Ногазон бæрæгбон Дменисы

Бирæ рæсугъд бæрæгбонтæ нысан кæнынц ирон адæм,  фæлæ тынгдæр фенхъæлмæ кæсынц Ног азы æрбалæудмæ. Æмæ уый æмбæрстгонд дæр у. Хистæртæ йæм фенхъæлмæ кæсынц, цæмæй сын æрхæсса ног хорздзинæдтæ, æнæниздзинад, уой кæстæрарæх. Чындздзон æмæ йæм усгур лæппутæ фенхъæлмæ кæсынц хорз амæндтæ ссарынмæ. Кæстæртæ та йæм фæбæллынц сæ рæстæг хъæлдзæгæй арвитынмæ, лæвæрттæ райсынмæ.

Ног аз, ахæм хъæлдзæг бæрæгбон кæй у, алкæмæндæр æхцондзинад кæй æрхæссы стырæй, чысылæй, уымæ гæсгæ йæ банысан кæнынц нæ республикæйы иумиагахуыргæнæн уагдæтты, культурон артдзæстыты.

Ногазон хъæлдзæг мадзал банысан кодтой Цхинвалы районы Дменисы хъæуы Культурæйы хæдзары дæр. Мадзал бацæттæ кодтой Дменисы культурæйы хæдзары директор Икъаты Ануси, сывæллæтты библиотекæйы сæргълæууæг Джиголаты Заремæ æмæ Культурæйы хæдзары кусæг Æлборты Мадинæ.

Культурæйы хæдзар уыд бæрæгбонвæлыст. Цы стыр назбæлас сфæлыстой, уый йæ рæсугъддзинадæй цæстæнгас йæхимæ æлвæста. Бæрæгбонмæ æрбацыдысты хъæубæсты цæрджытæй бирæтæ, сывæллæтты ныййарджытæ, скъолайы ахуыргæнинæгтæ æмæ ахуыргæнджытæ.

Мадзаламонджытæ Дзанайты Роксана æмæ Джиголаты Моникæ ногазон арфæтæ ракодтой мадзалмæ æрбацæуджытæн. Сæ цæст сын бауарзта æнтыстытæ сæ царды, æнæниздзинад, сæ рухс бæллицтæ иууылдæр куыд сæххæст уой. Уый фæстæ айхъуыстысты æхцон музыкæйы зæлтæ æмæ райдыдта ногазон бæрæгбон. Бæрæгбон та зард æмæ кафтæй фидауы æмæ доны хъазтау раленк кодтой ацы Культурæйы хæдзары хæдархайгæ къорд «Фидæн»-ы хайадисджытæ. Уыдон аив сæххæст кодтой нæртон кафт «Симд», афтæ «Хонгæ», «Рог кафт» æмæ æндæртæ.

Ногазимæ баст уыдысты, сывæллæттæ аив цы æмдзæвгæтæ бакастысты, цы зарджытæ азарыдысты, уыдон иууылдæр. Уæлдай банысан кæнын хъæуы Джиголаты Алинæ, Сидæмонты Валерия æмæ Викæйы, Мдзинарашвили Ликайы каст æмдзæвгæтæ.

Мадзалмæ фæуазæг сты Митын Дада æмæ Митын Чызг. Уыдон та уыдысты Дудайты Эрик æмæ Лолоты Илонæ. Ракодтой ногазон зæрдæбын арфæтæ канд мадзалмæ æрбацæуджытæн æмæ йæ хайадисджытæн нæ, фæлæ æгас хъæубæсты цæрджытæн дæр. Уыдон акафыдысты сабитимæ æмæ семæ хайад райстой чысыл инсценировкæты.

Ног азы Митын Дада æмæ Митын Чызг æнæ лæвæрттæй не ‘рбацæуынц æмæ мадзалы хайади-сæг сывæллæттæн бакодтой ногазон лæвæрттæ.

Мадзалы кæрон ногазон арфæтæ йæ цæст бауарзта Культурæйы хæдзары директор Икъаты Анусийæн дæр. Йæ ныхасы уый банысан кодта, цæмæй амондджын æмæ фæрнджынæй цæрой, канд йæ уарзон хъæубæстæ нæ, фæлæ æппæт ирон адæм дæр.

Нæ уацх.