Тыбылты Алыксандры номыл Хуссар Ирыстоны паддзахадон университеты историйыл куы дзурай, уæд нæ ахиздзынæ профессор Мамиты Гигуцы иувæрсты. Гигуц уырдæм æрбацыд рæнхъон кусæгæй, уæд пединститут уыд, фæкуыста дзы 40 азæй фылдæр, схызт профессоры къæпхæнмæ, йæ царды бонтæ сæйраджыдæр снывонд кодта ахуыр-хъомыладон, стæй уæд зонадон куыстæн.

Хъарадзауы фæдон Гигуцыл мæнæн æнцон дзурæн у, уымæн æмæ йæ хорз зыдтон, 1955 -1960 азты уыдтæн йе студент, 1961 азæй фæстæмæ та куыстам иумæ, кæд нæ предметтæ хицæнтæ уыдысты, уæддæр.

Куыд лектор, хъомылгæнæг, афтæ дисæндзуринаг уыд. Æмбаргæ, хиуылхæцгæ, æрмæг амонгæйæ дæр æмæ æнæуый хъуыддагыл дзургæйæ дæр.

«Лæджы, дам, фæндагыл, кæнæ фынджы фарсмæ базондзынæ», – дзырдтой нæ фыдæлтæ. Гигуц фæндагыл дæр æмæ фынджы уæлхъус дæр уыд цæвиттойнаг йæ ирон æгъдау æмæ миниуджытæй. Æцæг ын дуг дæр йæ къух арæзта, сабырдзинад, фарн æмæ æгъдау сæ тыхы уыдысты, нæ фæсивæд та ахуырыл хæлæф кодтой.

Æндæр уыд пединституты коллективы уавæр дæр. Гигуцæн йæхийау нæлгоймæгты фылдæр хай уыдысты Стыр Фыдыбæстæйон хæсты хайадисджытæ: Хъуылымбегты Гигуц æмæ Алекси, Мамиты Гига æмæ Бекъойты Димитр, æфсымæртæ Тедеты Суликъо æмæ Федыр, Цхуырбаты Михаил, Джиоты Илларион, Цоциты Федыр, Беджызаты Дудар, Котолиты Граф, Гасситы Илья, Пæррæстаты Магрез, Дзассохты Константин, Гигуц йæхæдæг, сылгоймæгтæй – Медойты Галинæ æмæ æндæртæ.

Цыппар азы цыппар боны не сты, Кавказæй Берлинмæ салдаттаг цырыхъыты туджы малты, лæгмæрдты сæрты чи фæлæгæрста, уый бирæ цыдæртæ федта. Керч æмæ Ленинграды тугуарæнты чи бахауд, Сталинграды цæхæрæй чи раирвæзт, уыдоныл дзурын хъæуы. Махæн нæ дзул лæвæрд фæвæййы куы фæзæгъæм: уыдис Стыр фыдыбæстæйон хæсты, хайад иста уыцы хæсты…

Нæ уацы хъайтар Мамиты Григори – йæ ирон ном Гигуц рацыд царды гуыргъахъ фæндæгтыл. Æрмæст йæ райгуырды аз  – 1917 аз – дæр дзурæг у, йæ сабион бонты йæм цы рæстæг æрхаудта, ууыл. Йæ цардæй та æнæхъæнæй зæгъæн ис – уыд ын тох æмæ фыдæбæтты азты дуг. Уый дын 1917 аз, йæ хæдфæстæ 1920 аз, æртæаздзыд сывæллон фæхауæггаг, басыгъд сæ хæдзар, сæ хъæу, Хуссар Ир. Лыгъды фæндæгтæ, Цæгат Иры тухийаджы бонтæ, фæстæмæ та сæ сыгъд уæзæг – Мамиты хъæумæ. Ныр та 27-аздзыдæй бамидæг Стыр Фыдыбæстæйон хæсты цæхæры. Фæхæцыд, æрыздæхт уæлахиздзауæй, фæлæ дзы ныууагъта йе ´нæниздзинады фылдæр хай, фæцард къуылыхæй, йæ къæхтыл хаста хицæн формæтыл хуыд дзабыртæ (йæ цæф къахæн æлхæнгæ дзабыр нæ бæззыд).

Ацы бонты Гигуцы райгуырдыл æххæст кæны 100 азы. Фæнды мæ бæстондæр радзурын, чи уыд ацы хуыцауысконд лæг, цы йын лæ-вæрдта тых æмæ фæндаг, цæмæй йæ Ирæн, æмæ йæ рæзгæ фæл-тæрæн амонгæ дæр кодтаит, чингуытæ дæр сын фыстаид æмæ сæ ирон уæздандзинæдтыл хъомыл кодтаид.

Гигуц цы хъæуы райгуырдис, уый ис, горæты хъæдкуысты комбинат кæм уыд, уый акомкоммæ уæлæуæз фахсы. Зонын хъæуы уый дæр, æмæ Мамитæ, Хетæгкатæ Нарæй ралидзгæ кæй сты. Мамиты иу хай æрцард Цъунары, иннæ хай та æрбынат кодта сахары галиуфарс цы фахс ис уым æмæ уыцы бынат схуыдтой Хъарадзауы хъæу, фæстæдæр та – Мамиты хъæу. Уым райгуырд Гигуц 1917 азы. Сæ хъæуы номæй буц уыд Гигуц, уымæн æмæ йын историон нысаниуæг ис.

1774 азы Ир Уæрæсеимæ куы иу кодта, уæд уыцы минæвæртты разамонджытæй иу уыдис Нараг, йæ рæстæгмæ гæсгæ ахуыргонд лæг, Мамиаты Хъарадзау. Уыцы фæндагыл ссардта йæ мæлæт дæр йæ рæзинаг хъæбул Бегиимæ.

Зæххъуаг, цыбыркъух уыдысты йæ ныййарджытæ Гигуцæн. Сæ хæдзаримæ се ´нæбары муртæ фесæфтой 1920 азы. Фæстæмæ æрыздæхтысты 1922 азы. Кæд æмæ кæд слæууыд хæдзар йæ къахыл, скъола дæр сæм нæ уыд æмæ Гигуц ахуыр кæнын райдыдта гуырдзиаг скъолайы. Æвзыгъд лæппу Гогебашвилийы «Деда ена»-имæ фæцалх Къостайы «Ирон фæндыр» кæсыныл æмæ нал ахауд йæ къухæй скъолайы дæр, педтехникумы дæр æмæ уæлдæр ахуыргæнæндоны дæр.

Гигуцæн, хъæууон лæппуйæн, царды ахуыры фæндæгтæ байгом кодта – нырма Цхинвалы ирон скъола, стæй педагогон техникум. Уым сæмбæлд, æмæ базонгæ Куымæридтаты Кима, Плиты Харитон, Тыбылты Алыксандр, Хъуылаты Сикъо, Тедеты Бетъре, Мамиты Димитр æмæ æндæр куырыхон адæймæгтимæ. Хорзæн мысыд кæддæриддæр йæ ирон ахуыргæнæг Санахъоты Пауле, йæ уырыссаг æвзаджы ахуыргæнæг Баранова – Плиты Евдокиайы.

Æвзонг лæппу ссис нæ пединституты студент. 1937 азы хабæрттæ йæ цæстыты раз цыдысты. Ахст æрцыд Тыбылты Алыксандр, скъæрæнты цыдысты иннæ фæсивæд дæр.Гигуцæн Мæскуымæ ацæуын йæ къухты нал бафтыд, йæхи аппæрста Бакомæ, райдыдта Азербайджаны университеты филологон факультеты ахуыр кæнын. Фæцахуыр дзы кодта иу аз, стæй раивта Тбилисы паддзахадон университетмæ. Ам йæ ахуыр ахæццæ кодта кæронмæ, 1941 азы каст фæцис филологон факультет.

Цард тæбæгъы донæй хъау-джыдæр нæу. Æвзонг лæппу йæ дипломыл дæр нæма бацин кодта, афтæмæй 22 июны райдыдта Стыр Фыдыбæстæйон хæст.

Гигуцы нырма арвыстой Аунеуы астæуккаг скъоламæ директорæй, акуыста рухсады хайады дæр, стæй æрвыст æрцыд хæцæг æфсады рæнхъытæм.

Бирæ дудгæбæттæ федта Гигуц хæсты уæззау бонты, 1944  азы фæцис уæззау цæф æмæ баззад сахъатджынæй. Къуылыхæй æрыздæхт йæ райгуырæн Ирыстонмæ, фæлæ йæхи нæ ауагъта. Ногæй та  бавнæлдта куыстмæ, ахуыры хъуыддæгтæм. Кусын райдыдта областы сæйраг библиотекæйы директорæй, уый фæстæ гуырдзийаг скъолайы уырыссаг æвзаджы ахуыргæнæгæй.

Цардбæллон лæппуйæн йæ зæрдæ дзырдта уæддæр йæ дарддæры ахуыримæ æмæ та сæххæст йæ бæллиц. 1953 азы ссис Тбилисы Яков Гогебашвилийы номыл педагогон зонæдты иртасæн институты аспирантурæйы аспирант. Каст æй фæцис 1956 азы.

1957 азы райдыдта кусын нæ пединституты, кастис лекцитæ уырыссаг æвзаг æмæ йæ амоныны методикæйæ, уыимæ дарддæр уæхскуæзæй куыста йæ диссертацийыл, йæ тыхтæ радта не скъолатæн ахуыргæнæн чингуытæ аразынмæ, литературон куыстмæ.

1958 азы уал фæзынд йæ фыццаг чиныг «Дамгъуат». Стыр разæнгардæй йыл сæмбæлдысты ныййарджытæ. Уый тынг фæрæуæг кодта сабиты къух. Йæ хæдфæстæ фæзынд йæ дыккаг чиныг – «Абетæ æмæ кæсыны чиныг фыццаг къласæн». Куыд Хуссар Иры, афтæ Къахет æмæ Гудзареты, Карелы районы ирон скъолаты райдиан кълæстæ сæйраджыдæр куыстой Гигуцы саразгæ чингуытæй.

Хæствæллад лæг ноджы фæныфсджындæр, 1952 азы Тбилисы Пушкины номыл паддзахадон пединституты æнтысджынæй йæ кандидатон диссертации куы бахъахъхъæдта, уæд. Йæ темæ уыд: «Ирон æвзаджы райдиан ахуыргæнæн чиныг саразыны принциптæ». Лæвæрд ын æрцыд кандидаты ном. Фæстæдæр нырма ссис доцент, стæй йын лæвæрд æрцыд профессоры ном дæр.

Гигуц уыдис ирон периодикон мыхуыры активон хайадисæг. Йæ методикон амындтытæ арæх мыхуыр кодта газет «Хурзæрин» («Советон Ирыстон») æмæ журнал «Фидиуæг»-ы. Дзæвгар зонадон уацтæ фæмыхуыр кодта пединституты зонадон уацты æмбырдгæндты. Активон хайад иста, куыд пединституты, афтæ областы æмæ республикæйы зонадон конференциты.

1960 азы пединституты баконд æрцыд райдиан ахуыры педагогикæ æмæ методикæйы факультет (РАПМФ). Йæ фыццаг разамонæгæй æвзæрст æрцыд Гигуц. Куыд кафедрæйы гæс, афтæ дæр, стæй пединституты царды кæддæриддæр иста активон хайад. Æнгом бастдзинæдтæ йын уыд Дзæуджыхъæуы, стæй уæд Тбилисы райдиан кълæсты факультеттимæ, арæх уагътой иумæйаг фембæлдтытæ.

Гигуц йæ тыхтæ фæлвæрдта литературон фадыджы дæр, фыста æмдзæвгæтæ, пьесæтæ. Йæ пьесæ «Гуырдзыстоны паддзæхтæ Тамар æмæ Сослан» баззад театры архивы. Цыдæр аххосæгтæм гæсгæ æвæрд не ´рцыд, кæд ын æмбæлон аргъгæнджытæ уыдис, уæддæр.

Уыдис ын æнтыстытæ скульп-турæйы фадыджы дæр. Зæрдæмæдзæугæ уыдысты – Ленин, Къоста æмæ Уасойы бюсттæ.

Гигуц нæ университетæн (пединститутæн) номы,  цыты лæг уыд. Æмбаргæ, рæвдаугæ хъомылгæнæг уыд. Скодта æнгом би-нонтæ, сарæзта рæсугъд аив хæдзар Фæскомцæдисы уынджы.

Рæхджы байгом уыдзысты нæ университеты ног бæстыхайы дуæрттæ. Алы факультет, алы кафедрæйæн дæр уыдзæн хуыздæр, рæсугъддæр уавæртæ –  фадæттæ æмæ уæд Гигуцы рæсугъд, уындджын сурæт дæр рарттивдзæн РАПМ факультеты кафедрæйы къулæй.

Плиты Гацыр, профессор

Comments are closed, but trackbacks and pingbacks are open.