Чиныг у рухс цардмæ фæндагамонæг, — ахæм хъуыдыйыл хæст сты адæм. Цард цæуы, æмæ дуг йемæ хæссы алыгъуызон ивындзинæдтæ. Уыдон бандæвтой æхсæнадон иумæйаг цардыл, адæмы зондахастыл, культурæйыл æмæ æндæр ахæмтыл. Цадæггай адæмæн сæ цымыдис къаддæр кæны чиныгмæ дæр, уæлдайдæр та аивадон литературæмæ. Куыд æй зонæм, афтæмæй та литературæ у царды айдæн. Хъыгагæн, фæсивæд дæр уæлæнгай цæстæй кæй райдыдта кæсын аивадон литературæмæ, уый мæгуырауæрдæм æндавы сæ эстетикон хъомыладыл. Уымæ гæсгæ нын нæ фысджытæ нæ мадæлон æвзагыл цы мидисджын уацмыстæ балæвар кæнынц, уыдон хъæуы кæсын æмæ ахуыр кæнын, цæмæй не ’взаг ноджы кæна тыхджындæр æмæ аивдæр.
Бирæ азты дæргъы нæ мадæлон æвзагыл чингуыты рауагъд зынгæ кæй фæкъаддæр, уый та дзурæг у, нæ республикæ уæззау царды уавæрты кæй уыдис, ууыл. Фæлæ нæ цард размæ цæуын куы райдыдта, уæдæй фæстæмæ фæхатæн ис, æмæ нæ чингуыты рауагъдæдтæ арæхдæр кæй рауадзынц нырыккон фысджыты уацмыстæ, æмæ уымæй барухс кæнынц нæ чысылнымæц чиныгкæсджыты зæрдæтæ.
19 июлы Мыхуыры хæдзары Дунеон пресс-центры уагъд æрцыдис презентаци, фæстаг рæстæджы цы чингуытæ мыхуыр æрцыдысты, уыдонæй æртæйæн: Нартыхты Григолы «Равзаргæ уацмысты æмбырдгонд» дыууæ томæй. Чиныджы ис романтæ, уацаутæ, радзырдтæ, таурæгътæ, пьесæтæ. Дыккаг чиныджы автор та у Хуыгаты Уасил «Дуджы сагъæстæ», зæгъгæ. Хаст æм æрцыдысты Уасилæн йæ равзаргæ уацмыстæ, йе ’мдзæвгæтæ, уацаутæ æмæ радзырдтæ. Ацы дыууæ чиныджы автортæ абон не ’хсæн нал сты, фæлæ уæлæуыл уыдон цы уацмыстæ сфæлдыстой, уыдоны руаджы сæ нæмттæ ирон чиныгкæсджыты зæрдæты баззайдзысты.
Æртыккаг чиныджы автор та у нæ адæмы уарзон актрисæ Галуанты Людæ — «Уацмысты æмбырдгонд» дыууæ томæй. Автор йæ дыууæтомон æмбырдгондмæ бахаста, æндæр æмæ æндæр рæстæджыты кæй ныммыхуыр кодта, уыцы æмдзæвгæты, афтæ ма æмбырдгондмæ хаст æрцыдысты, ныры онг мыхуыр чи никуыма уыд, уыцы драмон уацмыстæ дæр. Йæ уацмысты сæйраг бынат ахсы Фыдыбæс-æмæ уарзондзинад, йе ’мдзæвгæты бæрæг фылдæр хай фыст сты уарзондзинады темæйыл.
Чиныджы презентацимæ хуынд æрцыдысты Галуанты Людæ æмæ иннæ автортæн се ’ввахс хиуæттæ, се сфæлдыстадæн табугæнджытæ. Мадзалмæ æрбацæуджытæ ноджы лæмбынæгдæр базонгæ сты ацы æртæ авторы цард æмæ сфæлдыстадимæ.
Презентаци бацæуæн ныхасæй байгом кодта РХИ-йы Мыхуыр æмæ информацийы паддзахадон комитеты Сæрдары хæстæ æххæстгæнæг Джусойты Нелли.
Уый йæ ныхасы банысан кодта ахæм хъуыды, зæгъгæ, цы чингуытæ уадзæм, уыдон нæ республикæйæн æддейæ нымад цæуынц контрафактон продукцийыл, коды номыр сын кæй нæй, уый тыххæй. Ацы фарстыл мах зæрдиагæй бакусдзыстæм Уæрæсеимæ иумæ.
Чиныг «Уацмысты æмбырдгонд»-ы автор Галуанты Людæ та мадзалмæ æрба-æуджытæн радзырдта, фыццаг æмдзæвгæтæ фыссын куыд райдыдта, уый тыххæй. Æрдзырдта, хицæн æмдзæвгæтæ-иу æнæнхъæлæджы куыд равзæрдысты йæ зæрдæйы, æппæт уыдæттæ.
Галуанты Людæйы цард æмæ сфæлдыстадон куыст тынг хорз чи зоны, стыр аргъ ын чи кæны æмæ йын йæхи цардыл хорзæрдæм кæмæн бандæвта, афтæ ма йын ноджы мадæлон æвзаг фылдæр кæмæн бауарзын кодта, уыдонæй иу у Беппиты Изольдæ. Уый дæр бирæ хъарм ныхæстæ загъта Людæйы тыххæй. Йе сфæлдыстадон архайды тыххæй æмæ куыд хорз адæймаг, афтæ йын бузныджы ныхæстæ загъта фæндырдзæгъдæг Сæп-пиаты Залинæ.
Йæ цины æнкъарæнтæ нæ басусæг кодта Галуанты Людæйæн йæ чызг дæр.
Презентацийы бирæ дзырд цыдис Нартыхты Григолы цард æмæ сфæлдыстады тыххæй дæр. Æрæмбырдуæвджытæн йе сфæлдыстадон архайды тыххæй радзырдта йæ хистæр чызг Медея. Уый стыр æхцондзинады æнкъарæнтимæ æрдзырдта йæ уарзон фыды тыххæй, куыд куыстуарзаг уыд, æмæ йæ удыхъæды тыххæй. Йе сфæлдыстадон уацмыстыл дæр ын æрдзырдта лæмбынæг. Банысан ма кодта æнæмыхуыргондæй ма йын кæй баззадысты цалдæр драмæйы.
Мадзалы хорз аргъ скодтой Хуыгаты Уасилы сфæлдыстадæн дæр. Йæ уацмысты æмбырдгонд «Дуджы сагъæстæ»-йы тыххæй дæр загъд æрцыдысты бирæ æппæлæн ныхæстæ.
Дыууæ дзæнæтыбадинаг Нартыхты Григол æмæ Хуыгаты Уасилы тыххæй йæ хъуыдытæ загъта Биазырты Роланд, зæгъгæ, уыдон уыдысты мæ хистæртæ, уыдысты æрмæст курдиатджын фысджытæ нæ, фæлæ хорз журналисттæ дæр, мæ сæ, зæгъгæ, æз кæддæриддæр истон цæвиттон. Уый ма банысан кодта ахæм хъуыды, зæгъгæ, хорз у не ’хсæн чи нал ис, уыцы авторты кæй нæ рох кæнæм, сæ чингуытæ сын кæй уадзæм, уый. Фæлæ ма хорз уаид, ноджы раздæр чи ацыдысты а-дунейæ, уыцы ирон фысджыты уацмысты дæр куы уадзиккам мыхуыры.
Афтæ ма сæ хъуыдытæ æмæ бузныджы ныхæстæ загътой уæлдæр загъдгонд автортæн мадзалмæ иннæ æрбацæуджытæ дæр.
Банысан кæнын хъæуы уый, æмæ чингуытæ уагъд кæй цæуынц РХИ-йы Мыхуыр æмæ информацийы паддзахадон комитеты рауагъдадон къамисы уынаффæмæ гæсгæ.
Туаты Ларисæ

Comments are closed, but trackbacks and pingbacks are open.