Нæ горæты цæрæн æмæ административон хæдзæртты къултыл, кæрæдзийы фæдыл, алыгъуызон нывтæ, зынын куы райдыдтой, уæд сæм адæм нæ акастысты иугъуызон цæстæнгасæй. Иутæ ацы куыст банымадтой хорзыл, аннæтæ та сæм акастысты уæлæнгай цæстæнгасæй. Фыццаг уал мæ зæгъын фæнды, ацы куыстытæ хорзыл чи банымадта, уыдоны хъуыдыты тыххæй. Зæгъынц, зæгъгæ, никæй дæр хъыг дарынц æмæ никæмæн дæр йæ зæрдæйы уаг халынц.

Нывгæнджыты сæйрагдæр хæс у, цæмæй горæты бæстыхæйтты къултыл конд æрцæуой горæты кадджындæр æмбæстæгты нывтæ. Уымæй дарддæр ма нывгæнджыты хæс у, цæмæй хæдзæртты къултæй зына ирон колорит. Нæ кадджын фыдæлты историйæ дарддæр ма дзы зына хъæлдзæг æмæ рæсугъд нывтæ. Нырмæ уал цы нывтæ фенæн ис бæстыхæйтты къултыл, уыдон, чи фæнды сæм ма бакæса, алкæмæ дæр æвзæрын кæнынц цымыдис.

Ныр та ацы куыстытæ æмæ нывтæм уæлæнгай цæстæнгасæй чи акаст, афтæ чи дзуры, зæгъгæ, ницæмæн хъуыдысты, уыдон хъуыдыты тыххæй.

Цалдæрæй мын цæвиттон æрхастой, зæгъгæ, хуыздæр уаид æмæ куы аразиккой, зæгъæм, Хуссар Ирыстоны Анахарсисы номыл библиотекæйы къулыл кæнæ та Профцæдисты хæдзары агъуысты къулыл цы стеллæтæ ис, ахæмтæ.

Ахæм хъуыдытæ, раст зæгъгæйæ, æнæбындур не сты. Уымæн æмæ не ‘хсæн цъус нæй, исчи цы фæнды хорз ма сараза, уæддæр фау æнæр-хæсгæ чи нæ фæвæййы.

Ацы фарсты фæдыл ныхас кодтон горæты разамынады хицæн къухдариуæггæнджытимæ. Цалдæрæй мын загътой, зæгъгæ, æнхъæлмæ кастыстæм хъæлдзæгдæр æмæ рæсугъддæр нывтæм. Дзырдтой ма, зæгъгæ, æнæ уыдон дæр æнкъард зæрдæтимæ стæм æмæ тар нывтæ нæ зæрдæйы уаг кæнынц мæгуыраудæр. Цæвиттонæн æрхастой Хъайтартæ æмæ Исахъы уынгтæ кæм иу кæнынц, уыцы бирæуæладзыгон цæрæн хæдзары къулыл цы тар ныв скодтой уый. Афтæ ма Октябры æмæ Исахъы уынгтæ кæм иу кæнынц, уыцы хæдзары къулыл конд ныв дæр.

Ацы куыстыты тыххæй мын цалдæрæй та загътой, зæгъгæ, уыдон дæр хъæуынц, фæлæ,  ахсджиагдæр сты, горæты цы уынгтæ арæзт æрцыдысты, уыдоны нæмттæ æмæ хæдзæрт-тыл та номыртæ бакæнын. Уыимæ ма дзырдтой, зæгъгæ, цас раст у, æмæ ныридæгæн цы къулы сæрст згъæлы, ууыл искæй ныв скæнын. Зæгъ-гæ, цы уыдзæнис цалдæр мæйы фæстæ нывимæ.

Кæй зæгъын æй хъæуы, загъдгонд цухдзи-нæдтæ сты ахъуыды æмæ сраст кæныны аккаг æмæ кæмæ хауынц, уыдон сыл хъуыды дæр кæнынц æмæ сæ рараст кæныныл архайгæ дæр. Мах алцы дæр æвиппайды саразын фæфæнды, æмæ афтæ нæ вæййы. Уыимæ ма зонын хъæуы уый дæр, æмæ цыфæнды ног æмæ фыццаг къахдзæф акæнын æнцон кæй нæу, æруагъдæуы рæдыдтытæ дæр. Нæ горæты къултыл ныв кæнын у ногдзинад æмæ мæ уырны, цы цухдзинæдты тыххæй загътам, уыдоныл нæ дзурын кæй нал бахъæудзæнис.

Гæззаты Иван

Comments are closed, but trackbacks and pingbacks are open.