Ныхас  цыд автотранспортон куыстуаты проблемæтыл

Паддзахадон унитарон куыстуат «Автомобилон транспорты управленийы» (АПУ) архайды проблемæты фæдыл кусæгон æмбырд ауагъта Хицауады Сæрдар Джуссойты Константин.

Æмбырды хайад райстой Хицауады сæрдары хæдивæг – Экономикон рæзты министр Тадтаты Дзамболат, Сæудæджерад, транспорт æмæ энергетикæйы фæдыл комитеты сæрдар Тедеты Руслан, Хицауады Аппараты къухдариуæггæнæг Джуссойты Алан, АПУ-йы директор Дудайты Альберт.

Автотранспортон куыстуаты цы проблемæтæ ис, уыдон бæрæгæй  зынынц йæ рентабелондзинадыл, бакæнгæ лæггæдты гъæд æмæ гуырахстыл. Куыстуат практиконæй кусы йæхицæн зиан хæсгæйæ.

Дудайты Альберт радзырдта, куыстуаты эффективон куыстæн цы цæлхдуртæ ис, уыдоны тыххæй. Сæйрæгтæ – æртаг-сæрдæн æрмæджытæ кæй фæзынаргъдæр сты, уый, къуындæггонд субсидитæ æмæ зæронд автопарк.

Ныхас ма цыд, æрæджы Джуссойты Константинимæ АПУ-йы кусджыты фембæлды тыххæй – куыстмызды фарстайы фæдыл.

Æмбырды хайадисджытæм байхъусгæйæ, Хицауады сæргълæууæг банысан кодта, зæгъгæ, куыстуаты цæлхдуртæ скъуыддзаг кæнын домы комплексон ахаст.

«Базарадон экономикæйы уæвæрты куыстуæттæ хъуамæ хæссой æфтиаг. Абон цы хуызы ис, уый рентабелон нæу, уымæ гæсгæ, хъæуы архайдмæ ахаст фæивын, цы ресурстæ нæм ис, уыдонæй уæлдай эффективондæрæй спайда кæнгæйæ», – банысан кодта Джуссойты Константин.

Æмбырды хатдзæгтæм гæсгæ Хицауады сæргълæууæг фæндон бахаста, цæмæй Паддзахадон унитарон куыстуат «Автомобилон транспорты управленийы» финансон-хæдзарадон архайдæн ауадзой комплексон ревизи, цæмæй сбæрæг кæной куыстуаты цухдзинæдтæ, афтæ ма маршрутты рационализаци æмæ автотранспортæй эффективонæй спайда кæныны фадæттæ.

Джуссойты Константин Сæудæджерад, транспорт æмæ энергетикæйы фæдыл комитетæн бахæс кодта, шофырты куыстмызды оптимизаци æмæ автотранспорты паддзахадон парк сног кæныны фарстытыл бакусын.