18-æм декабры РХИ-йы Президент Бибылты Анатоли рауæрæхгонд æмбырд ауагъта министрадтæ æмæ ведомствоты къухдариуæггæнджыты, горæты æмæ районты администрациты сæргълæуджыты, РХИ-йы Парламенты депутатты хайадистæй.

Тагъд Ног аз кæй æрбалæудзæнис, уымæ гæсгæ Президент Бибылты Анатоли ногазон арфæтæ ракодта æрæмбырдуæвджытæн. Уый фæстæ хъусдард аздæхта ногазон мадзæлттæм развæлгъау бацæттæ кæнынмæ. Банысан кодта, зæгъгæ, афон у, цæмæй министрадты, ведомствоты æмæ организациты уагъд цæуой ногазон мадзæлттæ.

«Министрадтæ, ведомствоты æмæ организациты къухдариуæггæнджытæ хъуамæ бацархайой сæ дæлбаруæвæг кусджытæн ногазон зæрдæйы равг саразыныл. Афон у ногазон назбæлæстæ сфæлындзын æмæ хъарм бæрæгбонон атмосферæ саразынæн.  Ныридæгæн сæхи хъуамæ бæрæгбонгъуыз дарой нæ куыстуæттæ, уагдæттæ», – банысан кодта Президент æмæ æрсидтис республикæйы районты администрациты сæргълæуджытæм дæр, цæмæй уыдон æвæстиатæй æрæвналой ногазон мадзæлттæ цæттæгæнæн куыстытæм.

Уый фæстæ Бибылты Анатоли рахызт æндæр ахсджиаг фарстмæ Уæрæсейы Федерацийы президентон æвзæрстытæм цæттæгæнæн куыстытæм.

«Рæхджы æрбалæудзысты Уæрæсейы Федерацийы Президенты æвзæрстытæ. Нæ республикæйы цæрджытæн та сæ 98 проценты сты Уæрæсейы æмбæстæгтæ æмæ саразын хъæуы афтæ, цæмæй не ‘мбæстæгтæ спайда кæной сæ конституцион барæй – Уæрæсейы æмбæстаджы барæй æмæ хайад райсой президентон æвзæрстыты. Уый тыххæй хъæуы æмбæлон куыст бакæнын Централон æвзарæн къамисы нæ республикæйы Уæрæсейы минæварадимæ. Хъæлæс дæттыны рæстæджы æвзарджытæн хъуамæ арæзт æрцæуа æппæт уавæртæ дæр, кæцытæ хъуамæ дзуапп дæттой куыд Уæрæсейы, афтæ Хуссар Ирыстоны закъондæттынадæн дæр», – бафæдзæхста Президент.Æмбырды раныхас кодта Уæрæсейы Федерацийы минæвар Хуссар Ирыстоны Марат Кулахметов. Уый банысан кодта Уæрæсейы Федерацийы президентон æвзæрстытæ кæй уыдзысты 2018 азы  18-æм марты. Хуссар Ирыстоны дæр арæзт æрцæудзæнис æвзарæн фадгуытæ. Куыд бауынаффæ кодтой, афтæмæй Хуссар Ирыстоны территорийыл арæзт æрцæудзæнис 9 æвзарæн фадыджы. Уыдонæй 5 æвзарæн фадыджы арæзт æрцæудзæнис горæты, иу дзы уыдзæнис Уæрæсейы минæварады агъуысты территорийыл, иннæтæ уыдзысты нæ горæты 1, 5 æмæ 6-æм астæуккаг скъолаты æмæ Профцæдисты хæдзары. Æвзарæн фадгуытæ уыдзысты Знауыры, Дзауы, Ленингоры поселокты æмæ Цхинвалы районы Дменисы хъæуы администрацийы. Куыд зонæм, афтæмæй марты мæйы боныгъæд ивæнтæ кæй фæкæны, бирæ хатт уазал бон кæй вæййы, уымæ гæсгæ администрациты кусджытæ хъуамæ хынцой алы уавæр дæр æмæ бæрзонд æмвæза-дыл сорганизаци кæной æвзарæн фадгуыты куыст.

Марат Кулахметов ма æрсидт районты администрациты сæргълæуджытæм, цæмæй 15 январмæ сбæрæг кæной нæ республикæйы уæрæсейаг æмбæстæгты номхыгъдтæ, уæлдайдæр та Дзауы районы. Мидхъуыддæгты министрад дæр уыдонимæ иумæ хъуамæ ацы хъуыддыджы райса активон хайад. Уымæй дарддæр ма администрациты сæргълæуджытæй æрдомдта, цæмæй дæрддаг хъæуты цæрджытæ ифтонг æрцæуой транспортæй. Уый ма куыд банысан кодта, афтæмæй æппæт техникон фарстытæ дæр скъуыддзаг æрцæудзысты.

Ног аз тагъд нæ къæсæрыл кæй æрбалæудзæнис, уымæ гæсгæ Кулахметовы цæст нæ адæмæн бауарзта хорздзинæдтæ, æнæниздзинад, бинонты амонд, Хуссар Ирыстоны зæххыл та кæддæриддæр фысымиуæг куыд кæна сабырад.

«Кæй зæгъын æй хъæуы, æвзæрстытæ цæмæй æмбæлонæй ацæуой, уый тыххæй хъæуы организацион куыст бакæнын. Ноджыдæр æй зæгъын, махæн нæ адæмы фылдæр хай сты уæрæсейаг æмбæстæгтæ æмæ хъуамæ активон хайад райсæм æвзæрстыты», – загъта æмбырды кæрон Президент.

Бестауты Валя

Comments are closed, but trackbacks and pingbacks are open.