ФÆЗЫНДЗЫСТЫ ТА ФÆЛЛОЙЫ ХЪÆБАТЫРТÆ
Хистæр кары адæмæй чи нæ хъуыды кæны Советон дуджы кадджындæр хæрзиу-джытæй иу “Социалистон куысты хъæбатыр”. Уымæй йæ рæстæджы хорзæхджын æрцыдысты Советон цардаразджытæй бирæтæ, цардуаджы алы къабазы фыдыбæстæйæн æнувыд лæггад чи фæкодта, хъазуатон куысты йæхицæн кад æмæ ном чи скодта, ахæмтæ. Ацы кадджын хæрзиуæджы аккаг систы Ирыстоны дæр бирæтæ. Уыдонимæ зындгонд нартхоргуыстгæнæг Æлбегаты Харитон, заводы кусæг Битеты Ева, ахуыргæнæг Кокайты Саламджери, æфсæнвæндаджы кусæг Лазарты Аслæнбег, ихсæттæг нау “Арктика”-йы капитан Кучиты Юри æмæ æндæртæ. Æдæппæт 43 адæймаджы.
Советон заманы фæзминаг миниуджытæ цæмæй ма ферох уой, адæм фæллой кæнынмæ тырной, уый тыххæй нæ республикæйы Сæргълæууæг Битарты Вячеслав РЦИ-Аланийы Парламенты æмбырдмæ цы цалдæр законы проект бавдыста, уыдонæй иу у “О государственных наградах РСО-А”. Уый фæлгæтты республикæйы разамонæджы зæрды ис сног кæнын кадджын хæрзиуæг “Герой труда Республики Северная Осетия-Алания”. Уый лæвæрд цæудзæн бирæ азты фæллойадон æнтыстыты тыххæй, республикæйы экономикон, социалон-культурон рæзтмæ стыр хайбавæрд чи бахаста, уыдонæн. Ахæм хæрзиуæгимæ лæвæрд цæудзæн æхцайы преми дæр.
Ног закъоны проекты сæрыл рахæцыдысты депутаттæн сæ фылдæр.
Нæ уацхæссæг
Comments are closed, but trackbacks and pingbacks are open.