Хицауады Сæрдар Пухаты Эрик ауагъта Хицауады æнæрадон æмбырд, цыран, сæйраджыдæр, уынаффæ цыд Уæрæсейы Федераци æмæ Хуссар Ирыстоны ‘хсæн социалон-экономикон æмкуысткæнынады ахæм фарстыты фæдыл, кæцытæ баст сты Æхсæнхицауадон къамисы развæлгъау рабадты боны фæткы фарстатимæ.

«Мидхъуыддæгты органты службæгæнджыты æмæ сæ бинонты пенсион ифтонгады тыххæй, «РХИ-йы Законмæ ивындзинæдтæ бахæссыны тыххæй» закъоны проект æххæст цæуы республикæйы закъондæттынадмæ гæсгæ, «Мидхъуыддæгты органты кусджыты æмæ сæ бинонты пенсийæ ифтонг кæныны фæткы тыххæй» Хуссар Ирыстон æмæ Уæрæсейы ‘хсæн Сразыдзинады 11-æм уацы «б» пункты нысан куыд у, афтæ.

Мидхъуыддæгты министр Наниты Игоры докладмæ гæсгæ, уыцы ивындзинæдты руаджы фæфылдæр уыдзысты, æмхæццæ куысты азты сгуыхтдзинад кæмæн ис æмæ мидхъуыддæгты органтæй сæрибар чи æрцыд, уыцы  адæймæгтæ, æмæ æрхаудзысты, раздæр Уæлвæткон уавæрты министрады, Æфхæрдтæ æххæстнæнæн управленийы, Паддзахадон таможнæйон комитеты, Контролон-нымайæн палатæйы, Хъалонисæн полицийы раздæр чи службæ кодта, афтæ ма прокуратурæ æмæ тæрхондоны органты чи куыста, уыцы æмбæстæгтæм.

«Ацы закъоны проекты райсты, Республикæ Хуссар Ирыстоны нормативон документтæм цыфæндыгъуызон ивындзинæдтæ бахæссыны тыххæй нæ хъæуы уæлæмхас финансон хæрдзтæ», — бамбарын кодта Наниты Игорь.

Дарддæр Хицауады уæнгтæ æркастысты æмæ сфидар кодтой Экономикон рæзты министр Кокойты Геннадийы фæндон, кæцы хауы, хъæрмадон энергийы равзæрдæн стæй газы æмæ электроэнергийы хæрдзты хыгъды амæттæм, афтæ ма хызæгтыл транспортировкæйы рæстæджы техникон æгъдауæй газ, электроэнерги æмæ донæй цы фæхъæуы, уыцы хайы уæзы нормæты фæтк сбæрæг кæнынмæ.

Юстицийы министр Лалыты Залинæ фæндон бахаста «Республикæ Хуссар Ирыстоны паддзахадон хицауиуæгады æххæстгæнæн органты нормативон-барадон акттæ æмæ сæ паддзахадон регистрацитæ бацæттæ кæныны фæткойтæ сфидар кæныны тыххæй» РХИ-йы Хицауады уынаффæмæ ивындзинæдтæ бахæссыны тыххæй» закъоны проектмæ.

«Уымæ гæсгæ, дзыллон информацион фæрæзты рæстæгыл æмæ æххæстæй ныммыхуыргæнæн ис, закъондæттынадон акттæ иууыл нæ, фæлæ сæйраджыдæр дæлведомствойон акттæн. Президент Бибылты Анатолийы барамындæй бар лæвæрд æрцыд Юстицийы министрадæн йæхи бюллетень рауадзыны тыххæй, цыран нысан æрцæудзысты республикæйы райстæрцæуæг закъæттæ æмæ нормативон акттæ. Афтæмæй уыдон развæлгъау æмгъуыдмæ райсдзысты юридикон тых æмæ семæ базонгæ уæвыны тыххæй уыдзысты хæрзвадат», — бамбарын кодта Лалыты Залинæ.

Кæронбæттæны уынаффæ цыд паддзахадон унитарон куыстуат «Арæзтадон æрмæджыты завод»-ы реорганизацийы фарстыл, æндæр паддзахадон унитарон куыстуат завод «Эмальпровод»-ы  баиу кæныны хуызы. Фылдæр хъæлæсты райстæй, ацы фарст нымад æрцыд хорзыл.

Пухаты Эрикы ныхæстæм гæсгæ, уый у иууыл оптималондæр вариант.

«Реорганизацийы руаджы Арæзтадон æрмæджыты завод йæхимæ райсдзæн куыстмызды хæстæ бафидыны фæдыл æппæт хæслæвæрдтæ, афтæ ма аиуварс кæндзæн «Эмальпровод»-æн, ныппаплойтæ тæссагдзинад», — банысан кодта Хицауады Сæрдар.

Comments are closed, but trackbacks and pingbacks are open.