Нæ ирон дзыллæйæн фыдæлтæй баззад зарын, кафын, музыкалон инструменттыл цæгъдын. Аивадæн рагæй фæстæмæ стыр нысаниуæг ис не ‘рвылбонон царды дæр.  Ирæттæм уæлдай ахадындзинад кæддæриддæр уыд хъайтарон, патриотикон зарæгæн. Уый адæймаджы миддунейы цырын кæны Райгуырæн бæстæмæ уарзты æнкъарæнтæ, рæзгæ фæлтæры зæрдæты та биноныг кæны дзыллæйы хъайтартæн, Фыдыбæстæйы хъæбатырты сгуыхтдзинæдтæн кад æмæ цыт кæныны æууæлтæ.

Раст уый тыххæй нæ республикæйы æрвылаз дæр уагъд æрцæуы алыгъуызон конкурстæ æмæ фестивалтæ. Ацы æнæмæнгхъæуæг мадзæлтты раргом вæййынц нæ фæси-вæды курдиат, æвзыгъддзинад, сценæйыл ралæууыны дæсныйад æмæ сæ цæттæдзинады æмвæзад.

Ивгъуыд къуыри нæ республикæйы фæлгæтты Хуссар Ирыстоны Ахуырад æмæ зонады министрады хъæппæрисæй ауагъдæуыд патриотикон зарæджы IV фестиваль «Песни, рождённые сердцем», зæгъгæ, ахæм номимæ. Фестивалы хайад райстой астæуккаг скъолаты хорты коллективтæ нæ бæстæйы алы къуымæй дæр.  Патриотикон зарæджы фестиваль дих уыд дыууæ этапыл: 24 октябрæй 28 октябрмæ – Фестивалы æвзарæн тур бынæтты æмæ конкурсон бон – 3 ноябрь.

Фестиваль ауадзыны тыххæй развæлгъау æвзæрст æрцыд оргкомитет, йæ сæргъ  РХИ-йы ахуырад æмæ зонады министры фыццаг хæдивæг Гаглойты Элисæ. Къамис сфидар кодта банысангонд мадзал ауадзыны фæдыл сæрмагонд нывæзт. Уымæ гæсгæ сæхи бацæттæ кодтой скъолаты хоры коллективтæ. Уый тыххæй йæ хъуыдытæ зæгъы министрады уæлæмхас ахуырад æмæ хъомылады хайады гæс Джиоты Эльзæ:

–  Стыр æхсызгонæй банысан кæндзынæн, сывæллæттæ азæй-аз тынгдæр кæй тырнынц ахæм фестивалты æмæ конкурсты хайад райсынмæ. Райдианы нæ сæйраг хæс уыд, цæмæй алы скъолайы дæр, раздæрау, уæвынад кодтаид хоры коллектив. Хор бынтон æндæргъуызон æндавы ахуырдзаутыл.

Фыдæлтæй махæн баззад хорз традицитæ. Уыдонæй иу у хоры зард. Ахæм фестивалтæ сывæллæтты зæрдæты гуырын кæнынц Райгуырæн бæстæмæ патриотикон æнкъа-рæнтæ, æвæрццагæй æндавынц æмткæй ахуыры процессыл, фылдæрбæрцæй раргом вæййы се сфæлдыстадон курдиат, ахъаз сты монон-патриотикон хъомылады рæзтæн. Кæй зæгъын æй хъæуы, хъуамæ хынцыд цæуой дуджы домæнтæ дæр.

Стыр бузныг мæ фæнды зæгъын скъолаты директортæн, хоры къухдариуæггæнджытæн, музыкæйы ахуыргæнджытæн, афтæ хорз кæй бакуыстой сывæллæттимæ, уый тыххæй. Бирæ хорз фæндтæ нын ис дарддæр дæр. Тагъд уыдзæн кафджыты къордты ‘хсæн конкурс дæр. Хорз уаид, хуыздæр сæххæстгонд зарджытæй дæр æмæ кæфтытæй дæр саразын иу концертон программæ æмæ йæ  равдисын нæ республикæйы районты, дæрддаг хъæуты. Æцæг нын транспорты хъуыддаг стыр проблемон вæййы. Арæх мæ зæрдыл æрбалæууы «Ирон хъайтарон зарджыты» фестиваль дæр. Хъæуы бацархайын, цæмæй уый дæр æрвылаз уагъд цæуа.

Кæцыфæнды ерысты дæр вæййы компетентон тæрхонгæнджытæ. Патриотикон зарæджы фестивалы жюрийы сæргълæууæг,  горæт Цхинвалы №2 музыкалон скъолайы директор Æлборты Дианæ дæр æппæт амæлттæй архайдта, цæмæй алы коллективы зардæн дæр æмбæлон æмæ объективон аргъ скæной. Жюрийы сконды ма уыдысты: Плиты Заирæ, Магкеты Маринæ (Аивæдты лицей), Дзигойты Маринæ (Сывæллæтты сфæлдыстадон галуан), Яралова Марина (№2 музыкалон скъола). Скъолаты хоры коллективты цæттæдзинад æмæ сæ къухдариуæггæнджыты бакæнгæ куыстæй барухс сты канд жюрийы уæнгты зæрдæтæ нæ, фæлæ райзæрдæйæ баззадысты,  чидæриддæр ацы цымыдисон мадзалмæ æрбацыд, уыдон се ‘ппæт дæр. Ахуырдзаутимæ цæстуарзон куыст бакодтой Къæбысты Аидæ, Гæззаты Маринæ, Козаты Маринæ, Габуты Дианæ, Остъаты Олеся, Бежанты Мадинæ, Гатыгкоты Дианæ æмæ Хъуылымбегты Даянæ æмæ сæ дæлбаруæвæг коллективтæ æнтыстджынæй ахызтысты гала-концертмæ. Фестивалы фæстаг бон ма концертон программæ сæ рæсугъд зардæй барæсугъд кодтой æрыгон зарæггæнджытæ Плиты Олег, Плиты Ланæ æмæ Хъоцыты Беллæ.

Фестивалы хайадисджытæ уæлахизмæ куыд тырныдтой, уый бæрæг уыд сæ æрттивгæ цæстæнгасæй: кæрæдзийæн ныфсытæ æвæрдтой, репетицитæм цыдысты æвæстиатæй, цингæнгæйæ, æдзынæгæй-иу кастысты сæ къухдари-уæггæнæджы алы змæлдмæ дæр. Кæй зæгъын æй хъæуы, гала-концертмæ хуыздæр цæттæйæ æрбацыдысты хоры коллективтæ, сæ зард бынтон æндæр зæлтæй хъуыст сценæйæ, ныр уæлдай рæсугъд æмæ хæрзконд уыдысты, фæлæ ерыс ерыс у æмæ дзы æнæмæнг дæр хъуамæ уа уæлахиздзау.

Концерты амонæг РХИ-йы сгуыхт артисткæ Хуыгаты Альбинæ сценæмæ фæхуыдта Республикæ Хуссар Ирыстоны ахуырад æмæ зонады министры фыццаг хæдивæг Гаглойты Элисæйæ æмæ фестивалы жюрийы сæргълæууæг Æлборты Дианæйы. Ныхасы бар лæвæрд æрцыд Гаглойты Элисæйæн:

– Стыр бузныг зæгъын, чидæриддæр ацы фестивалы хайад райста, уыдонæн. Ахсджиаг у, ахæм фадæттæ нын кæй ис, сывæллæттæ афтæ кæй тырнынц аивадмæ. Алы скъолайы дæр ныридæгæн ис хоры коллектив.    Хъыгагæн, кæцыдыр скъолатæ ацы аз фестивалмæ не ‘рцыдысты бæрæг аххосæгтæм гæсгæ, фæлæ мæн фидарæй уырны, фидæнмæ кæй бацæттæ кæндзысты æмæ хайад кæй райсдзысты конкурсы. Раст у, абон чидæр фæхъыг уыдзæн, чидæр та тынг фæцин кæндзæн йæ æнтыстыл, фæлæ сæйраг уæлахиз нæу, сæйраг у хайад райсын. Æхсызгонæй банысан кæндзынæн, Знауыры æмæ Дзауы районты скъолатæ фестивалы хайад кæй райстой, уый æмæ нын сæ ралæудæй кæй барухс кодтой нæ зæрдæтæ.  Абон ам цыдæриддæр ахуырдзауты уынæм, уыдон сæ Райгуырæн бæстæ уæлдай уарзт кæнынц, ахæм фестивалты уæлдай ирддæрæй разыны сæ курдиат. Хæсты арф фæд цадæггай сæфы нæ зæххæй,  Хуссар Ирыстон æндидзы бонæй-бон, фæлæ нæ истори, æрцæугæ трагикон цаутæн рохгæнæн нæй. Хъуамæ хъуыды кæнæм нæ хъайтарты, Фы-дыбæстæйы сæрибардзинадыл тохгæнджыты. Ацы ма-дзæлттæ дæр уыцы нысанæн цæуынц уагъд арæх.

Уый фæстæ раныхас кодта  Æлборты Дианæ. Уый банысан кодта, йæ зæрдæмæ алы коллективы ралæуд дæр кæй фæцыд, азæй-аз сæ профессионалон æмвæзад кæй бæр-зонддæр кæны. Æлборы чызг ма арфæйы ныхæстæ загъта фестивалы организатортæн, скъолаты хоры коллективты къухдариуæггæнджытæн.

Фестиваль «Песни, рождённые сердцем»-ы уæлахиздзау сси нæ горæты №5 астæуккаг скъолайы хоры коллектив, йæ къухдариуæггæнæг Гæззаты Маринæ. Дыккаг бынат саккаг кодтой №2 астæуккаг скъолайы хоры коллективæн, йæ къухдариуæгæнæг Къæбысты Аидæ æмæ æртыккаг бынат та бацахста горæт Цхинвалы скъола-интернаты хор, йæ къухдариуæггæнæг Остъаты Олеся. Фестивалы уæлахиздзаутæ хорзæхджын æрцыдысты зæрдылдарæн лæвæрттæй дæр. Банысан кæнын хъæуы, скъола-интернат активон хайад кæй фæисы Республикæйы уагъдцæуæг кæцыфæнды конкурсы æмæ фестивалы дæр. Ныр дæр сæ ралæуд уыд иттæг хорз, сæ солисткæтæ Гæбæраты Аринæ æмæ Индирæ дыууæ хъæлæсæй зарыдысты æппæты хуыздæр, фæлæ Остъаты Олеся æмæ аккомпониатор Джиоты Люба сæхæдæг куыд зæгъынц, уымæ гæсгæ сæ хоримæ хъæуы хуыздæр бакусын.

Хоры коллективты къухдариуæггæнджытæ кæд уæхскуæ-зæй æмæ цæстуарзонæй кусынц сывæллæттимæ, уæддæр ма хынцын хъæуы иу хъуыддаг: ахуырдзаутæй иутæ скъола фæвæййынц æмæ ацæуынц, æрбацæуынц æндæртæ, алчи иугъуызон не ‘мбары зарæджы, музыкæйы сусæгдзинæдтæ æмæ уымæ гæсгæ куыст хатт йæ бынатæй нæ феггуырсы, кæд ахуыргæнджытæ æвæллайгæйæ архайынц, уæддæр.

Ахæм мадзæлттæ ахъаз сты хорз рæзгæ фæлтæр схъомыл кæнынæн. Патриотикон хъомылады райрæзт кæддæриддæр æмдзу кæны дзыллæйы, паддзахады размæцыдимæ, уымæн æмæ абоны сабитæ сты нæ сомбоны царды барджын хицæуттæ.

Нæ уацх.

Comments are closed, but trackbacks and pingbacks are open.