9-æм сентябры уагъд æрцыд 2015-2016 азтæн Хуссар Ирыстоны социалон-экономикон рæзтæн ахъазгæнæг Инвестицион программæ реализаци кæныныл контролы фæдыл штабы радон рабадт. Сæрдариуæг ын кодта РХИ-йы Хицауады Сæрдар Хъуылымбегты Доменти. Йæ куысты хайад райстой Хицауады Сæрдары хæдивæг Тъехты Алан, министрадтæ æмæ ведомствоты къухдариуæггæнджытæ, районон администрациты сæргълæуджытæ, арæзтадон объектты архайæг генподрядон æмæ субподрядон организациты къухдариуæггæнджытæ.

Куыд æрвыл штабы рабадты, атфæ та ныр дæр уынаффæ цыдис арæзтады гъæды æмæ темпты, хыгъдон документаци рæстæгыл цæттæ кæныны, афтæ ма арæзтцæуæг объектты хъуыддæгты уавæр ныртæккæ куыд у, уыдæттыл.

Æмбырды райдианы Хъуылымбегты Доменти банысан кодта, зæгъгæ, нæ сæйрагдæр до-мындзинад арæзтадон организацитæм у, цæмæй рæстæгыл æмæ гъæдджынæй æххæст цæуой бакæнгæ куыстытæ, æххæст цæуа æмбæлон документаци. «Арæзтадон объекттæ банысангонд рæстæгмæ хъуамæ лæвæрд цæуой эксплуатацимæ. Уый тыххæй махæн ис æппæт фадæттæ дæр, цæмæй куыстытæ æххæст цæуой, Инвестпрограммæйы фæлгæтты куыд нысан сты, афтæ. Æмæ мæ ныфс ис æмткæй иумæ нæ бон кæй суыдзæн, ацы аз уыцы программæ æххæст кæй æрцæудзæнис, уымæй», — загъта Хицауады Сæрдар.

Хыгъдон документаци рæстæгыл цæттæ кæныныл дзургæйæ, Арæзтад, архитектурæ æмæ цæрæнуатон-коммуналон хæдзарады министр Зæгъойты Эдуард фехъусын кодта, зæгъгæ, министрад контроль фæтыхджындæр кодта арæнгонд бæрндзинады æхсанад арæзтадон компани «Эверест»-æй хыгъдон документаци исыны фæдыл. Ацы арæзтадон компани хæс райста кæй йæ бавдисдзæн 30 сентябрмæ. Министр ма куыд загъта, афтæмæй арæзтадон компани хыгъдон документаци уæдмæ куынæ бавдиса, уæд ын сæ дарддæр кæй нал исдзысты.

Рабадты хайадисджытæ дарддæр æруынаффæ кодтой, уыйразмæ рабадты цы хæстæ радтæуыд, уыдон куыд æххæст æрцыдысты, ууыл.

Арæзтадон организаци арæнгонд бæрндзинады æхсæнад «Меркури плюс»-ы къухдариуæггæнæг А. Биджиевæн хæсгонд уыд, цæмæй аскъуыддзаг кодтаид кусджытæн куыстмызд бафидыны фарст. Уый куыд фехъусын кодта, афтæмæй æнæмæнгхъæуæг куыст цæуы ацы фарсты фæдыл æмæ ног къуырийы проблемæ иуварс æрцæудзæн.

Хицауады Сæрдар æрсидт организациты къухдариуæггæнджытæм, цæмæй контроль кæной объектты арæзтæдты чи кусынц, уыцы кусджытæн рæстæгыл мызд фидыныл. Алы къухдариуæггæнæг дæр дырысæй хъуамæ æххæст кæна, йæ разы цы хæстæ ис, уыдон æмæ рæстæгыл фида кусджытæн сæ куыстмызд.

Арæзтадон организаци «Престиж»-ы къухдариуæггæнæг Беппиты Иналæн хæсгонд уыд, цæмæй арæзтцæуæг базармæ газ бауадзыны фарст скъуыддзаг æрцыдаид. Уый куыд фехъусын кодта, афтæмæй ацы фарсты фæдыл проблемæтæ нал ис.

Æнæниздзинад æмæ социалон рæзты министры хæдивæг Плиты Агуындæйæн дæр хæсгонд уыд, цæмæй йæ хъус æрдара, сывæллæттæн арæзт чи цæуы, уыцы республикон рынчындонæн административон-хæдзарадон хайы фæдыл директоры хæдивæджы бынатмæ кандидатурæ ссарынмæ. Министры хæдивæг куыд фехъусын кодта, афтæмæй ис ахæм адæймаг, кæцы аккаг у уыцы бынатмæ. «Уый у республикон рынчындоны фæлтæрд кусæг, кæцы къорд азты дæргъы йæ хæстæ æххæст кæнынмæ кæсы бæрндзинады цæстæй. Мах ныридæгæн уыдыстæм ацы объекты æмæ йæ хъуыддæгты уавæримæ базонгæ кодтам», — загъта Плиты чызг.

Хъуылымбегты Доментийы ныхæстæм гæсгæ сывæллæтты республикон рынчындоны арæзтад кæронмæ фæхæццæ кæны æмæ ахсджиаг социалон объект кæй у, уый хынцгæйæ алы кандидатурæ дæр æвзæрст цæудзæн лæмбынæгæй. Плиты Агуындæ ма райгондæй баззадис банысангонд рынчындоны бакæнгæ куыстыты гъæдæй. «Мах ацы объекты уыдыстæм цалдæр боны размæ æмæ æвдисæн систæм, ног уникалон медицинон объект кæй фæзындис, уымæн. Уый у æхсызгон хъуыддаг æмæ мæ бон нæу ме ‘нкъарæнтæ ма раргом кæнон. Ахæм медицинон уагдон æз Хуссар Ирыстоны никуы федтон, алцыдæр дзы дзуапп дæтты нырыккон техникон домæнтæн. Сæвæрдтой дзы иттæг хорз дуæрттæ, ис дзы хорз фезмæлæнтæ, æртыккаг уæла-дзыджы операцион блокмæ бахизæны, кæцыйы медиктæ хонынц «сырх зонæ», аразджытæ састæрд кодтой сырх плиткæйæ, æппæт уыдæттæ сты иттæг хорз», — загъта уый.

Хицауады Сæрдар дæр сразы ис Плиты чызджы хъуыдыимæ æмæ уый дæр банысан кодта, зæгъгæ, æцæгæйдæр ахæм специализацигонд медицинон объект республикæйы никуы уыдис. «Хорз аргъ ын скодта Плиты Агуындæ. Махæй алкæмæн дæр æхсызгон у, ахæм объект нæм кæй уыдзæн æмæ ныртæккæ иууыл сæйрагдæр у ахъуыды кæнын рынчындоны эксплуатацийыл, уый канд хорз ифтонггæрзтæй нæ, фæлæ аккаг кадртæй сифтонг кæныны фарстыл. Æппæт уыцы фарстатыл мах иумæ кусдзыстæм кусæгон уавæры», — загъта уый.

Рабадты ма дзырд цыд Цхинвалы зæронд хид сфидæрттæ кæныныл. Хъуылымбегты Доменти куыд фехъусын кодта, афтæмæй ацы фарсты фæдыл ист æрцыд зонæнтæ, зæгъгæ, хид нырма йæ куыст æххæст кæндзæн, æрмæст саразын хъæуы афтæ, цæмæй йыл æрмæстдæр цæуой чысыл рог автомашинæтæ æмæ фистæгæй цæуæг адæм.

«Зæронд хид у нæ горæты историон бынæттæй сæ иуы æвдисæндар æмæ йæ сфидæрттæ æмæ схæрзарæзт кæныны фарст кæддæриддæр уыдзæн нæ разылæууæг хæстæй сæ иу», — загъта Хицауады Сæрдар.

Республикон паддзахадон унитарон куыстуат «Дорэкспострой»-ы генералон директор Лалыты Мурат рабадты хайадисджытæн фехъусын кодта, паддзахадон унитарон куыстуат “Арæзтадон æрмæджыты завод”-æн субподрядон организациты ‘рдыгæй хæстæ бафидыны фæдыл цы мадзæлттæ ист цæуы, уыдоны фæдыл.

Уый банысан кодта, зæгъгæ, цы куыстытæ æххæст цæуынц, уыдонæй баззайгæ хæс — 1 милуан сомы, бафыст æрцыд аивгъуыйгæ къуырийы. Хицауады Сæрдар куыд банысан кодта, афтæмæй паддзахадон унитарон куыстуат «Арæзтадон æрмæджыты завод» хъуамæ куса æппæт хъомысæй, æмæ Лалыты Муратæн бахæс кодта, субподрядон организациты æрдыгæй æхцайы фæрæзтæ исыны ахæм схемæ бакусын, цæмæй заводæн йæ бон уа йæ арæзтадон æр-мæджыты аргъ рæстæгыл исыныл контроль кæнын.

Штабы рабадты Арæзтад, архитектурæ æмæ цæрæнуатонкоммуналон хæдзарады министр Зæгъойты Эдуард радзырдта Инвестицион программæйы фæлгæтты арæзтцæуæг объектты арæзтадон куыстытæ куыд цæуынц, уый фæдыл. Цхинвалы горæты уынгты хæрзарæзтадыл уынаффæ кæнгæйæ, куыд рабæрæг, афтæмæй, раздæрау сæйраг проблемæ у, æххæсткæнынадон документаци рæстæгыл нæ бацæттæ кæнын æмæ раттын. Цæмæй дарддæр афтæ мауал уа, уый тыххæй рабадты хайадисджытæ фæндон бахастой, цæмæй Капиталон арæзтады управлени æмæ республикон паддзахадон унитарон куыстуат «Дорэкспострой»-йы æмбæлон бынæттæм нысан æрцæуой ахæм специалисттæ, кæцытæн сæ хæстæм хауа хыгъдон документаци бацæттæ кæнын дæр. Ацы фæндоны фарс рахæцыд Хицауады Сæрдар дæр æмæ загъта, зæгъгæ, цас гæнæн ис, уыйас æй тагъддæр аскъуыддзаг кæнын хъæуы.

Рабадты ма уынаффæ цыдис арæнгонд бæрндзинады æхсæнад «СоюзСтройПроэкт» Цхинвалы æмæ Ленингоры поселочы кæй аразы, уыцы объекттæй иу къорды арæзтадон куыстытæ фæтагъддæр кæныны æмæ сфидаргонд графикæй фæстæзаддзинад фæкъаддæр кæныны фарстыл.

Хицауады Сæрдары ныхæстæм гæсгæ, кæд куыстыты темптæ тагъддæр кæнынц, уæддæр уый фаг нæу, æмæ банысан кодта ацы азмæ хаст æппæт объектты дæр эксплуатацимæ рæстæгыл раттыны ахсджиагдзинад. Арæзтады министр Зæгъойты Эдуардæн бахæс кодта, цæмæй æрвылбон дæр контроль кæна куыстыты темп-тыл æмæ оперативон информаци дæтта æппæт уæвæг проблемæты тыххæй.

Хъуылымбегты Доменти куыд загъта, афтæмæй Республикæ Хуссар Ирыстоны Хицауады сæйрагдæр хæстæй иу у Инвестицион программæ реализаци кæнын. «Абоны бонмæ Инвестицион программæйы руаджы арæзт æмæ æндидзыд цæуы нæ республикæ, хуыздæрæрдæм ивы йæ хуыз. Уæрæсейаг коллегæтимæ иумæ мах нæ тыхтæ иу кæнæм йæ реализаци кæныны сæраппонд, уымæн æмæ ныртæккæйы рæстæджы Инвестпрограммæйы руаджы æвæрд цæуы бындур адæмы царды гъæд фæхуыздæр кæнынæн æмæ фа-дат дæтты дарддæры плæнттæ аразынæн. Уымæ гæсгæ сидын арæзтадон процессы архайджытæм: цæй æмæ иууылдæр куыд иу, афтæ, бæрндзинад æнкъаргæйæ, æппæт нæ хъарутæ аздахæм нæ разы æвæрд хæстæ  скъуыддзаг кæнынмæ», — кæронбæттæны загъта Хицауады сæрдар.

Бестауты Валя

Comments are closed, but trackbacks and pingbacks are open.