Нæ горæты 2008 азæй фæстæмæ цы бирæнымæц арæзтадтæ сырæзт, уыдонæй иууыл ахадгæдæр æмæ фидыцджындæртæй сæ иу у хæрзаудæн фонд «Спорт сабырадæн»-ы фæрцы нæ республикæйы Алина Кабаевайы номыл спорткомплекс «Олимп». Ацы объект арæзт æрцыд Аивадон гимнастикæйæ абсолютон чемпионкæ, дыууæ хатты Дунейы чемпионкæ æмæ Европæйы фондз хатты чемпионкæ Алина Кабаевайы хъæппæрисæй. Ирыстонæн ахæм стыр лæвар бакæнын Алина Кабаева сфæнд кодта 2008 азы ав-густы хæсты фæстæ Хуссар Ирыстонмæ куы æрцыд æмæ горæты пырхæнтæ йæхи цæстæй куы федта, уæд. Пырх спортивон зал ахæм уавæры куы федта, уæд загъта «Ацы уæззау нывтæ фенгæйæ æз аскъуыддзаг кодтон, цæмæй балæууон Хуссар Ирыстоны цæрджыты фарсмæ æмæ сын Цхинвалы спортивон комплекс саразон» — дзырдта Алина Кабаева Цхинвалæй Мæскуымæ куы аздæхт, уæд Уæрæсейы централон каналтæй сæ иуы.

Арæзтад цыдæр аххосæгтæм гæсгæ ныддаргъ. Фæлæ ивгъуыд аз уый йæ дуæрттæ байгом кодта цытджын æгъдауæй. Ныр «Олимп»-ы уадзæнис ерыстæ. Зæрдæйæн æхцондзинад хæссы хореографион залы цы стыр кæсæнтæ æмæ цармæ рудзгуытæ ис, уыдон. Залы алыварс ис дарæсивæн хатæнтæ. Дыккаг уæладзыджы — дыууæ бассейны, сæ алыварс — трибунæтæ спортивон мадзæлттæм кæсджытæн. Хъæбысхæсты алы хуызæн дæр ис йæхи зал. Иууыл иумæ залтæ сты фараст. Алы залæн дæр — йæхи дарæсивæн хатæнтæ æмæ хинайæнтæ. Æртыккаг уæладзыджы та ис уазæгдон, цæмæй дзы цæрой, ерыстæм-иу цы спортсментæ æрцæуой сæ тренертимæ, уыдон. Ивгъуыд аз 10 октябры спорткомплекс гом куы цыд, уæд Алина Кабаева загъта: «Ахæм спортивон арæзтад нæй æгæрыстæмæй, Цæгат Кавказы дæр, фæстæ ницæмæй лæууы, Олимпион Сочийы арæзт чи æрцыд, уыцы спортивон комплекстæй».

«Олимп» бакæныны рæстæджы ма Алина Кабаева загъта «Мæн тынг фæнды, цæмæй ацы спортивон комплексæй рацæуой Европæйы, Дунейы æмæ олимпион хъазты чемпионтæ».

Рацыд рæстæг, фæлæ «Олимп» нæма скуыста. Мах фæуазæг стæм ацы спортивон комплексмæ, æмæ нын йæ аххосаджы тыххæй йæ директор Табуты Роберт афтæ загъта: «Алина Кабаевайы хæрзаудæн фонды фæрæзтæй арæзт Цхинвалы спортивон комплекс «Олимп» æххæст бæрцæй скусдзæн сентябры». Табуты Роберты ныхæстæм гæсгæ, спортивон объектæн цы юридикон цæсгом къухдариуæг кæндзæн, ууыл ныртæккæ фидаргонд цæуы паддзахадон исад æмæ уый фæстæ дзурæн уыдзæн спортивон тренировкæтæ райдайыныл.

Уыцы-иу рæстæджы ма скъуыддзаг цæуы, ам цы секцитæ архайдзæн, уыдонæн æнæмæнгхъæуæг инвентарь балхæныны фарст дæр. Уый куыд зæгъы, афтæмæй: «Тренертæ спорткомплексы къухдариуæгадæн æрбавдыстой, цух цы спортивон инвентарæй æййафынц, уыцы номхыгъд. Спортивон къордтæм сывæллæттæ ист цæудзысты сентябры мæймæ æввахс, уымæн æмæ сæрды спортылхæст адæймæгты нымæц вæййы къаддæр» — зæгъы «Олимп»-ы директор.

Нырмæ уал спорткомплексы тренировкæ кæнынц æрмæстдæр гимнасттæ. Уыдон раздæр тренировкæ кодтой спортивон скъолайы зæронд бæстыхайы. Æрæджы, 1 июны Сывæллæтты хъахъхъæныны боны цытæн хуссарирыстойнаг гимнасткæтæ райстой хайад аивадон гимнастикæйæ Мæскуыйы цæуæг хæрзаудæн фестиваль «Алина 2016»-йы.

Зæгъын хъæуы уый æмæ ахæм фестивалмæ аивадон гимнастикæйы федерацийы минæвæрттæ сæ хъомылгæнинæгтимæ хуынд æрцæуынц æрвылаз дæр.

«Мах фæнд кæнæм спортивон æмæ эстетикон гимнастикæйы, ленккæныны, боксы, уæззау атлетикæйы секцитæ бакæ-нын. Ис гæнæн æмæ нæм сæхи цæттæ кæной шахматисттæ дæр — ацы фарст кæронмæ скъуыддзаг нæма у» — зæгъы Табуты Роберт.

Уый банысан кодта, спорткомплексы къухдариуæгады раз кæй лæууы дыууæ нысан — «Спорткомплекс «Олимп»-ы бæстыхайæ хъуамæ хизой фидæны чемпионтæ. Уыимæ иумæ ма сæ фæнды, цæмæй спортыл хæст уой, гæнæнуæвгæйæ фылдæр сывæллæттæ. Спорт, æнæниз цардуаг хъуамæ уой æнцонва-дат» — ахæм у Табуты Роберты хъуыды.

«Банысангонд нывæзт сæххæст кæ-нынæн бахъæудзæн уæлæмхас финанстæ агурын», — загъта спорткомплексы директор.

Йæ ныхæстæм гæсгæ Паддзахадон бюджеты ныридæгæн æвæрд ис фæрæзтæ, цæмæй «Олимп» скуса. Фæлæ цæмæй комплекс æнтыстджын куыст кæна æмæ бæрзонд фæстиуджытæ йæ къухы æфтой, уый тыххæй сæ бахъæудзæн ноджы уæлæмхас финансон фæрæзтæ агурын.

Спорткомплексы  ис  бирæ  техникон згъуыдтæ, кæцытæ Табуты Роберты ныхæстæм гæсгæ скъуыддзаг хъæуы фыццаг рады

Спорткомплексы бæстыхай эксплуатацимæ лæвæрд æрцыд æрæджы æмæ хъæуы сбæлвырд кæнын æппæт системæты куыст, цæмæй тренировкæты процессы райдайæнмæ алцыдæр куса, куыд æмбæлы, афтæ. Уыдæттæ иууылдæр тагъд æрцæудзысты скъуыддзаг.

«Олимп»-ы кусдзысты фæлтæрдджын тренертæ, кæцытæ бацæттæ кодтой бирæ зындгонд спортсменты. Ныртæккæ спорткомплексы кусынц 82 кусæджы.

Уазæгты Марфа

Comments are closed, but trackbacks and pingbacks are open.