ИНСПЕКЦИОН АЗЫЛД АРÆЗТЦÆУÆГ ОБЪЕКТТЫЛ

Ацы бонты нæ республикæмæ дыууæ боны æмгъуыдмæ кусæгон балцы æрцыд ХПÆ-йы бæстæтæ-хайадисджытæ, Республикæ Хуссар Ирыстон æмæ Республикæ Абхазмæ социалон-экономикон æмгуыстады фæдыл Уæрæсейы Федерацийы Президенты Управленийы хистæр Олег Говорун.

Цалынмæ горæтмæ не ‘рбахызт, уæдмæ уал уый бацымыдис кодта тахынæгтæ æмæ деликатесты æрдæгфабрикаттæ уадзæн ног куыстуат «Растдон»-ы куысты уавæртæм. Йемæ ма уыдысты РХИ-йы Хицауады Сæрдар Пухаты Эрик æмæ Арæзтады министр Зæгъойты Эдуард. Уыдон кусджыты баййæфтой сæ куысты тæрхджыты фарсмæ, продукци уадзгæйæ æмæ Олег Говорун федта, куыстуат нырыккон ифтонггæрзтæй куыд ифтонг у, уый. Æвæрд дзы æрцыдысты универсалон продукциуадзæн хæххытæ, кæцытыл уагъд цæуы дзидзайы гъæдджын продукци, куыд стуры, афтæ хуыйы æмæ фысы дзидзайæ дæр. Уый фæстæ адæй федтой заводы рауадзгæ продукци æмæ сæ зæрдæмæ тынг фæцыдис йæ хæрзгъæддзинадæй.

Горæтмæ æрцæугæйæ, Олег Говорун бацыдис нæ горæты центры арæзтцæуæг Сыгъдæг Æртæиууон аргъуаны арæзтадмæ. Ныртæккæ ам æххæст кæнынц мидæггагон куыстытæ  — сæрдынц къултæ, цæттæ кæнынц цæртты ахорæнæй сæрдынмæ. Куыст дзы цæуы, дзæнгæрджытæ кæм ауыгъд уыдзысты, уыцы æфсæн конструкцийы арæзтадыл. Аргъуанæн йæ иумæйаг фæзуат у 638 квадратон метры. Куысты процессимæ базонгæйы фæстæ Олег Говорун хорз аргъ скодта аргъуаны арæзтадæн.

Инвестицион программæмæ хаст  объекттыл зилгæйæ, Олег Говорун базонгæ ис, Хъайтарты уынджы кæрон арæзтцæуæг цæрæн хæдзæртты куыстытæ куыд цæуынц, уыимæ. Ам куыстытæ æххæст кæны подрядон организаци «СТМ-ЮГ». Арæзтады сæргълæууæг Коцты Олег куыд загъта, афтæмæй объекты арæзтад фæстейæ зайы графикæй, уыйразмæ йæ чи арæзта, уыдон рæстмæ кæй нæ куыстой, æмæ сæ куыстыты бирæ цухдзинæдтæ кæй уыдис, уый аххосæй. «Нæ бон куыд у, афтæ тындзæм куыстытыл, цæмæй рæстæгыл æххæст æрцæуой.  Ныртæккæ кæнæм мидæггагон куыстытæ. Уыцыиу рæстæджы кусæм хæдзæрттæм бахизæнты схæрзарæзт кæныныл дæр. Аив арæзт цæуынц хæдзæрттæн се ‘ддаг къултæ дæр, фæлæ нын проблемæ ис хъæрмаддæттæг пецтæ самал кæныны хъуыддаджы, уымæн æмæ сæ аргъ у 6 милуаны бæрц», — загъта Коцты Олег.

Олег Говорун, подрядчикмæ байхъусгæйæ ныфс бавæрдта, ацы проблемæмæ йæ хъусдард кæй аздахдзæнис, уымæй.

Октябры уынджы кæрон цы дыууæ фондзуæладзыгон хæдзæрттæ реконструкци кæныныл чи кусы, уыцы арæзтадон компани «Алфазар»-ы генералон директор Хъотайты Рутен Олег Говорунæн, объекттыл азылды хайадисджы-тæн ныфс бавæрдта, хæдзæрттæ рæстæгыл эксплуатацимæ лæвæрд кæй æрцæудзысты. «Дыууæ хæдзары дæр бакодтам сæйраг куыстытæ. Хатæнты къултæ цæттæ сты ахорынмæ æмæ сыл обойтæ бандадзынмæ, хатæнтæн сæ астæрдтæ дæр тагъд кæронмæ фæуыдзысты. Балхæдтам дуæрттæ дæр æмæ нæм куыддæр æрхæццæ уой, афтæ уыдон дæр æвæрд æрцæудзысты æмæ дыууæ хæдзары дæр ноябры мæйы кæрон лæвæрд æрцæудзысты эксплуатацимæ», — загъта Хъотайы фырт.

Олег Говорун азылд æмæ базонгæ ис, Сомихæгты æмæ Комаровы уынгты хæрзарæзтадон куыстытæ куыд цæуынц, уыдонимæ дæр.

КУСÆГОН ФЕМБÆЛД ПРЕЗИДЕНТМÆ

Арæзтадон объекттыл азилыны фæстæ РХИ-йы Президент Бибылты Анатоли йæхимæ райста Олег Говоруны.

Фембæлды ма хайад райстой РХИ-йы Хицауады Сæрдар Пухаты Эрик æмæ ХПÆ-йы паддзахадтæ — хайадисджытæ Республикæ Хуссар Ирыстон æмæ Республикæ Абхазимæ социалон-эконо-микон æмгуысткæнынады фæдыл Уæрæсейы Федерацийы Президенты Управленийы хистæры хæдивæг Денис Травин.

Уазджытæн раарфæ кæнгæйæ, Бибылты Анатоли бузныджы ныхæстæ загъта йæ уæрæсейаг коллегæтæн, афтæ Уæрæсейы Федерацийы разамынадæн, нæ республикæйы проблемæтæм сæ лæмбынæг æмæ иузæрдион ахасты тыххæй. Уыимæ ма банысан кодта, Хуссар Ирыстон йæхæдæг дæр кæй кусдзæн йæ экономикон рæзтыл, уæвæг мидæггагон ресурстæ мобилизаци кæнгæйæ.

Олег Говорун уый банымадта серьезон æмæ вазыгджын хæсыл æмæ банысан кодта, хæрзцыбыр рæстæгмæ кæй ис фыццаг æнтыстытæ. Республикæмæ уæлæмхас инвестицион фæрæзтæ æрбакæныныл дзургæйæ, уый банысан кодта, республикæйы цы æхсæз инвестпроекты реализаци цæуынц, уыдоны инвестициты гуырахст кæй хизы иу миллиард соммæ. Йæ ныхæстæм гæсгæ уый фадат ратдзæн уæлæмхас 300 кусæгон бынат саразынæн.

Олег Говорун радзырдта йе ‘рцыды нысаны тыххæй дæр. Уый, зæгъгæ, баст у, Инвестицион программæ куыд реализаци цæуы, уый фæдыл мониторинг ауадзын, æмбæлон хатдзæгтæ саразын æмæ куы хъæуа, уæд бæрæг корректировкæтæ бахæссын, афтæ ма æввахс рæстæджы Цхинвалы уагъд чи æрцæудзæн, уыцы Æхсæнхицауадон къамисы радон рабадтмæ бацæттæ кæнынимæ.

«Иумæйагæй сисгæйæ, нæ иумæйаг куысты радон этап — 2018-19 азтæн Инвестпрограммæ — дыууæ фарсæрдыгæй дæр æмразыгонд у, сæйрагдæр параметртæ нын зындгонд сты. Дыууæ азæн план цæуы фæрæзты фаг гуырахсттæ рахицæн кæнын, бюджеты проекты нысан ис 4 миллиард сомæй фылдæр. Уымæ гæсгæ иттæг ахсджиаг у, цæмæй алы сомæй дæр эффективонæй спайдачындæуа», — загъта Олег Говорун.

Фембæлды рæстæджы ма Олег Говорун æрдзырдта уæрæсейаг-хуссарирыстойнаг ахастыты æндæр аспектыл дæр, зæгъгæ, уæрæсейаг фарс бузныг у Хуссар Ирыстоны Президентæй, Уæрæсейы Федерациимæ интеграцион процесстæ дарддæр арфдæр кæныны политикæ кæй æххæст кæны, уый тых-хæй.Банысан кодта, зæгъгæ, «Уæрæсейы разамынадмæ дæ сæвзæрсты фæстæ ницы дызæрдыгдзинад æвзæрдис, кæй хæцдзынæ интеграцион, уыцы нымæцы Æмгуыстад æмæ интеграцийы тыххæй бадзырдимæ баст процесстæ æххæст кæныны политикæйы æвварс.

 

Æмæ афтæ дæр хъуамæ уа, уымæн æмæ дæ раздæры куысты, куыд Парламенты сæргълæууæг, афтæ дæр ды уыдтæ ахæм хъуыдыйыл лæуд æмæ дын ацы фарсты дæ фæдфæдылондзинадæн мах аргъ кæнæм».

Президент Бибылты Анатолиимæ фембæлды фæстæ уыдон бацыдысты драмон театры арæзтадмæ. Кусджытæн рæстæгыл сæ куыстмызд кæй нæ фидынц, уый тыххæй рахъаст кодтой бæстæйы сæргълæууæгæн. Президент карзæй бафæдзæхста, цæмæй сын сæ куыстмызд рæстæгыл фидой æмæ фæтагъддæр кæной сæ куысты темптæ, цы цухдзинæдтæ дзы ис, уыдон иуварс кæнгæйæ.

 

ДЗЫРД ЦЫДИС ИНВЕСТИЦИОН ПРОГРАММÆ КУЫД ÆХХÆСТ ЦÆУЫ, УЫЦЫ ФАРСТЫТЫЛ

Хуссар Ирыстоны социалон-эконо-микон рæзтæн ахъазгæнæг программæ 2015-2017 азтæн куыд æххæст цæуы, Æхсæнхицауадон къамисы радон ра-бадтмæ сæхи куыд хъуамæ бацæттæ кæной, уыцы æмæ æндæр арæзтадон фарстытыл дзырд цыдис министрадтæ, ведомствотæ æмæ æндæр подрядон организациты къухдариуæггæнджыти-мæ Президент Бибылты Анатоли цы æмбырд ауагъта, уым.

Æмбырды куысты хайад райста ХПÆ-йы бæстæтæ-хайадисджытæ, Рес-публикæ Хуссар Ирыстон æмæ Республикæ Абхазимæ социалон-экономикон æмгуыстады фæдыл Уæрæсейы Федерацийы Президенты Управленийы хистæр Олег Говорун дæр.

Æмбырды сæйрагдæр фарстытæй иу уыд 2015-2017 азтæн Инвестицион программæ куыд реализаци цæуы, уый.

«Мегаполис-Т»-йы генералон директор Джуссойты Къонстантин æрдзырдта рæуджыты низæй рынчынтæн диспансер куыд арæзт цæуы, уый фæдыл. Куыд фехъусын кодта, афтæмæй дзы куыстытæ сты сæ тæмæны. Арæзтады кусынц 25 адæймаджы. Ныртæккæ куыст цæуы инженерон хызæгтыл, мæйы кæронмæ план цæуы æппæт монтажон куыстытæ бакæнын æмæ объекты сæр сагъуындыныл.

Джуссойы фырт ма æрдзырдта ног университеты комплексы арæзтадыл. Куыд загъта, афтæмæй алы корпусы дæр æххæст æрцыдысты хицæн æмæ хицæн мидæггагон куыстытæ. Рæхджы æрæвналдзысты йе ‘ддаг хуыз ын срæсугъд кæнынмæ, афтæ ма йæ территори схæрзарæзт кæнынмæ дæр. Æппæт куыстытæ дæр æххæст æрцæудзысты октябры мæйы кæронмæ, загъта йæ раныхасы кæрон Джуссойты Константин.

Президент Бибылты Анатоли йæ рады банысан кодта, цæмæй объект бæрæг æмгъуыдтæм лæвæрд æрцæуа эксплуатацимæ, рæстæгыл ифтонг æрцæуа æнæмæнгхъæуæг хъæдын дзаумæттæй, цæмæй студенттæ æмæ ахуыргæнджытæн фадат уа университеты 85 азы юбилейон бæрæгбон ног-арæзт корпусы банысан кæнынæн.

Президент бацымыдис кодта арæзтадон куыстытæ Ленингоры районы цы уавæры сты, уымæ.

Ленингоры районы Паддзахадон унитарон куыстуат «Водоканал»-ы директор Зассеты Сергей куыд загъта, афтæмæй доны æмæ канализацион хæххытæ уадзыны куыстытæ æххæст цæуынц. «Чысыл нын проблемæтæ фæзынд, æрмæджытæ нын кæй нæ фаг кодта, уый тыххæй, фæлæ ныр уавæр рараст æмæ зæрдæдарæн ис æппæт канализацион æмæ доны хызæгтæ дæр арæзт кæй фæуыдзысты мæйы кæрон-мæ», — загъта Зассейы фырт.

Æмбырды ма дзырд цыд æндæр æмæ æндæр фарстытыл.

ÆМБЫРД ИНВЕСТИЦИОН ПРОЕКТТÆ ÆХХÆСТ КÆНЫНЫ ФАРСТЫТЫ ФÆДЫЛ

Дыккаг бон РХИ-йы Президент Бибылты Анатоли æмæ Хæдбар Паддзахадты Æмхæларады бæстæтимæ, Абхаз æмæ Хуссар Ирыстонимæ социалон-экномикон æмгуыстады фæдыл УФ-йы Президенты Упраленийы сæргълæууæг Олег Говорун ауадзгæ æмбырды æруынаффæ кодтой Республикæ Хуссар Ирыстоны инвестицион проектты фарстытыл. Æмбырды ма хайад райстой Хицауады Сæрдар Пухаты Эрик, Президенты Администрацийы къухдариуæггæнæг Козаты Игорь, Финансты министр Хæбæлаты Азæ, Экономикон рæзты министр Кокойты Геннади, Арæзтады, архитектурæйы æмæ цæрæнуатон-коммуналон хæдзарады министры хæстæ æххæстгæнæг Зæгъойты Эдуард, афтæ ма инвесторты минæвæрттæ.

Экономикон рæзты министр Кокойты Геннади банысан кодта, зæгъгæ, ныр-тæккæ реализацийы стадийы сты 6 егъау инвестицион проекты, уыдонæй дыууæ — кафе «Vincenco» æмæ дзидзагуыстгæнæн завод «Растдон» — ныридæ-гæн кусынц æххæст хъомысæй.

«Уымæй дарддæр ма цыппар проекты «Ирыстоны дыргъдæттæ», базарадон-хиирхæфсæн комплекс «Империал», æвджыты уагъд дон «Натурплант» æмæ базальтон тæгты кондад «Ирбазальт» сты цæттæдзинады алы уавæрты», — загъта министр.

Кокойты Геннади банысан кодта, зæгъгæ, инвестицитæ æххæссынц цардархайды алы фадгуытыл, æмæ уый та дзурæг у ахъуыдыгондæй сæм æвнæлд кæй цæуы, ууыл, æмæ ма йæ ныхасмæ бафтыдта, инвестициты иумæйаг аргъ кæй у 969 милуан сомы, æмæ ратдзысты 283 кусгæ бынаты саразыны фадат.

Уыимæ иумæ ма министр бафиппайдта, иуæй-иу проектты рауадзгæ продукци ныхдуртыл кæй æмбæлы республикæйæн æттейæ сæ уæй кæныны хъуыддажы.

«Дзидзагуыстгæнæн завод «Растдон» æййафы зындзинæдтæ проектон хъомысадмæ рахизыны хъуыддаджы  суткæйы 2,5 тоннæйы бæсты уадзы æрмæст 300 килограммы продукци. Ис ын зындзинæдтæ уæрæсейаг базармæ аирвæзыны хъуыддаджы, фæлæ заводы хъæуы бынæттон базары уæййæгтæ фæфылдæр кæнын», — загъта Кокойты Геннади.

Президент Бибылты Анатоли йæхи рады банысан кодта, республикæйы уагъдцæуæг продукцийæн сертификаттæ чи дæттид, ахæм сæрмагонд орган саразыны æнæмæнгдзинад.

Йæ ныхæстæм гæсгæ, проблемæ æвæрд æрцыди, хъæуы снысан кæнын адæймæгтæ, рæстæгыл æй аскъуыддзаг кæныны тыххæй бæрнджын чи уа. Президент Хъæууон хæдзарады министрæн радта дыууæ къуырийы æмгъуыд, цæмæй йæ дæлведомствойон организаци (Югосетсельхознадзор) рай-дайа йæ куыст.

«Сорганизаци кæнут командировкæ æмæ æрхонут специалистты консультациты сæраппонд, ис нын дыууæ къуырийы, цæмæй организаци скуса. Кæд бахъæуа, уæд ацы фарст аскъуыддзаггæнæн ис хицауады рабадты. Куыдфæнды ма уа, ацы фарст хъуамæ скъуыддзаг æрцæуа. Уый хъæуы канд «Растдон»ы æмæ иннæ куыстуæтты нæ, фæлæ хицæн адæймæгты дæр», — загъта Президент.

Æрæмбырдуæвджытæ ма уынаффæ кодтой инвестпроекттæ куыд æххæст цæуынц, ууыл. Дон æмæ базальтон тæгтæ уадзын райдайдзысты фидæн азы, уыдонимæ ма продукци рауадзынæй ныфс æвæрынц «Ирыстоны дыргъдæттæ» дæр. Базарадон-хиирхæфсæн комплекс, иневсторы ныхæстæм гæсгæ, кæронмæ арæзт фæуыдзæн ацы азы фæудмæ. Олег Говорун ма бацымыдис кодта, Уæрæсейы банктæй цы фæрæзтæ ист цæуы, уыдон афойнадыл истæуы, æви нæ, уымæ, æмæ бахатыд инвестортæм, цæмæй ацы фарстмæ аздахой сæрмагонд хъусдард, «Уавæр ма хъуамæ бакондæуа тыхстдзинадмæ».

Ныртæккæ иумæйагæй инвестпроекттæн рахицæнгонд æрцыд 1 миллиард сомы бæрц, фæлæ банктæн сæ бон цы у раттын, уый фылдæр у. 200 миллуан сомы бæрцмæ дзы бавналæн нæма ис.  Мах уыцы хъуыддаг рæстæгмæ æрурæдтам, цæмæй уал бакæсæм, цас æн-тыстджын уыдзысты проекттæ, уымæ. Нæ хъус адардзыстæм, æмæ кæд æппæт дæр рæстмæ уа, уæд уыцы фæрæзты дæр скусын кæндзыстæм, цæмæй инвестортæн уа кредиттæ райсыны уавæртæй спайда кæныны фадат», — загъта Олег Говорун.

Бестауты Валя

Comments are closed, but trackbacks and pingbacks are open.