Æрæджы Информаци æмæ мыхуыры паддзахадон комитеты пресс-центры презентаци уыд Козаты Людмилæйы чиныг «Воскресенья в Неаполе»-йæн.

Мадзалы хайад райстой италиаг делегацийы уæнгтæ: журналисттæ, эксперттæ, уыцы нымæцы журналист, политолог, Европæ æмæ æнæхъæн дунейы зындгонд  æхсæнадон æмæ политикон архайæг Джульетто Кьеза;  Италийы Республикæ Хуссар Ирыстоны официалон минæвар Мауро Мурджа, кæцы фæстаг азты йæхи снывонд кодта Европæйы, уыцы нымæцы Италийы дæр Хуссар Ирыстонимæ ахастыты популяризацийæн; Pandora TV-йы сæйраг редактор Маргарита Фурлан; Лука Пингиторе, кæцы Италийы архайы туризмы сферæйы. Хуссарирыстойнаг фарсæй мадзалы хайад райстой куыстуæттæ, организацитæ æмæ æхсæнады минæвæрттæ.

Мадзаламонæг, Информаци æмæ мыхуыры комитеты сæрдары хæдивæг Джуссойты Нелли æрæмбырдуæвджытæн раарфæ кодта бæрæгбонты цытæн. Уый фæстæ радзырдта Козаты Людмилæйы чиныг «Воскресенья в Непаполе»-йы тыххæй.

Мадзаламонæджы ныхæстæм гæсгæ, чиныг у цымыдисон, фыст у Италийы тыххæй. Кæд уырыссаг æвзагыл фыст у, уæддæр, гæнæн ис, æмæ тæлмац æрцæуа италиаг æвзагмæ дæр.

Джуссойты Нелли цыбыртæй радзырдта чиныджы авторы тыххæй. Уый куыд банысан кодта, афтæмæй Козаты Людмилæ литературон фа-дыджы нырма зындгонд нæу, «фæлæ ацы чиныг æвдисæн у авторы литературон курдиатæн. Чиныг нын баххуыс кодта  Италийы хæлæрттæ самал кæнынæн дæр».

Чиныджы тыххæй Нелли банысан кодта, зæгъгæ, «чиныг кæсгæйæ нæ æрфæнды Италийы фенын. Чиныджы æвдыст æрцыд, Италимæ, неаполитайнæгтæм авторы уарзондзинад. Чиныг бакæсгæйæ афтæ кæсы, цыма нæм италиæгтæ феввахсдæр сты æмæ сæ хуыздæр æмбарæм».

Чиныджы автор Козаты Людмилæ италиаг æвзагыл бакаст, ассоциаци ЧИМ-ы  артдиректор Франческо Макачини йæм Италийæ цы арфæйы фыстæг æрæрвыста, уый, цыран банысан кодта, зæгъгæ, чиныджы бирæ  зындгонд адæймæгтæ кæй ис, уый фæстиуæгæн ын уыдзæн стыр æнтыст. Франческо Макачини дунейы алырæтты уадзы конкурстæ, æрхоны курдиатджын адæймæгты йæхимæ.

Козаты Людмилæ бузныджы ныхæстæ загъта, чиныджы рауагъды хайад чи райста, чи йын баххуыс кодта, уыдонæн, сæйраджыдæр Информаци æмæ мыхуыры паддзахадон комитетæн.

Уый куыд банысан кодта, афтæмæй чиныг фысгæйæ, нæ хъуыды кодта коммерцион хъуыддагыл. Уый хъуыды кодта æрмæстдæр Италимæ йæ уарзондзинад фенын кæныныл.

Уый фæстæ раныхас кодта чиныджы редактор Коцты Инга.

«Чиныг куы редакци кодтон, уæд йæ арæзт, йæ структурæ мæ зæрдæмæ тынг фæцыд. Чиныджы алы сæр дæр у хъайтары иу къуырийы цард Италийы. Дзырд дзы цæуы вазыгджын цаутыл, кæцытыл хъайтар ахуыр нæу. Сæр фæвæййы хуыцаубоныл, ацы бон баххуыс кæны хъайтарæн æрцæугæ цауты бамбарынæн æмæ цардмæ æндæргъуызон цæстæй бакæсынæн» — банысан кодта чиныджы редактор. Уый куыд загъта, афтæмæй æнæмæнгæй дæр цардмæ æндæргъуызон цæстæй бакæсын хъуыд, уымæн æмæ чиныджы хъайтар æрцыд æндæр бæстæйæ. Уый уыд хъайтары царды стыр ивындзинад æмæ йыл хъуыд æрцахуыр уæвын», — банысан кодта Коцты Инга.

Дарддæр раныхас кодта МИА «Южная Осетия»-йы сæргълæууæг Цхуырбаты Залинæ. Уый бузныг загъта чиныджы авторæн, чиныгкæсджы-тæн ахæм чиныг кæй балæвар кодта, уый тыххæй.

«Æз Людмилæйы рагæй зонын, фæлæ ацы чиныг бакæсгæйæ, Людæйы базыдтон хуыздæр, банкъардтон ын йæ дунеæмбарындзинад, йæ миддуне. Æрвылбонон царды  мах ферох вæййы, куыд рацардыстæм, цы банкъардтам, цæуыл нæ сахуыр кодта цард. Нæ рацæргæ бонæй кæнæ хъуамæ фæхъæздыгдæр кæнæм нæ миддуне, кæнæ та йæ ферох кæнæм. Ацы чиныджы мах уынæм адæймаджы, кæцы, йæ алфæмблаймæ нæ кæсгæйæ, æдзухдæр ис йæхиимæ иумæ. Йæ царды вазыгджындзинæдтæ куыд иуварс кæны, уый йын йæ миддуне кæны хъæздыгдæр, йæхицæй та йын аразы фидар гоймаг. Мæнæн тынг æхсызгон у, ацы чиныг рухс кæй федта, уый æмæ мах та италиаг хуыцаубонты призмæйæ нæхицæн байгом кодтам ног моменттæ», — банысан кодта Цхуырбаты Залинæ.

Хуссар Ирыстоны сæйраг санитарон дохтыр Коцты Маринæ куыд радзырдта, афтæмæй Людмилæйæн бантыст ацы чиныг ныффысгæйæ, йæ нысан сæххæст кæнын.  Мах, ацы чиныг чи бакаст, уыдон иууылдæр бауарзтам Италийы, йæ адæмы.

«Мæн уырны, Хуссар Ирыстоны цæрджыты 50-70 проценты кæй ацæудзысты æмæ фендзысты Италийы, базонгæ йын уыдзысты йæ диссаджы адæмимæ», — банысан кодта Коцты Маринæ æмæ бузныг загъта чиныджы авторæн хъайтартæн, италиаг уазджытæн æмæ æрæмбырдуæвджытæн се ‘ппæтæн дæр.

Чиныджы тыххæй сæ хъуыдытæ загътой æндæртæ дæр, уыдон банысан кодтой чиныджы ахсджиагдзинад, позитивондзинад, загътой ма, Хуссар Ирыстоны æндыгъд, хæстон уавæрты чи цард, уыдоны, чиныг бакæсгæйæ, кæй  бафæнд-дзæн Италиимæ базонгæ уæвын. Уыдон бузныг дзырдтой авторæн, чиныг зæрдæмæхъаргæ æвзагæй фыст кæй у, уый тыххæй.

Йæ рады Джульетто Кьеза дæр раарфæ кодта чиныджы авторæн, банысан кодта чиныг кæй нæма бакаст, фæлæ йæ кæй бакæсдзæн.

«Мах ам стæм, цæмæй Хуссар Ирыстоны хуыздæр базонæм, уый тыххæй, уымæн æмæ уæ историйæн ис дунеон нысаниуæг. Абон æз федтон уæхи æвзагыл куыд дзурут. Куыд ныхас кæнут. Æз æй бамбæрстон уе ‘взаг, уæ адæм кæй уæвынад кæнынц. Уый тынг ахсджиаг у. Ацы хъуыддаг Ныгуылæны бирæтæ не ‘мбарынц. Уыдон цæрынц америкæйаг закъæттæм гæсгæ, уыдон амындмæ гæсгæ æмæ не ‘мбарынц, уымæй миддуне кæй нæ хъæздыг кæны, уымæй адæмтæ кæй нæ иу кæнынц. Мах æрцыдыстæм, цæмæй уæ базонæм. Цымыдисон нын уыд ахæм авторимæ базонгæ уæвын, кæцы фыссы Италийы тыххæй. Æвæццæгæн, чиныджы Итали æвдыст у, куыд хорз бæстæ, амондджын бæстæ. Æз, куыд италиаг адæймаг, афтæ зæгъдзынæн, уый раст у. Италийы адæм амондджын сты, рæсугъд æрдз сын кæй ис, уый тыххæй дæр, кæд æй æрвылминуты халæм алыгъуызонæй, уæддæр», — загъта йæ ныхасы кæрон Джульетто Кьеза  æмæ банысан кодта, ацы чиныджы рауагъд сын стыр лæварау кæй у, уый.

Мадзалы раныхас кодтой иннæ уазджытæ дæр.

Осиаты Индирæ

Comments are closed, but trackbacks and pingbacks are open.