Нæ республикæйы Инвестпрограммæйы фæлгæтты цы объекттæ арæзт цæуынц, уыдонæй иууыл ахсджиагдæртæй сæ иу у Хуссар Ирыстоны паддзахадон драмон театры арæзтад. Йæ фæудмæ йын æнæрхъæцæй æнхъæлмæ кæсы нæ республикæйы алы цæрæг дæр. Иуæй нæ горæты централон хайы рафидауын кæндзæн, иннæмæй та нæ театрдзаутæн сæххæст уыдзæн рагæй кæмæ бæллынц, уыцы бæллиц — фадат сын уыдзæн сæ уарзон Театралон фæзуатмæ, ногарæзт æмæ нырыккон ифтонггæрзтæ æмæ аппаратурæйæ ифтонг театрмæ æрбацæуынмæ.

Банысан кæнын хъæуы уый æмæ театры бæстыхайы эксплуатацимæ радтыны æмгъуыдтæ цалдæр хатты хаст кæй æрцыдысты. Ныр та аразджытæ ныфс бавæрдтой, ног азмæ кæй сцæттæ уыдзæн, æмæ йæ дуæрттæ кæй байгом кæндзæн нæ театрдзаутæн.

Мидæгæй дзы азилгæйæ, кусджыты архайдмæ кæсгæйæ, æцæгæйдæр адæймаджы ныфс бацæуы, ацы æмгъуыдмæ кæй сцæттæ уыдзæн, уымæй.

Ныртæккæ мидæгæй цæуынц ахорæн куыстытæ. Сæрдынц къултæ, агъуысты цар, кæнынц æндæр æмæ æндæр куыстытæ. Куыст активонæй цæуы сценæйы арæзтадыл дæр. Йæ арæзтадыл кусынц, сæрмагондæй Казанæй кæй æрхуыдтой, ахæм бригадæ. Уыдон хорз æмбарынц, актерæн сæйраг кæй у сценæ, уымæ гæсгæ архайынц, цæмæй арæзт æрцæуа сценæйы æппæт домæнтæм гæсгæ.

Куыст цæуы театры алыварс территори схæрзарæзт кæныныл дæр. Ам та куыстытæ æххæст кæнынц æндæр бригадæ Тедеты Игоры сæргълæудæй. Банысан кæнын хъæуы уый æмæ Тедейы фырт йæ куыст кæй æххæст кæны стыр фантазиимæ. Театры агъуысты территорийыл цы газонтæ арæзт цæуынц, уыдоны арæзт цæуы донпырхгæнæнтæ æмæ дзы цъæхдарæнтæ, алыгъуызон дидинджытæ сагъд куы æрцæуой, уыдонмæ нал хъæудзæнис ардæм сæрмагонд донпырхгæнæн машинæ æрбакæнын æмæ сæ уымæй бапырх кæнын, фæлæ газонтæм йæ хъус чи дара, уымæн йæ бон уыдзæн кран разилын æмæ донхæр цæудзысты сæхæдæг. Æвæрд цæуы бæстыхайы территорийыл тротуарон плиткæ дæр. Ацы куыстытæ чи æххæст кæны, уыдон сты 10 адæймаджы бæрц.

Куыст цæуы театры фæзуатæн уæлдай фидыц чи ратдзæ-нис, уыцы фонтаны арæзтадыл дæр. Ам цæуынц цæттæгæнæн куыстытæ. Кусынц ыл Казанæй æрхонгæ æндæр бригадæ 10 адæймаджы скондæй. Кусджытæй иутæ архайынц фантаны каркасы арæзтадыл, иннæ-тæ та цæттæ кæнынц, цы плит-кæтæй фæлыст æрцæудзæнис, уыдон лыг кæныныл æмæ сæ формæмæ æркæныныл.

Арæзтадон куыстыты фи-нанс кæнынимæ проблемæ нæй. Ифтонг сты арæзтадон æр-мæджытæй дæр.

Бестауты Валя

Comments are closed, but trackbacks and pingbacks are open.