Ног ахуыры азыл æмбæлгæйæ

НОГ АХУЫРЫ АЗМÆ – НОГ АХУЫРГÆНÆН ЧИНГУЫТÆ

1-æм сентябры та нæ республикæйы æппæт скъолатæй райхъуысдзæн сывæллæтты хъæлдзæг хъæлæба. Скъолаты сæрдыгон улæфтыты рæстæджы скъолаты къухдариуæггæнджытæ æмæ ахуыргæнджытæ, иу чысыл баулæфыны фæстæ, сæ дæлбар ахуырадон уагдæтты 1-æм сентябрмæ – Зонындзинæдты бонмæ фæцæттæ кæнынц. Афтæ та уыд ацы аз дæр. Нæ горæты скъолаты цыдысты цалцæггæнæн куыстытæ. Нæ горæты 6-æм астуæккаг скъоламæ бахизгæйæ, адæймаг æнæ рахатгæ нæ фæуыдзæн ацы ахуырадон уагдоны дæр ахуыргæнджытæ кæй батыхстысты ног ахуыры азмæ сæ кълæстæ æмбæлон уагмæ æркæныныл. Куыд къæлидорты, афтæ кълæсты къултæ дæр сæрст æрцыдысты хуызджын ахорæнтæй. Ацы скъолайы ногдæр бæстыхайы фыццаг уæладзыджы бахизæны цы кълас уыд, уымæй арæзт æрцыд пысулауындзæн хатæн. Уымæй скъоладзауты уавæр бæрæг фæхуыздæр уыдзæн. Кæд раздæр ахуыргæнинæгтæ уазал рæстæджыты сæ зымæгон дзаумæттæ кълæсты ластой, уæд сын ныр та рахицæн æрцыд сæрмагонд бынат.

РХИ-йы Ахуырады æмæ зонады министрады кусджытæ ног ахуыры азмæ ног ахуыргæнæн чингуытæй сифтонг кодтой нæ республикæйы скъолаты. Дыууæ къуырийы размæ Цхинвалмæ æрластæуыд 20 мин ахуыргæнæн чиныгæй фылдæр нæ республикæйы астæуккаг скъолаты хистæр кълæсты  ахуыргæнинæгтæн. Уыдон равдæлон кодтой нæ горæты 6-æм астæуккаг скъолайы æмæ сæ уырдыгæй адих кодтой республикæйы скъолатыл.

Банысан кæнын хъæуы рауагъдадон-чингуытæуæйгæнæн компани арæнгонд бæрндзинадимæ æхсæнад  «СЭМ»-ы оперативон куысты тыххæй. Уыдон ныр дыккаг аз кусынц Хуссар Ирыстонимæ. Закъазмæ гæсгæ, нæ республикæйы алы районæн дæр чингуыты партитæ тыхт æрцыдысты хицæнæй. Уымæй уæлдай ма алы ахуырадон уагдонæн дæр балæвар кодтой Антуан Де Сент-Экзюперийы чиныг «Чысыл принц». Ацы чиныг французаг æвзагæй ирон æвзагмæ тæлмацгонд æрцыд ацы рауагъдадон-чингуытæуæйгæнæн компанийы хардзæй, куыд сæрмагонд проект, афтæ. Ратæлмац æй кодтой Хъамболаты Тамерлан æмæ Астемыраты Изетæ. Чиныг ра-цыд чысыл тиражæй, фæлæ ма куы бахъæуа, уæд ын фæфылдæр кæндзысты йæ тираж.

Республикæ Хуссар Ирыстоны Ахуырад æмæ зонады фарстыты фæдыл Уæрæсейы Федерацийы Президенты администрацийы уынаффæгæнæг Темина Казаховайы ныхæстæм гæсгæ, республикæйы æппæт скъолаты ахуыргæнæн чингуытæй сифтонг кæнынæн фадат фæзынд Хуссар Ирыстон æмæ Уæрæсейы Хицауадты ‘хсæн æмгуыстады руаджы.

28-æм августы та Цхинвалмæ æрластой ахуыргæнæн чингуыты дыккаг парти. Уыдон дæр равдæлон кодтой нæ горæты 6-æм астæуккаг скъолайы. Ис дзы чингуытæ алы предметтæй дæр ирон æвзаг æмæ литературæйы йедтæмæ. Уыдон дæр дих æрцыдысты республикæйы скъолатыл. Ныр   ахуыргæнæн чингуытæй ифтонг сты нæ республикæйы районтæ дæр. Ахуыргæнæн чингуыты цухдзинад ма æййафынц Дзауы районы æмæ горæт Цхинвалы скъолатæ.

«Ахуыргæнæн чингуытæй ифтонг æрцыдысты Цхинвалы, Знауыры æмæ Ленингоры районты скъолатæ. Ацы районты ацы ахуыры азæн чингуытæ райстой 5-11 кълæсты  ахуырдзаутæ æмæ ивгъуыд аз та – 1-4 кълæсты скъоладзаутæ. Горæт Цхинвалы скъолаты  чингуытæ райстой 5-9 кълæсты ахуырдзаутæ. Финансон хъуагдзинад нын кæй уыд, уымæ гæсгæ чингуытæй ифтонг не ‘рцыдысты 10 æмæ 11-æм кълæсты ахуыр-гæнинæгтæ. Ахæм уавæр ис Дзауы районы дæр. Ацы районы дæр ивгъуыд аз ахуыргæнæн чингуытæй ифтонг æрцыдысты райдиан кълæсты ахуырдзаутæ. Цы чингуытæ ма нын нæ фаг кæнынц, уыдон та райсдзыстæм сентябры райдианты. Цы ахуыргæнæн чингуытæ райсæм, уыдоны иумиаг нымæц у 37 мины. Мах æппæт дæр сараздзыстæм, цæмæй иуварсгонд æрцæуой ацы цухдзинæдтæ. Ахæм хæс æрæвæрдта йæ разы нæ республикæйы Ахуырад æмæ зонады министрад», – банысан кодта РХИ-йы Ахуырад æмæ зонады министры хæ-дивæг Лолоты Аслан.

Цхинвалы 6-æм астæуккаг скъолайы библиотекæйы сæргълæууæг Цхуырбаты Беллæ  банысан кодта: «Республикæйы скъолаты чингуыты цухдзинад рагæй уыд, фæлæ ацы проб-лемæ сындæггай иуварс цæуы. Августы мæйы æмбисы райстам ахуыргæнæн чингуытæ. Уыдоныл бакуыстам æмæ сæ  ныр дæдтæм сывæллæттæн Зонындзинæдты бонмæ. Ныр дæр та 28-æм августы æрластой чингуыты ног парти. Уыдоныл дæр бакусдзыстæм æмæ сæ байуардзыстæм ахуыргæнинæгтыл».

Чингуытæ байуарыныл куыст цæуы иннæ скъолаты дæр. Ахуыргæнæн чингуытæ æнæаргъæй сывæллæттæн уæрст кæй цæуынц, уый стыр æххуыс у ныййарджытæн, уæлдайдæр та цыбыркъух чи сты, уыдонæн. Афтæ ма скъоладзаутæ  ног чингуытæй кæй ахуыр кæндзысты, уый дæр æхцондзинад хæсдзæн ахуырдзаутæн. Хорз уаид ахуыргæнинæгтæ сæхæдæг дæр куы аудиккой  ахуыргæнæн чингуытыл уæд-иу сæ иннæ ахуыры азы дæр пайда кæниккой.

Чертхъоты Жаннæ