2008 азы онг нæ республикæйы æмæ ма уымæн æддейæ дæр психикон рынчынтæн хос кодтой, Цхинвалы Комаровы уынджы цы психиатрион рынчындон уыд, уым. 2008 азы августы  хæсты  рæстæджы рынчындоны бæстыхайыл комкоммæ сæмбæлд тыхджын рæмудзæн æрмæг «Град» æмæ ма бæстыхайæн аззадысты æрмæстдæр йæ пырхæнтæ. Хорз уыд, æмæ уыцы рæстæгмæ рынчындоны медперсонал рынчынты ракодтой æдас ранмæ, науæд уыдонæй иу дæр удæгас нал баззадаид.

Рынчындоны кусджытæ уæд равдыстой сæ аудгæ ахаст рынчынтæм. Фæстæдæр сæ бахъуыд Цæгат Ирыстонмæ акæнын. Уырдæм дæр сæ акодтой сæхæдæг æмæ сæ бабæстон кодтой. Фæлæ уый фæстæ уыдонæй иуæй-иутæ фæстæмæ æрыздæх-тысты æмæ сты нæ республикæйы.

Сусæггаг никæмæн у, ахæм рынчынтæ нæм цъус кæй нæй, уый. Уыдонмæ сæ хъысмæт   кæд тызмæг разынд, уæддæр мах хæсджын стæм, цæмæй сын  се ‘нæниздзинадыл аудæм, сæ царды уавæртæ сын фæхуыздæр кæнæм. Фæлæ ныр  фарст азы дæргъы нæ республикæйы кæд арæзтадон куыстытæ цæуынц бæрзонд темптæй, эксплуатацимæ лæвæрд æрцыдысты бирæ паддзахадон нысаниуæджы объекттæ, уæддæр, цæмæдæргæсгæ, психиатрион рынчындоны арæз-тады онг къухтæ нæма баххæссыдысты.

Ацы рынчынтæй иуæй-иутæ, æцæгæйдæр, сты æнæхъыгдаргæ, кæд сæ низыхатт сæ цæсгæмттыл ирдæй фæзыны, уæддæр уыдон ныхкъуырд æмæ æрхæндæгæй ахизынц адæймаджы иувæрсты æнæ исты бахъыгдаргæйæ. Иуæй-иутæн та сæ бакастæй дæр адæймаджы зæрдæ фæцæйскъуыйы, вæййынц æнæзæрдæмæдзæугæ дарæсы, æмæ сæ уагахастæй дæр æхсæнады фæтыхсын кæнынц. Ис ма се’хсæн ахæмтæ дæр, кæцытæ  æхсæнадæн сты тæссаг, сæ низы хатт куы фæтыхджындæр вæййы, уæд.

Æрæджы, 79 аздзыд сылгоймаг йæ сыхæгтæм æрдæгæхсæв фæдисхъæр кодта. Куыд рабæрæг ис, афтæмæй уымæ йе  ‘ввахс хион æвзонг лæппу лæбурдта. Медицинон бæлвырдгæнæнты фæстиуæгæн бæрæг æрцыд, лæппу кæй уыд психикон рынчын  æмæ йын хъуыд  хос скæнын. Уымæн уыд ахæм низыхатт, кæцыйæн иубакастæй нæй рабæрæггæнæн, фæлæ уый рæстæгæй-рæстæгмæ свæййы агресивон æмæ нал фæконтрол  кæны йæ уагахастыл.

Ивгъуыд аз Дзауы районы Эрцъойы хъæуы æрцыд æнамонд хабар; нæлгоймаджы хъæды ссардæуыд онггай. Мидхъуыддæгты министрады куыд сбæлвырд кодтой, афтæмæй, психикон рынчын йæ ныййарæг фыды фæрæтæй  ныкъуыхтæ кодта. Мидхъуыддæгты министрады кусджытæ ракодтой рынчын лæппуйы, сарæзтой йын æмбæлон документтæ æмæ йæ акодтой Цæгат Ирыстонмæ. Уым ын скодтой хосгæнæн курс æмæ ныртæккæ ис сæхимæ, Эрцъойы.  Нæ республикæйы ныртæккæ психиатрион рынчындон кæй нæй, уымæ гæсгæ  психикон рынчынты, фылдæр бахъæуы Цæгат Ирыстонмæ кæнæ республикæйæн æндæр рæттæм акæнын хос кæнынмæ æмæ та сæ  стæй фæстæмæ  æркæнынынц.

Хъыгагæн, уый фаг нæу, цæмæй рынчынæн кæронмæ хос æрцæуа, науæд йæ психикæ æмбæлон æмвæзадыл уа æмæ йын ма  уа агрессийы сытынгдзинад.

Ныртæккæ нæ республикæйы психикон рынчынтæн фыццаг медицинон æххуыс ба-кæнынц горæты цы психдиспансер уæвынад кæны, уым. Куыд загътой, афтæмæй сæм æрвылбон дæр вæййы бирæ пациенттæ æмæ сын саразынц капельницæтæ кæнæ та судзинтæ. Кæд диспансеры кусджытæн ис æппæт уавæртæ дæр, уæддæр сæ бынат у къуындæг æмæ сын нæй фадат, цæмæй рынчынтæн стационарон хос кæной æмæ сæ ма хъæуа Цæгат Ирыстонмæ æрвитын. Психикон рынчынтæ та горæты уынгты сæрибарæй тезгъо кæнынц, куыд «æнæхъыгдаргæ» рынчынтæ. Уыдоныл амбæлгæйæ, адæймаджы зæрдæйы сæвзæрынц куыд тасы æмæ  тæригъæды æнкъарæнтæ, афтæ ма, бар æнæбары нæхи афæрсæм: цæмæннæ ис ахæм рынчынтæм æмбæлон хъусдард, цæмæн сты ахæм уавæры?

2018-2019 азы Инвестпрограммæмæ  хаст у психиатрион рынчындоны арæзтад, фæлæ уал нырма уыдонмæ нæй фаг  хъусдард.

Уыцы психикон рынчынтæ сты нæ паддзахады æмбæстæгтæ, не ‘хсæнады иу хай æмæ сæ социалон уавæрмæ нæ кæсгæйæ, уыдонæн хъуамæ уа æппæтварсон æххуыс æмбæлон æмвæзадыл. Уый æрмæст уый тыххæй нæ æмæ æхсæнады æдасдзинад бахъахъхъæнæм. Уый у куыд нæхи, афтæ рынчынтæн сæхи хæрзæбонæн дæр. Афтæ, æмæ не скаст у ног психиатрион рынчындоны сырæзтмæ.

Хуыгаты М.

Comments are closed, but trackbacks and pingbacks are open.