Æвзонг натуралистты республикон станцы хъомылгæнинæгтæ Цхинвалы стадионы цур ныссагътой самшиты æвзонг къутæртæ. Акцийы ма хайад райстой ацы уагдоны кусджытæ сæ директор Мæргъиты Ирбегы сæргълæудæй.

Æвзонг натуралистты республикон станцы методист Чилæхсаты Заирæ куыд загъта, афтæмæй акци баст у уагдоны сырæзты 60-азы юбилеимæ.

Ацы нысаниуæгджын боны цытæн мах ныссагътам самшиты 60 къутæры. Æвзонг самшиттæ рæздзысты æмæ сывæллæтты зæрдыл лæууын кæндзысты, горæты сцъæхвæлыст кæнынмæ цы хорз хайбавæрд бахастой, уый тыххæй», — радзырдта станцы методист.

Уый ма банысан кодта, зæгъгæ, станцы хъомылгæнинæгтæ æмæ ахуыргæнджытæ дæр цæттæ сты Цхинвалы администрацийæн баххуыс кæнынмæ республикæйы столицæ сцъæхвæлыст кæныны тыххæй.

«Нæ райгуырæн къуымы зайæгойтæ»-йы кружокы хъомылгæнинаг Гæззаты Виктория радзырдта, зæгъгæ, абон уый фыццаг хатт æрбацыд ацы кружокмæ.

«Мæ зæрдæмæ тынг фæцыд ацы акцийы хайад исын. Бузныг ахуыргæнджытæн, ахæм хорз мадзал кæй сорганизаци кодтой, уый тыххæй», — загъта Гæззаты чызг.

Мадзал уадзыны рæстæджы акцийы хайадисджыты æдасдзинад сифтонг кодтой Хуссар Ирыстоны паддзахадон автоинспекцийы кусджытæ. Æвзонг натуралистты республикон станц уæвынад кæны 1957 азæй фæстæмæ.

Comments are closed, but trackbacks and pingbacks are open.