19-æм декабры нæ горæты Анахарсисы номыл республикон библиотекæйы уагъд æрцыдис чиныгкæсджыты конференци зындгонд ирон ахуыргонд, философон зонæдты доктор Козаты Аквсентийы «Анахарсис»-ы чиныгмæ гæсгæ.

Мадзалмæ æрбацыдысты æмæ дзы хайад райстой Тыбылты Алыксандры номыл паддзахадон университеты философийы кафедрæйы хистæр ахуыргæнæг Хуыбиаты Соня, доцент Дзугаты Къоста, РХИ-йы Культурæйы министрады библиотекæты хъуыддæгты фæдыл сæйраг специалист Дриаты Нателæ, университеты студенттæ æмæ нæ горæты скъолаты ахуыргæнинæгтæ.

Конференци бацæуæн ныхасæй байгом кодта ацы библиотекæйы уырыссаг хайады кусæг Кокойты Фатимæ. Уый бузныг загъта мадзалмæ æрбацæуджытæн æмæ банысан кодта, зæгъгæ, республикон библиотекæ æнæнхъæлæджы нæ хæссы Анахарсисы ном æмæ чи уыдис, уый фæдыл цыбыртæй радзырдта.

Скифаг философ æмæ куырыхон Анахарсисы тыххæй конференцийы доклад бакаст Хуыбиаты Соня. Уый, фыццаджыдæр, банысан кодта дзæнæттаг Козаты Аквсентийы зонадон куыстыты стыр нысаниуæг философийы фадыджы. Козаты Аквсенти, зæгъгæ, егъау куыст бакодта йæ чиныг саразыны хъуыддагыл. Уый æртымбыл кодта æнæмæнгхъæуæг æрмæг æмæ афтæмæй чиныгкæсджытæн байгом кодта Анахарсисæй махæн уæдмæ зындгонд чи нæ уыдис, уыцы истори.

«Анахарсис райгуырд нæ эрæйы агъоммæ 614 азы. Уыд скифаг паддзах Кадуиды æфсымæр Гнуры фырт. Йæ мад та уыд грекъаг сылгоймаг æмæ уымæ гæсгæ йæ сабийы бонтæй фæстæмæ хорз зыдта куыд скифаг æвзаг, афтæ грекъаг æвзаг дæр. Уый йæ рæстæджы базыдтой, куыд куырыхон æмæ зондджын, афтæ. Историктæ æмæ философтæ куыд сбæрæг кодтой, афтæмæй Анахарсис уыдис уæды рагцивилизацийы авд куырыхон æмæ зондджын адæймæгты æмрæнхъ. Рагон Грецийы уыцы адæймæгты номхыгъдмæ хаст æрцыдысты Фалес, Биас, Питтак, Солон, Клеобуль, Миссон æмæ Анахарсис. Азфысджытæ куыд зæгъынц, афтæмæй Анахарсис йæ фæстæ ныууагъта хъæздыг бынтæ. Æппæт уыдон тыххæй та фыссы йæ чиныджы Козаты Авксенти», – загъта Хуыбиаты Соня.

ХИПУ-йы философийы кафедрæйы доцент Дзугаты Къоста дæр банысан кодта Козаты Авксентийы чиныджы ахадындзинад æмæ загъта, зæгъгæ, нæ сомбоны фæлтæр хъуамæ хорз зоной Анахарсисы хуызæн зындгонд куырыхон адæймæгты тыххæй. Уый ма куыд банысан кодта, афтæмæй Козайы фырты чиныг уагъд æрцыд дыууæ хатты, фæлæ ма, зæгъгæ, хорз уаид æмæ ма йæ ноджы иу хатт куы рауадзиккам баххæсткæнинаг æрмæг æмæ комментаритимæ. «Козаты Аквсенти ацы чиныг аразгæйæ, стыр куыст бакодта. Уый Мæскуыйы архивты кусгæйæ, æртымбыл кодта æрмæг æмæ адæмы рæгъмæ рахаста Анахарсисæй уæдмæ цы нæ зыдтам, æппæт уыцы ис-тори», – загъта Дзугаты Къоста.

Дриаты Нателæ дæр арфæ ракодта конференцийы хайадисджытæн æмæ банысан кодта, нæ адæмæй алчидæр хæсджын кæй у, цæмæй зонæм нæ истори æмæ Анахарсисы ном цæмæн хæссы нæ республикон библиотекæ, æппæт уыдæттæ.

Конференцийы ма цымыдисон доклад бакаст университеты юридикон факультеты фыццæгæм курсы студент Цхуырбаты Сæрмæт дæр. Æрхаста дæнцæгæн Анахарсисы зондджын ныхæстæй дæр æмæ сын æмбарын кодта сæ нысаниуæг дæр.

Кæронбæттæны ма ныхасы рацыд Анахарсисы номыл республикон библиотекæйы директор Кокойты Валерия æмæ банысан кодта, ахæм мадзæлттæ уадзын арæхдæр кæй хъæуы, цæмæй кæстæр фæлтæр зонгæ кæной зындгонд историон гоймæгты цард æмæ сфæлдыстадимæ. Уый ма банысан кодта Козаты Аквсентийы зонадон куысты ахадындзинад æмæ ахсджиагдзинад дæр.

Цхуырбаты Ларисæ

Comments are closed, but trackbacks and pingbacks are open.