Ногазон цаутыл афæлгæст

ФÆУАЗÆГ СЫВÆЛЛÆТТЫ РЫНЧЫНДОНМÆ

РХИ-йы Хицауады Сæрдар Пухаты Эрик ногазон лæвæрттимæ фæуазæг,  сывæллæтты республикон рынчындоны цы сабитæ уыдысты, уыдонмæ. Хицауады Сæрдар зæрдæбын ногазон арфæтæ ракодта сывæллæттæн, сæ ныййарджытæн æмæ рынчындоны медицинон персоналæн. Сабитæ кæд рынчындоны æрвыстой сæ ногазон бæрæгбон, уæддæр сын уыд хъæлдзæг зæрдæйы равг æмæ Пухаты Эрикæн равдыстой сæ арæхстдзинад æмдзæвгæтæ кæсынæй.

ХУЫЗДÆР НАЗБÆЛАС

Куыд æрвылаз аз, афтæ та ныр дæр горæт Цхинвалы микрорайонты рафидуын кодтой рæсугъд фæлыст ногазон назбæлæстæ. Горæты районты фæсивæд æрвылазон конкурсы фæлгæтты традицион æгъдауæй сæ кæртыты сæвæрдтой æмæ сфæлындзыдтой 13 назбæласы. Куыд æрвылаз, афтæ та уыцы назбæлæстыл азылдысты горæт Цхинвалы администрацийы сæргълæууæг Коцты Алан æмæ йæ хæдивджытæ æмæ саргъ кодтой, хуыздæр назбæлас чи сфæлындзыдта, уый.

Иуæй-иу районты горæты администрацийы минæвæрттыл æмбæлдысты ирон æгъдаумæ гæсгæ æмæ сын уыдон дæр цæстуарзонæй кодтой ногазон арфæтæ. Ногазон æхсæв горæты районтæй хъуыстысты музыкæйы æхцон зæлтæ. Сывæллæттæ кастысты æмдзæвгæтæ, æххæст кодтой национ кæфтытæ, зарыдысты зарджытæ.

Конкурсы фыццаг бынат бацахста 12-æм астæуккаг скъолайы район, дыккаг бынатыл ацыд фаллаг фарсы район æмæ æртыккаг бынат та фæцис Хъайтарты æмæ Исахъы уынгтæ кæм иу кæнынц, уым цы назбæлас æвæрд æрцыд, уый. Афтæ ма призон бынæттæ лæвæрд æрцыдысты горæты ноджы дыууæ районæн, куыд оригиналон фæлыст назбæлæстæ, афтæ.

Конкурсы фæуæлахизуæвджыты схор-зæхджын кодтой Театралон фæзуаты бæрæгбонон концерты рæстæджы.

ХЪÆЛДЗÆГÆЙ АРВЫСТОЙ СÆ РÆСТÆГ

2018 азы скъоладзаутæй иууыл хуыздæр чи ахуыр кодта, стæй уагахастæй дæр цæвиттойнаг чи уыд, уыдонæн ногазон лæвары хуызы арæзт æрцыд бæрæгбонон мадзал ресторан «Виктория»-йы. Хъæлдзæг зæрдæйы равг сын балæвар кодта сывæллæтты студи «Гино ТВ», кæцы йæ куыст æххæст кæны ПТРК «ИР»-ы дæлбар. Сывæллæттæ кафыдысты, æххæст кодтой зарджытæ, кастысты æмдзæвгæтæ. Иу ныхасæй, сывæллæттæ Ног азы æрба-лæудыл æмбæлдысты хъæлдзæгæй. Мадзалы фæлгæтты ма фæбæрг вокалон конкурс 14+ уæлахиздзау дæр, цыран хайад райстой фондз хайадисæджы. Жюрийы уынаффæмæ гæсгæ гран-при саккаг кодтой Дзауы астæуккаг скъолайы ахуыргæнинаг Гаглойты Владиславæн, афтæ ма йын лæвæрд æрцыд 10 мин сомæн сертификат. Конкурсы иннæ цыппар хайадисæджы та хорзæхджын æрцыдысты дипломтæ æмæ иу мин сомæн сертификаттæй. Ацы мадзал ауадзынæн сын баххуыс кодта Президент Бибылты Анатоли. Паддзахады сæргълæууæджы «Гино ТВ» схорзæхджын кодта Кады грамотæйæ. Мадзалмæ æрбацыд æмæ  сывæллæттæн арфæ ракодта паддзахады сæргълæууæджы æмкъай Куымæридтаты Линдæ. Мадзалы хайадисджытæн ма арфæ ракодтой Парламенты депутат Тедеты Нона æмæ фæсивæдон æхсæнадон организацийы уæнгтæ. Афтæ ма ПТРК «Ир»-ы уагъдцæуæг акци «Бæллицты фонтан»-ы фæлгæтты Митын Дада сæххæст кодта æртæ сывæллоны бæллиц. Мадзалы кæрон сывæллæттæ сæххæст кодтой ногазон зарджытæ.

2018 АЗЫ  РАЙГУЫРД 363 САБИЙЫ

Ног боны Гуырæн хæдзары Хуыбиаты бинонтæн райгуырд лæппу. Æвзонг æмкъæйттæн уый у сæ фыццаг хъæбул, сæвæрдтой йыл ном Арсалан. 2018 азы горæт Цхинвалы Гуырæн хæдзары райуырд 363 сабийы, уыдонæй æртæ райгуырдысты ногазы æхсæвы.ПРЕЗИДЕНТОН НАЗ БÆЛАС

3-æм январы нæ горæты Сывæллæтты сфæлдыстады галуаны байгом президентон назбæлас. Æрвылаз дæр ацы галуаны кусджытæ сывæллæттæн бацæттæ кæнынц цымыдисон ногазон мадзæлттæ, кæцытæ байгом вæййынц президентон назбæласæй. Мадзалмæ æрбацыдысты Президент Бибылты Анатоли æмæ Хицауады уæнгтæ. Сывæллæттæн æвдыст æрцыд ногазон аргъау, кæцыйы рæстæджы сабитæ сæхи банкъардтой аргъæутты алæмæттаг дунейы. Сывæллæтты сфæлдыстады галуаны хъомылгæнинæгтæ сæ арæхстдзинад равдыстой куыд кафынæй, афтæ зарынæй дæр.

Ахуырдзаутæн арфæ ракодта Президент Бибылты Анатоли: «Ацы бонты Ног азы цытæн сымахæн арфæ кæны Митын Дада, кæцы уын лæвар кæны ногазон лæвæрттæ. Фидæн аз дæр кæд хорз  ахуыр кæнат æмæ  уæ ныййарджытæм хъусат, уæд дæр уын сараздзæн сюрпризтæ». Ахуырдзаутæ Президентимæ систой зæдылдарæн нывтæ, афтæ ма алкæцы сывæллон дæр райста ногазон лæвар.

Мадзалы кæрон Митын Дада æмæ Митын Чызг арфæ ракодтой æрæмбырдуæвджы-тæн æмæ сæ æрбахуыдтой назбæласы цур-мæ, цæмæй сывæллæттæ йæ алыварс æрзылдаиккой кафгæйæ. Сывæллæттимæ иумæ ирон дзыллон кафт «Симд» сæххæст кодта Президент Бибылты Анатоли дæр.

ПРЕЗИДЕНТ ФЕМБÆЛД СКЪОЛАДЗАУТИМÆ

4-æм январы Президент Бибылты Анатоли фембæлд  Сывæллæтты сфæлдыстады гал-уаны алыгъуызон къордтæм цæуæг республикæйы скъолаты хистæркъласонтимæ. Фем-бæлды ма хайад райстой паддзахады сæргълæууæджы æмкъай Куымæридтаты Линдæ æмæ сæ сывæллæттæ  Ацæмæз, Дзамболат æмæ Аннæ, РХИ-йы Ахуырады министр Гасситы Натали, Галуаны директор Джиоты Арянæ æмæ æндæртæ. Сывæллæтты сфæлдыстады галуаны  директор банысан кодта, зæгъгæ, сын æхсызгон у паддзахады сæргълæууæг йæ сывæллæттимæ сæ уагдонмæ кæй æрбацыд, уый.

Йæ рады, паддзахады сæргълæууæг Бибылты Анатоли дæр арфæйы ныхæстæ загъта æрæмбырдуæвджытæн. Банысан кодта, зæгъгæ,  фембæлды хайадисæг сывæллæттæ сты Ирыстоны сомбон æмæ, зæгъ, æй ныфс ис сæ хорз фæндтæ иууылдæр кæй сæххæст уыдзысты, уымæй. Æрæмбырдуæвджытæй алкæмæндæр фадат уыд Бибылты Анатолимæ сæ фарстытæ радтынæн. Фарстытæ уыдысты алыгъуызон, уыдон хаудтой куыд политикон, экономикон, афтæ социалон къабазмæ дæр. Ирыстоны баиу кæныны тыххæй фарстæн Президент сдзуапп кодта, зæгъгæ, уый у дыууæ Ирыстоны баиу кæныны фарсхæцæг. Банысан кодта, ацы идеяйы тыххæй ирон адæм кæй тох кæнынц рагæй фæстæмæ.

Æрæмбырдуæвджытæн ногазон арфæтæ ракодтой президенты æмкъай Куымæридтаты Линдæ æмæ сæ хистæр фырт Бибылты Ацæмæз.

Паддзахады сæргълæууæгимæ фембæлд рауад цымыдисон æмæ аххæссыд дыууæ сахаты онг. Фембæлды кæрон скъоладзаутæ сарæзтой ирон хъазт æмæ йæм æрбахуыдтой  Бибылты Анатоли æмæ  иннæ цытджын уазджыты.

ФÆУАЗÆГ СТЫ ПАНСИОНАТ «АУДЫНДЗИНАД»-МÆ

5-æм январы Цхинвалы районы администрацийы сфæлдыстадон къордтæ фæуазæг сты пансионат «Аудындзинад»-мæ. Уыдонæн традицион ссис ахæм хæрзаудæн акцитæ уа-дзын. Ныр дæр та пансионаты цæрджытæн равдыстой концертон программæ. Сæ хæрзаудæн акцийæ уыдон æвæгæсæг зæрæдтæм равдыстой аудгæ ахаст. Суазæг сæ кодтой адджинæгтæй дæр. Банысан кæнын хъæуы уый дæр, æмæ пансионаты цæрджытæн иууыл стырдæр лæвар кæй уыд, кæй сæ æрхъуыды кодтой æмæ сын артисттæ сæ зæрдæтæ кæй бахъæлдзæг кодой, уый. Мадзалы хайад райстой Хуыгаты Дзамболат, Æлборты Шоренæ, Гуыззыдтаты Сослан, Джыккайты Владик æмæ æндæртæ.

ДЖИОТЫ Екатеринæ