Паддзахады хъысмæт фæзуаты скъуыддзаггæнгæ нæу

Мӕнӕн Хуыцау стыр зонд ӕмӕ ахуырдзинад нӕ радта, мӕхицӕн политикон фарстатӕ скъуыддзаг кӕныны бар нӕ дӕттын, фӕлӕ куыд хуымӕтӕджы ӕмбӕстаг, афтӕ мын ӕй исчи куы бамбарын кӕнид: цы ныл ӕрцыд, кӕрӕдзимӕ знаджы цӕстӕй цӕмӕн акастыстӕм?

Дзабиты мыггагыл, номхуындӕй Иналы бинонтыл цы уӕззау хабар ӕрцыд, ууыл алчи дӕр фӕрыст, алы адӕймаг дӕр ӕй афтӕ айста, цыма йӕхи зӕрдиӕгтыл ӕрцыд ахӕм ӕнамонд хабар. Фӕлӕ йыл цӕмӕннӕ сӕттӕм, кӕйдӕр ӕнамонддзинадӕй чидӕртӕ пайда кӕй кӕнынц, уый бонӕй-бон ӕргомдӕр кӕй кӕны, ууыл?

Уыцы фыдбылызы хабар кӕйдӕриддӕр къухӕй ӕрцыд, уыдонӕн Иналы мӕгуыр уды тӕригъӕд баззайӕд, Хуыцау сын ӕй ма ныббарӕд, фӕлӕ иннӕтӕ та цы кодтой? Куыд мӕ хъуамӕ бауырна, уыцы мӕгуыр лӕппуйы нады хабары нӕ милицийы кусджытӕ иууылдӕр аххосджын сты, уый?! Фӕлӕ фӕйнӕрдӕм куы айхъусай, уӕд ӕлгъитынц алкӕй дӕр, раст чи у ӕмӕ зылын чи у, уымӕ ничиуал кӕсы. Аххосджын чи нӕу, уыдоны мӕдтыл дӕр ма ахъуыды кӕнӕм, кӕмӕн уыдзӕн ӕхсызгон ӕмӕ дын исчи дӕ хъӕбулы ӕнӕхъуаджы ӕфхӕра, фыдгӕнджытимӕ дын ӕй иумӕ ӕлгъитой…

Гуырдзы нӕ куы цагътой, уӕд ӕнгомдӕр уыдыстӕм, кӕрӕдзи хуыздӕр ӕмбӕрстам. Ирыстоны чи хъахъхъӕдта, уыдонимӕ уыдысты, абон нӕ милицийы чи кусы, уыдонӕн сӕ фылдӕр хай. Ома, уӕд нын бӕззыдысты, йеныр иууылдӕр ӕвзӕр сты? Ӕвзӕртӕ ӕмӕ хӕрзтӕ алкуы дӕр ис, фӕлӕ рӕстдзинад ӕмӕ Хуыцауы фыдӕхӕй ничиуал тӕрсы. Кӕд исчи фыдракӕнд сарӕзта, уӕд хъуамӕ дзуапп радта, закъоны куыддӕриддӕр фыст ис, афтӕ, фӕлӕ афтӕ дзурыны бар никӕмӕн ис: «нӕ милици адӕмы цӕгъдынц», «нӕ милици адӕмы знӕгтӕ сты» ӕмӕ афтӕ дарддӕр.

Ахӕм уавӕры ис абон нӕ бӕстӕйы президент Бибылы фырт дӕр. Ныры онг ӕндӕр ницы хъуыстон: «Афтӕ сарӕзта», «уымӕн баххуыс кодта», «уый хос кӕнынмӕ арвыста», «уымӕн уый балхӕдта…». Ныр уый дӕр адӕмы знагӕй равдисыныл архайынц иуӕй-иу политиктӕ. Цӕмӕн? Уый тынг фӕндыд, цӕмӕй йӕ рӕстӕджы, ома, президент цы рӕстӕджы у, уыцы рӕстӕджы ахӕм исты ӕрцыдаид? Кӕд мӕ фӕрсут, уӕд уымӕй зындӕр никӕмӕн уыд ацы ӕнамонддзинад. Уыцы зӕрдӕрыст бинонтӕн йӕхи зӕрдӕриссӕг чи скодта, уыдонӕй алкӕй уыдоны мӕт нӕй, уыдонӕй чи хъыг у ныры къухдӕриуӕгадмӕ ӕмӕ мастисӕн кӕны, чи та йӕхицӕн адӕмы хорзӕх агуры. Фӕлӕ афтӕ дӕр мачи хъуыды кӕнӕд, ӕмӕ адӕм, ӕцӕгӕйдӕр, куырм сты, хорз ӕмӕ ӕвзӕр хицӕн кӕнын нӕ зонынц. Мах ацы зӕххыл абон не ‘рцардыстӕм. Max нымӕцӕй афтӕ бирӕ не стӕм ӕмӕ кӕрӕдзи ма зонӕм. Алчи дӕр уыны ӕмӕ зоны, Бибылты лӕппу цы сарӕзта ӕмӕ аразы, уый дӕр, ӕмӕ йӕ ӕнӕхъуаджы чи ӕфхӕры, уыдон цы сарӕзтой ӕмӕ аразынц, уыдӕттӕ дӕр. Ахӕм диссаг ма искуы ӕрцыд: уый ӕмӕ, дам, уыйы, йӕ бынатӕй сис, кӕннод, дам куыстмӕ нӕ цӕуӕм… Уый та куыд? Президентæн ис йӕхи куыст ӕмӕ йӕхи хӕстӕ. Адӕм ӕй равзӕрстой, уый адӕмы номӕй кусы. Исын кӕй хъӕуы ӕмӕ кӕй нӕ хъӕуы, уый аскъуыддзагкӕнынхъом куынӕ уаид, уӕд ыл адӕм нӕ баууӕндыдаиккой ӕмӕ йын хъӕлӕс нӕ радтаиккой. Стӕй искӕй йӕ бынатӕй исы ӕви нӕ исы, уый искӕй куыст ӕмӕ хӕстӕм цы бар дары. Алчи дӕр хӕсджын у ӕмӕ йӕ куыст ӕххӕст кӕна. Иугӕр кӕм кусы, уым мызд исы, уӕд хъуамӕ кусгӕ дӕр кӕна. Уый йедтӕмӕ куыд цӕуы: президент кӕйдӕрты коммӕ нӕ кӕсы, кӕй коммӕ нӕ кӕсы, уыдон тӕргай кӕй кӕнынц ӕмӕ сӕ куыст, сӕ хӕстӕ кӕй не ххӕст кӕнынц, уый тыххӕй мӕгуыр адӕм цӕмӕн хъуамӕ тыхсой, зындзинӕдтыл цӕмӕн хъуамӕ ӕмбӕлой? Кусын кӕй нӕ фӕнды, уый йӕ куыст ныууадзӕд, цӕмӕй адӕм сӕ бон зоной, ӕмӕ мацӕмӕ ӕнхъӕлмӕ кӕсой.

Чидӕр йӕ тӕргӕйттӕ ӕвдисы, уый тыххӕй уӕззау рынчынтӕн хостӕ цӕмӕннӕ хъуамӕ уа, мӕгуыр адӕймаг йӕ мызд ӕмӕ йӕ пенси рӕстӕгыл цӕмӕннӕ хъуамӕ райса? Фӕлӕ, мӕрдты дзӕнӕты бадӕнт нӕ фыдӕлтӕ, раст уыдысты, афтӕ кӕй дзырдтой, уымӕй: ӕфсӕст, дам, ӕххормаджы рыст не ʻнкъары.

Кæмæндæрты хорз цӕуы: кусгӕ ма кӕн, афтӕмӕй стыр мызд ис, паддзахадон хатыртӕй пайда кӕн, зынаргъ машинӕйыл дӕ хӕдзары, дӕ бинонты хъуыддӕгтӕ араз! Иу ма та дзы цӕсгом хуыйны!

Ӕмӕ афтӕмӕй дӕ риу хой ӕмӕ адӕм-адӕм хъӕр кӕн… Цыма сыл адӕмы мӕтӕй хуыссӕг дӕр нӕ хӕцы, сӕхи афтӕ ӕвдисынц, фӕлӕ сӕ хъуамӕ рох ма уа, адӕм тынг хорз дӕр кӕй уынынц, чи куыд ӕмӕ цӕмӕй цӕры, уый. Фӕлӕ афтӕ у, хицауады рдыгӕй лӕмӕгъдзинад чи фӕхаты, уыдон сӕ сӕртыл ӕгӕр схӕцынц, сӕхи ацы зӕххыл цӕрджытӕ нал фенхъӕлынц.

Афтӕ чи хъӕр кӕны, адӕмы Бибылты Анатоли нал хъӕуы, куыд къухдариуӕггӕнӕг, афтӕ, уыдон нырма хъуамӕ ахъуыды кӕной ууыл, президент фӕзуаты ӕвзӕрст кӕй не рцыд, адӕм ын кӕй радтой хъӕлӕс. Ӕмӕ адӕмы хъӕуы ӕви нӕ, уымӕн сбӕрӕггӕнӕн ис ӕрмӕстдӕр хъӕлӕс дӕттыны рӕстӕджы.

Нӕмыны, марыны бар никӕмӕн ис, ӕгӕрыстӕмӕй знаджы хъӕбулӕн дӕр. Фӕлӕ уый бар дӕр никӕмӕн ис, цӕмӕй адӕмы ӕвзӕрст президентӕй дома отставкӕйы ацӕуын, фидистӕ йын кӕна, йӕ хъӕбулты йын ӕлгъита, уӕлдайдӕр, уыцы хъӕбултӕ куы ницы аххосджын уой уӕд.

Цымӕ уӕм куыд кӕсы, абон нӕм цытӕ цӕуы, уы-дӕтты тыххӕй ныл не знӕгтӕ сӕ къах нӕ къуырынц, нӕхи сӕ фӕндиаг нӕ кӕнӕм?..

ТЕДЕТЫ Аминӕт