгъгæ, мидхъуыддæгты органты куыстмæ æхсæ-нады æрдыгæй лæмбынæг хъусдард ис, уымæн æмæ алы адæймаджы дæр фæнды, цæмæй йæхи хата æдасæй. «Нæ архайдæн саргъгæнæн ис, æхсæнад ныл цас æууæнды, уымæ гæсгæ», – бахахх кодта уый.

Мидхъуыддæгты министр куыд радзырдта, афтæмæй Мидхъуыддæгты министрады æппæт здæхтытæ дæр тынг ахсджиаг сты. «Нæ разы нын нæ Президент Бибылты Анатоли æрæвæрдта конкретон хæстæ. Уыдон сты организацигонд фыдракæндты, наркоманийы ных-мæ тох кæныны эффективондзинад фæбæрзонддæр кæнын. Паддзахады сæргълæууæг сæрмагонд хъусдард здахы, æппæт тыхон структурæты æнгом æмархайдмæ, афтæ ма милицийы фадыгон бæрнджынты профилактикон куысты эффективондзинад фæбæрзонддæр кæнынмæ. Абон махæн нæ сæйраг куыстытæ сты криминалон милицийы, фадыгон милиционерты, патрулон-постон службæйы æмæ паддзахадон автоинспекцийы кусджыты куысты эффективондзинад фæ-бæрзонддæр кæнын, техникон æгъдауæй æмæ сæ бæрзондквалификациджын кадртæй сифтонг кæнын».

Министр радзырдта, фæстаг рæстæджы республикæйы цы резонансон фыдракæндтæ æрцыд, уыдоны тыхæй дæр. Бæрæг кыд у, афтæ-мæй æрæджы республикæйы æрцыд цалдæр фыдракæнды  адæймаджы адавыны,  Цхинвалы цæрæг æмбæстаджы хæдзармæ бабырсын æмæ сæ зынаргъ дзаумæттæ æмæ æхцайы фæрæзтæ байсыны цаутæ. Уыцы цауты тыххæй æхсæнады ‘хсæн цæуы дам-думтæ, ома, уыцы фыдгæнджытæн ис барадхъахъхъæнæг органты æрдыгæй, чи сыл ауды, ахæм адæймæгтæ.

Ацы дам-думтæ аиуварс кæныны тыххæй Мидхъуыддæгты министрады сæргълæууæг банысан кодта, зæгъгæ, уыцы дам-думтæн æппындæр нæй бындур, уыцы криминалон къордæн армæвæрæг нæдæр тыхон структурæты æрдыгæй ис, æмæ нæдæр бæрнон бынæтты кусæг адæймæгты æрдыгæй. Йæ ныхæстæм гæсгæ, фыдгæнджытæй кæй æрцахстой, уый разыйы æвдисæндзырд  дæтты. Министр кæд æвдисæндзырды тыххæй уабæрæг ницы радзырдта, уæддæр банысан кодта, зæгъгæ, нырма раджы у фыд-гæнджыты нымæцы тыххæй дзурынæн, фæлæ развæлгъау бæрæггæнæнтæм гæсгæ, уыцы къорд у цыппар адæймаджы скондæй. Уыимæ иумæ ма загъта, зæгъгæ, оперативон-агурæн мадзæлтты фæстиуæгæн раргомгонд æрцыдысты ноджыдæр цалдæр фыдракæнды.

«Ныртæккæ куыст цæуы уыдон се ‘ппæты дæр æрцахсыны тыххæй», – банысан кодта министр.

Дарддæр Наниты Игорь куыд радзырдта, афтæмæй 2017 азы фыццаг æмбис Хуссар Ирыстоны Мидхъуыддæгты министрады регистраци æрцыд 26 давыны цауы. Уыдонæй раргом æрцыд 10 цауы. Иннæты фæдыл дæр куыст цæуы æмæ, министры ныхæстæм гæсгæ, цыбыр рæстæгмæ уыдон дæр æргом æрцæудзысты.

«Фыдракæндтæ чи сарæзта, уыдон раргом кæныны фæдыл оперативон-фæдагурæн мадзæлттæ ауадзыны фæстиуæгæн раргомгонд æрцыдысты, тыхæй байсыны æмæ адæймаджы адавды цаутæ. Ацы азы 23 июлы спецопераци ауадзыны фæстиуæгæн ахст æрцыд фыдракæндон къорды уæнг, кæцы уыд тыхæйбайсты тыххæй бабырстыты хайадисæг. Абоны бон уый дзуры, цы фыдракæндты иста хайад, уыдоны тыххæй», – радзырдта Наниты Игорь æмæ ма йæ ныхасмæ бафтыдта, зæгъгæ, развæлгъау бæрæггæнæнтæм гæсгæ, уыцы къорды ис 3-4 адæймаджы. Цалдæр азы дæргъы уыдон республикæйы æмбæстæгтæй давтой æмæ тыхæй истой сæ исад. Ацы аз республикæйы æрцыд æртæ тыхæй исыны цауы, уыдон се ‘ртæ дæр æргом æрцыдысты. Фаронимæ абаргæйæ, ацы азы фыццаг æмбис фыдракæндты нымæц 20 иуæджы фæкъаддæр», – банысан кодта министр.

Мидхъуыддæгты министрады къухдариуæггæнæг радзырдта ног структурæйы рæзты тыххæй дæр.

«Информацион-координацион центр у æхсæнадæмон барадхъахъхъæнæг структурæ. Йæ куыст здæхт у организацигонд фыдракæндты ныхмæ тох фæкарздæр кæнынмæ.  Йæ сырæзты тыххæй сразыдзинадыл сæ къухтæ æрфыстой Республикæ Хуссар Ирыстон æмæ Уæрæсейы Федерацийы Мидхъуыддæгты министрадтæ», – загъта Наниты Игорь.

Министры ныхæстæм гæсгæ, ацы центры бæстыхайы арæзтадæн рахицæнгонд æрцыд зæххы фадыг Цхинвалы, «Мæскуыйаг» микрорайоны.

«Информацион-координацион центры директоры ныхæстæм гæс-гæ, центр кусын райдайдзæн ацы азы кæрон. Хуссар Ирыстоны Мидхъуыддæгты министрадæй уым  кусдзысты 23 адæймаджы, Уæрæсейы Мидхъуыддæгты министрадæй та – 7», – банысан кодта Наниты Игорь.

Дарддæр журналистты цымыдис кодта мидхъуыддæгты органты оп-тимизацийы фарст дæр. Министр куыд радзырдта, афтæмæй ацы азы октябры мæймæ РХИ-йы Мид-хъуыддæгты министрады структурæйы кусджытæ фæкъаддæр уыдзысты 300 адæймаджы.  Йæ ныхæстæм гæсгæ, Мидхъуыддæгты министрады структурæйы оптимизаци развæлгъау нысан æрцыд Хуссар Ирыстон æмæ Уæрæсейы Федерацийы Мидхъуыддæгты ми-нистрадты ‘хсæн арæзтæрцæуæг сразыдзинады æмæ æххæст æрцæудзæн уыцы документы фæлгæтты.

Министр куыд банысан кодта, афтæмæй оптимизаци фыццаг рады хауы, пенсийы кары чи ис, уыцы кусджытæм, уый фæстæ та йæ бæрны хæстæм цæсгомджын ахаст чи нæ дары, уыдонмæ, афтæ ма, куы хъæуа, уæд мидхъуыддæгты министрады стуктурæты кусджытæн ауагъдæуыдзæн аттестаци дæр. Уый фæстиуæгæн ивындзинæдтæ уыдзæн штатон структурæйы.   Уыимæ иумæ министр радзырдта, министрады структурæты кусджытæй пенсийы кары чи ис, уыдон уæрæсейаг пенси куыд хъуамæ райсой, уый тыххæй дæр.

«Абон ахæм пенсиисджытæй бирæтæ исынц РХИ-йы мидхъуыддæгты органты мыздтæй бирæ фылдæр пенситæ», – банысан кодта Наниты Игорь.

Дзыллон информацийы минæвæртты цымыдис кодта, барадхъахъхъæнæг органты кусджытæй фæтк чи халы, уыдоны ныхмæ цы мадзæлттæ ист цæуы, уый фæдыл. Фарстатæ радтой   министрмæ 31 июлы, изæрæй, Паддзахадон автоинспекцийы кусæг нозтджынæй машинæ скъæргæйæ дыууæ чызджы куы ныццавта, уый фæдыл дæр.

Министры ныхæстæм гæсгæ, нозтджынæй машинæ скъæргæйæ чызджыты чи ныццавта, паддзахадон автоинспекцийы уыцы кусæг сæрибар æрцæудзæн йæ куыстæй.

«Уыцы хъуыддаджы фæдыл паддзахадон автоинспекцийы кусæджы тыххæй Сæрмагонд æдасдзинады управлени уадзы службæйон фæдысгарæн мадзæлттæ. Гæнæн ис, æмæ хъуыддаг лæвæрд æрцæуа прокуратурæмæ. Куыдфæндыйæ дæр Паддзахадон автоинспекцийы кусæг сæрибар æрцæудзæн йæ куыстæй», – загъта министр æмæ ма йæ ныхасмæ бафтыдта, зæгъгæ, хъыгагæн, барадхъахъхъæнæг ор-ганты кусджытæ нозтджынæй машинæ кæй скъæрынц, ахæм цаутæ стæм не сты.

«Закъоны раз алкæмæн дæр æмхуызон бартæ ис. Мидхъуыддæгты министрады кусæг закъон æмæ дисциплинæ куы хала, уæд хъуамæ æфхæрд баййафа закъонмæ гæсгæ.  Ахæм цаутæ уыд æмæ фæткхалæг кусджытæ сæ бынæттæй сæрибар æрцыдысты», – бамбарын кодта Нанийы фырт.

Ивгъуыд азы декабры мæйы рестораны ОМОН-ы кусæг хистæр кълæсты ахуырдзаутимæ кæй фæхыл, уыцы факты фæдыл министр банысан кодта, зæгъгæ, горæты прокуратурæ уголовон хъуыддаг сæхкæдта, хылгæнджытæ кæй бафидыдтой, уый фæстиуæгæн.

Йæ ныхæстæм гæсгæ, ацы факты тыххæй ауагъдæуыд мидæггагон службæйон фæдысгæрст дæр, кæцыйы фæстиуджытæм гæсгæ, ОМОН-ы кусæг æркондæуыд дисциплинæйон бæрндзинадмæ.

Журналистты цымыдис кодта республикæйы наркотикон буарадтæ парахат кæныны фарст дæр.

Йæ рады Наркотиктæ æнæ закъонæй уæй кæныны ныхмæ тохы фæдыл Мидхъуыддæгты управленийы хистæр  Дзæхойты Алим куыд радзырдта афтæмæй фæстаг азты Хуссар Ирыстоны территорийыл уæззау наркотикты, уыцы нымæцы, кондитерон мак  уæй кæныны иу цау дæр нысан не ‘рцыд.

«2015 азы нæ инициативæйæ райст æрцыд закъон, кæцымæ гæсгæ нæ республикæйы территорийыл уæй кæныны бар нæй наркотикон препарат «Лирика»-йæн. Ацы закъон куы райстæуыд, уый фæстæ æрцахстæуыд 16 адæймаджы æмæ сæ байстæуыд «Лирика»-йы препараты 2000 капсулайы», – банысан кодта управленийы хистæр. Уый ма радзырдта уыцы сферæйы закъондæттынад фæкарздæр кæныны фæдыл Президент Бибылты Ана-толийы хæслæвæрды тыххæй дæр.

Хъуыддаг уый мидæг ис, æмæ препарат «Лирика» уæй кæныны тыххæй «карз æфхæрдыл» нымад цæуы административон æфхæрд, уый та у 20 мин сомы ивар. Кæй зæгъын æй хъæуы, уыцы суммæ цæлхдур нæу, æнцонвадатæй схъæздыгмæ чи тырны æмæ искæй æнамонддзинадыл чи нæ хъуыды кæны, уыцы æмбæстæгтæн. Уый бæрæг у, уыцы æмбæстæгтæ цалдæргай хæттыты ивар кæй æрцыдысты, уымæй дæр.

Дзæхойты Алимы ныхæстæм гæсгæ, ацы аз бакондæуыд цыппар уголовон хъуыддаджы, марихуана наркотикон буарад кæм ис, уыцы гæнæй чи аразы, уыдоны ныхмæ.

Æнахъомты фыдракæндты тыххæй радзырдта æнахъомты ‘хсæн бархалынадтæ  аиуварс кæныны фæдыл мидхъуыддæгты министрады хайады хистæр Гатайты Лали. Уый куыд радзырдта, афтæмæй «абоны онг  æнахъомты фæдыл инспекцийы регистраци сты 15 æнахъомы. Уыцы æнахъомтимæ мах кæнæм профилактикон куыст. Æнахъомтæй дарддæр республикæйы ис социалон æгъдауæй фæстæзад (неблагополучный) ныййарджытæ дæр. Кæй зæгъын æй хъæуы, уыдонимæ дæр кусæм».

Фæсивæдон политикæ, спорт æмæ туризмы фæдыл комитет дæр хæсджын у, цæмæй профилактикон куыст кæна æнахъомтимæ (хистæркъласонтимæ, студенттимæ), фæлæ уыцы хъуыддаджы уый йæхи бæрнджын не ‘нкъары. Ныртæккæ республикæйы ис æрмæстдæр иу орган, кæцы кусы Æнахъомты ‘хсæн бархалынадтæ  аиуварс кæныны фæдыл мидхъуыддæгты министрады хайадимæ иумæ æмæ архайы, барадхалынæдтæ чи аразы, уыцы æнахъомтимæ.

Гатайты Лали куыд загъта, афтæмæй 2016 азы æнахъомты ныхмæ баконд æрцыд æртæ уголовон хъуыддаджы. Республикæйы реабилитацион центр æмæ æхгæд ахуыргæнæн уагдон кæй нæй, уый фæстиуæгæн æнахъом фыдгæнджытæ æмбæлон æфхæрд нæ цæуынц, растдæр зæгъгæйæ та йæ хатынц, æфхæрд кæй нæ баййафдзысты, уый æмæ дарддæр дæр фæлхатт кæнынц сæ фæтк-халæн митæ.

Гатайты чызджы ныхæстæм гæсгæ, сывæллон социалон æгъдауæй тæссаг уавæр-ты куы уа, уæд æй бакæнын хъæуы æмбæлон уагдонмæ, фæлæ уыцы бынат кæй нæй, уый тыххæй сывæллоны бакæнынц скъола-интернатмæ. Ныртæккæ æртæ сывæллоны ныййарджытæн ист æрцыдысты сæ ныййарæгон бартæ. Уыцы сывæллæттæ абон сты скъола-интернаты.

Мидхъуыддæгты министр радзырдта, хæцæнгæрзтæ байсыны тыххæй æхсæнадимæ цы куыст цæуы, уый фæдыл. Уый куыд банысан кодта, афтæмæй республикæйы цæрджытæй бирæтæм ис алыгъуызон хæцæнгæрзтæ. Вæййы хæцæнгæрзтæ байсыны цаутæ, фæлæ ма уыимæ иумæ æмбæстæгтæ сæхæдæг дæр барвæндонæй радтынц, цы хæцæнгарз сæм ис, уый. Афæдзы фыццаг æмбис æмбæстæгтæй ист æрцыд ахæм хæцæнгæрзтæ, куыд пистолеттæ,  автоматтæ, винтовкæтæ, гранаттæ,  нæмгуытæ æмæ а.д.

Наниты Игорь радзырдта, Мидхъуыддæгты министрады структурæтæм цахæм адæй-мæгты исынц, уый тыххæй дæр.

Йæ ныхæстæм гæсгæ, ис цалдæр критерийы, кæцытæм гæсгæ ист цæуы æмбæстаг. Кандидат хъуамæ рацæуа медицинон æмæ физиологон басгæрст, хъуамæ йæм æппынкъаддæр уа астæуккаг ахуырад, рацæуа æфсæддон службæ Хуссар Ирыстоны кæнæ Уæрæсейы Федерацийы æфсады рæнхъыты, йæхæдæг дæр æмæ йе ‘ввахс хæстæджытæй дæр макæмæн хъуамæ уа тæрхондонон æфхæрд.

Мидхъуыддæгты министр дзуаппытæ радта журналистты æндæр актуалон фарстатæн дæр.

Осиаты И.

Comments are closed, but trackbacks and pingbacks are open.