Ног объекттæ — æнæниздзинад хъахъхъæныны фадыджы

Ацы аз арæзтадон куыстытæ райдыдтой азы фыццаг кварталы. Проектон-сметон документаци афоныл цæттæгонд кæй æрцыд, раздæры фæлтæрддзинад зондзонæн кæй фæцис арæзтадон фирмæтæн, уый тыххæй Уæрæсейы фарсæй нæй финансон хъуагдзинад æмæ куыстытæ дæр æххæст цæуынц нывæзтмæ гæсгæ.
Ис ахæм объекттæ, кæцытæ арæзт цæуынц дыууæ фæлтæрæй, ома, 2015 азæй 2016 азмæ чи хизы. Уыдон нымæцмæ хауы республикон-соматикон рынчындоны территорийыл сывæллæттæн цы бирæпрофилон реабилитацион рынчындон арæзт цæуы, уый дæр. Ивгъуыд аз ам райдыдтой арæзтадон куыстытæ. Объекты фæзуат у 6 800 кв. метры. Ацы арæзтад лæвæрд æрцыд подрядон организаци «Спецтепломассаж»-æн. Уыдон сты фæлтæрдджын организаци, сæйраджыдæр, кусынц ацы профилы.
Арæзтады сæйраг инженер Таймураз Кантеев куыд зæгъы, афтæмæй «Рынчындон арæзт цæуы гъæдджынæй, уымæн æмæ уым хос кæндзысты сывæллæттæн, уымæ гæсгæ канд техникон персонал нæ, фæлæ ма хуымæтæг кусæг дæр æмбары, сæрмагонд æрфарст кæй уыдзæн исты згъуыдтæ куы ауадзæм, уæд. Рынчындон куы сцæттæ уа, уæд ам бæрзондквалификациджын медицинон æххуыс райсын сæ бон уыдзæн уыцы иу рæстæджы 73 рынчынæн. Хатæнтæ уыдзысты иу, дыууæ æмæ æртæ бынатон палатæтæ. Операцигæнæндон æмæ дохтырты хатæнтæй дарддæр ма ам уыдзæн æндæр техникон хатæнтæ дæр. Уыдзæн ма дзы спортивон зал, бассейн æмæ сывæллæттæн хиирхæфсæн зал дæр», — зæгъы сæйраг инженер.
Ныртæккæ сывæллæтты рынчындоны бæстыхайы æххæст цæуынц инженерон куыстытæ, фæлыст цæуы агъуысты æддаг хуыз дæр. Мидæггагон куыстытæй — хъармгæнæн системæйæн йæ 80 % фæуд у, баззад ма дзы чысыл аиуварскæнинаг фарстытæ, фæуд кæнынц винтиляцион хызæгты монтажгæнæн куыстытæ дæр.
Бæстыхай арæх бæрæг кæнынц Арæзтад æмæ архитектурæйы министрады кусджытæ, Гостехнадзор æмæ капиталон арæзтады управлени. Арæзтад сæрмагонд цæсты бын ис Хицауады Сæрдарæн дæр. Хъуылымбегты Доменти канд Сывæллæтты рынчындоны арæзтадмæ нæ бацæуы бæрæггæнæг, уый инспекцион азылдтытæ саразы, республикæйы Инвест-программæйы фæлгæтты арæзт цы объекттæ цæуынц, æмткæй уыдоныл. Уый бабæрæг кæны, куыст цы æмвæзадыл ис, бацымыдис кæны æрмæджыты гъæдмæ, объекты кусджыты нымæцмæ, афоныл мызд исынц æви нæ, уыцы фарстатæм.
Зæгъын хъæуы уый, æмæ ахæм инспекцион азылдтытæн кæй вæййы хорз фæстиуæг. Ныр подрядон организацитæ хатынц: сæ куыст гъæдджынæй куынæ кæной, уæд сæ æфхæрæг кæй уыдзæнис.
«Спецтепломассаж»-ы сæйраг инженер Таймураз Кантаев нын загъта: «Бæстыхайы цы куыстытæ цæуы, уыдонæн нæм ис проектон-сметон документаци, график хæлд нæ цæуы. Нæ хъуыдымæ гæсгæ сæвæллæтты реабилитацион рынчындон лæвæрд æрцæудзæн эксплуатацимæ æмгъуыдæй раздæр. Растдæр зæгъгæйæ та — 2016 азы декабры мæймæ».
Хъыгагæн, нæ республикæйы бирæ ис, реабилитаци кæй хъæуы, ахæм рынчын сывæллæттæ. Уыдоны сæ ныййарджытæ хос кæнынмæ акæнынц, республикæйæн æддейæ цы реабилитацион центртæ ис, уырдæм. Уый та сын æрвылхатт æвзарын кæны зындзинæдтæ канд материалон æгъдауæй нæ, фæлæ ма моралонæй дæр. Уымæ гæсгæ æнæрхъæцæй æнхъæлмæ кæсынц, рынчындон арæзт кæд æрцæудзæнис, уымæ. Социалон райрæзт æмæ нын æнæниздзинады министрады куыд загътой, афтæмæй Сывæллæтты реабилитацион рынчындон ифтонг уыдзæн нырыккон медицинон ифтонггæрзтæй, хос дзы цæудзæн медицинæйы æппæт профилты дæр.
Уæ зæрдыл уын лæууын кæнæм, ацы аз Инвестицион программæйы фæлгæтты арæзт цы медицинон объекттæ цæуы, уыдоны æмрæнхъ Республикон соматикон рынчындоны территорийыл ноджы арæзт цæуынц: операцион-хирургон комплекс, гемодиализон центримæ иумæ. Уым дæр ныридæгæн райдыдтой цæттæгæнæн куыстытæ. Объектæн сæ аргъ у 600 милуан сомы. Уыдонæй 200 милуан сомæй хъуамæ пайда æрцæуа 2016 азы, иннæ æхцайы фæрæзтæ та ахиздзæн 2017 азмæ.
Нæ уахц.