РХИ-йы Æнæниздзинад хъахъхъæнын æмæ социалон рæзты министр Тотчиты Георгий йӕ дӕлбар кусджытӕн ауагъта пресс-конференци, цыран хатдзӕгтӕ сарӕзой азы дӕргъы бакӕнгӕ куысты тыххӕй. Мадзалы хайад райстой куыд горӕты, афтӕ ма районты медицинон уагдӕты сӕргълӕуджытӕ дӕр. Дохтыртӕ ӕрдзырдтой сӕ куысты фӕдыл ӕмбӕлгӕ проблемӕтыл ӕмӕ ма сын азы дӕргъы цы ӕнтыстытӕ уыдис, уыдоныл.
Тотчиты Георгий йӕ раныхасы банысан кодта, Республикон бирæпрофилон медицинон центр саразыны хъуыддаг раст къахдзӕф кӕй уыдис. «Раздӕр-иу рынчын медицинон уагдонмӕ куы ӕрбацыдис, уӕд-иу ӕй фылдӕр хатт арвыстой ӕндӕр ранмӕ, цӕмӕй райстаид ӕмбӕлон медицинон ӕххуыс, уымӕн ӕмӕ медицинон уагдӕтты бӕстыхӕйттӕ уыдысты горӕты къуымты. Ныр та иууылдӕр сты иу ран ӕмӕ пациенты нал фӕхъӕуы дард цӕуын. Ныридӕгӕн ног бӕстыхӕйттӕ ифтонг цӕуынц, нырыккон домæнтæн дзуапп чи дӕтты, ахӕм ӕнӕмӕнхъӕуӕг медицинон дзаумӕттӕй, ӕмӕ цыбыр рӕстӕгмӕ не мбӕстӕгтӕ ноджы хуыздӕр банкъардзысты медицинон лӕггӕдты гъӕд», – загъта Тотчиты Георгий.
Дыууӕ азы размӕз зымӕджы нӕ республикӕйы электрон рухс кӕй нӕ уыд цалдӕр боны, уый фӕстиуӕгӕн рынчындоны уазалгӕнӕнты фесӕфтысты 800 мин сомы аргъ медицинон хостӕ. Ацы цауы фӕдыл Ӕнӕниздзинады министрады къухдариуӕгад сарӕзта хатдзӕгтӕ ӕмӕ ныр ифтонг сты цалдӕр электоргенераторӕй.
Ӕнӕниздзинад хъахъхъæныны министр ма ӕнӕмӕнгхъӕуӕгыл банымадта вакцинаци дӕр. Куыд банысан кодта, афтӕмӕй ацы метод у иууыл эффективондӕр ӕмӕ адӕмы разӕнгард кӕнын хъӕуы, цӕмӕй рацӕуой вакцинаци. Медицинон уагдӕтты кусджытӕн сӕ 60 проценты йеддӕмӕ кӕй нӕ рацыдысты ацы процедурӕ, уый фӕдыл Тотчиты Георгий равдыста йе нӕразыдзинад, ӕмӕ бахӕс кодта, цӕмӕй цыбыр ӕмгъуыдмӕ ацы проблемӕ иуварс ӕрцӕуа.
Ӕмбырды ма районты медицинон уагдӕтты къухдариуӕггӕнджытӕ ӕрдзырдтой сӕ разылӕууӕг проблемӕтыл ӕмӕ ӕмӕ радтой фарстатӕ Ӕнӕниздзинад хъахъхъæныны министрмӕ. Бирӕ районты медицинон уагдӕттӕ цухдзинад ӕййафынц ӕмбӕлон кадртӕй, медицинон препараттӕй, автотранспортӕй. Тотчиты Георгий ныфс бавӕрдта, ӕввахс рӕстӕджытӕ ситуаци кӕй фӕхуыздӕр уыдзӕнис.
ДЖИОТЫ Александр
Comments are closed, but trackbacks and pingbacks are open.