Президент Бибылты Анатолийы ныстуан Æхсардзинад æмæ адæмон иудзинады боны сæраппонд

Зынаргъ æмбæстæгтæ!

Æхсæнады æцæг адæм свæййынц æрмæстдæр сæ хъысмæты иумæйагдзинад бамбаргæйæ. Уыцы æнкъарæн райгуыры æмæ фидар кæны адæмы сæ историйы фæзилæнты æмæ адæмæн ратты цыфæнды фæлварæнтыл фæтых уæвыны фадат дæр. Хуссар Ирыстоны адæмæн ахæм уыд 1989 азы 23 ноябрь. Уыцы бон æнустæм ссис нацийы хъайтарон историйы хай, Фыдыбæстæ хъахъхъæнджыты æхсардзинад æмæ Хуссар Ирыстоны национ иудзинады боны символ.

Цæдисон паддзахады историйы фæуды, ХХ-æм æнусы 80 азты кæрон Гуырдзыстоны националистон тыхтæ аскъуыддзаг кодтой, зæгъгæ, рæстæг æрцыд сæ национ амбицитæ сæххæст кæнынæн. Национ уæлдæрдзинады идеологийыл бындуриуæггæнгæйæ, уыдоны фæндыд æнæгуырдзиаг адæмы сæхи дæлбар бакæнын, басæттын æмæ фашистон идеологийы принциптыл унитарон паддзахад саразын. Хуссар Ирыстоны æмæ Абхазы уыдон сæ плæнттæ реализаци кæныны раз цæлхдуртæ куы федтой, уæд се ‘ргом аздæхтой автономи аиуварс кæнын æмæ сæ бартæ æмæ национ хæзнатыл тохгæ-нæг æнæгуырдзиаг адæмы фæсурынмæ.

Националистон зондахастыл лæуд дзыллæ цæттæйæ истой пропагандистон штамптæ ирæтты «æрцæуæг-гæгтæ», «æбузн уазджытæ» кæй сты, кæцытæ сæхи бакодтой гуырдзиаг зæххытæ. Уый дзырдтой Хуссар Ирыстоны зæххæй. Гуырдзыстоны национ лидертæ сæхи чи схуыдта,  уыцы адæймæгтæ сидтысты, цæмæй ирæтты гуырынад фæкъаддæр уыдаид æмæ æнæсæттонты Кавказы рагъæн фæфалæ кодтаиккой. Ныхæстæй æмæ сидтытæй националисттæ рахызтысты фæдыл зилынмæ, кæцы здæхт уыд ирон адæмы фæтæрсын æмæ басæттын кæнынмæ.

Гуырдзиаг национализмы алы ферттывд дæр фæстагмæ кæй расайы гарзджын къордты фæзынд, пырхæнтæ, тыхæй исын æмæ лæгмæрдтæм кæй æркæны, уый зонгæйæ, Хуссар Ирыстоны архайдтой политикон фæрæзтæй автономийы барадон гарантитæ сифтонг кæнынмæ. Фæлæ Тбилисы фидарæй сфæнд кодтой Хуссар Ирыстоны уавæр скарз кæнынмæ æмæ йæ тыхы амæлттæй басæттын.

1989 азы 3 ноябры Ленингоры поселочы Тбилисæй æрцæугæ гуырдзиаг национал-экстремисттæ ирон адæмы ныхмæ лозунгтыл бындуриуæг кæнгæйæ, ауагътой дзыллон митинг æмæ стæй райдыдтой ирон адæмы хæдзæрттæ пырх кæнын. Уыцы хабæртты фæстæ адæмон депутатты Хуссар Ирыстоны областон совет 1989 азы 10 ноябры уынаффæ райста, цæмæй автономон област рацарæзт æрцæуа автономон республикæмæ æмæ Тбилисмæ арвыстой сидт, цæмæй йæ сфидар кæной ССРЦ-йы æндæр автономон областты цæвиттонмæ гæсгæ. Гуырдзыстонмæ хуссарирыстойнаг депутатты сидт банымадтой стыр æфхæрдыл æмæ аскъуыддзаг кодтой, цæмæй цæрæнбонтæм ирæттæн байсой сæ политикон бартæ райсыны фæндон. Националисты æрсидтмæ гæсгæ 1989 азы 23 ноябры цалдæр мин экстремистты егъау колоннæ рацыд Хуссар Ирыстоны ‘рдæм, цæмæй тæрсын кæныны дзыллон акци ауагътаиккой.

23 ноябрь, аргъуан Джиуæргуыбайы бон куы нысан кæны,  уымæн æвзæрст æрцыд, цæмæй акцийæн радтаиккой сæрмагонд пафос æмæ гуырдзиаг æфсæддонтæн сæ  хæстон ныфс фæбæрзонддæр кодтаиккой, сæ балц сын Цхинвалмæ сыгъдæг Уастрырджиимæ бæтгæйæ. Гуырдзиаг идеологтæ фæсайды сты, уымæн æмæ сыгъдæг Уастырджи æвзæрдзинад чи аразы, уыдонæн никуы æххуыс кæны. Уый æххуыс кæны, хорз хъуыддагыл чи архайы, уыдо-нæн.

Экстремистты ныхмæ чи фæлæууыд, уыцы ирон фæсивæдимæ уыд Уастырджи. Ирон æвзонг лæппутты чысыл къорд, æнæ хæцæнгарзæй, бирæ адæмы ныхмæ фæлæууыдысты æмæ фæстæмæ иу къахдзæф дæр нæ акодтой. Уыцы лæппутæ, сæ адæмы сæраппонд сæ риуæмбæрц чи æрлæууыд, уыдон уыцы рæстæджы уыдысты бæрцæй дæс æмæ ссæдзы бæрц æмæ рамбылдтой зынаргъ минуттæ, æхсардзинады æмæ хъæддыхдзинады цæвиттон равдыстой адæмæн. Цыбыр рæстæгмæ сæ фарсмæ æрбалæууыдысты сæдæгай адæймæгтæ.

Згъудеры уæлвæзы ныхмæлæуд ахаста суткæйæ фылдæр, фæлæ иууыл зындæр уыдысты уыцы фыццаг минуттæ æмæ ирон лæппутæ, æгæрон ныфсхастдзинад, æхсардзинад равдисгæйæ сбæрæг кодтой ныхмæлæуды фæстиуæг. Разæй нæм æнхъæлмæ кастысты мæйгæйтты блокадæ æмæ дæргъвæтин хæсты азтæ. Уыцы хæст-иу куы ныссабыр, куы та-иу ногæй сцырен. Хуссар Ирыстоны хъуыд зын фæлварæнтыл рацæуын, кæцытæн сæ кæрон уыд бæстон уæлахиз. Уый æрлæууыд агрессоры сабырдзинадмæ æркæнын æмæ 2008 азы 26 августы УФ-йы ‘рдыгæй Республикæ Хуссар Ирыстон хæдбардзинад банымайынимæ.

Фæлæ уæддæр 1989 азы 23 ноябры сгуыхтдзинад æнустæм баззайдзæн æхсардзинад, хъæддыхдзинад, Райгуырæн зæхмæ уарзондзинад æмæ удуæлдайдзинады ирд æвдисæнæй, кæцы фæстагмæ ссис уæлахизы бындурæвæрæн.

1989 азы 23 ноябры ныхмæлæуд æмæ йæ фæстæ тохы азтæ сбæрæг кодтой, нæ адæмæн сæ бон кæй у æнгом уæвын æмæ удуæлдайдзинад равдисын. Æхсардзинад, Фыдыбæстæйы æмæ национ сæрыстырдзинады сæрыл кæронмæ тох кæнгæйæ Хуссар Ирыстоны адæм бахъахъхъæдтой сæрибар бæстæйы сæрибарæй цæрыны бар. Уæрæсейæн дæр нæ уыдаид æххуысмæ нæм æрцæуыны æмæ нын фæстагмæ нæ хæдбардзинад банымайны фадат, сæрибарыл тохы æппæт азты дæргъы нæ адæм ахæм фидардзинад æмæ хъæбатырдзинад куынæ равдыстаиккой, уæд

Уадз æмæ нæ Ирыстоны уæд æмбарындзинад æмæ фæрныгад!

Уадз æмæ Уастырджи нæ бæстæйы сабырад æмæ æнцойад хъахъ-хъæнæд!

Уастырджийы стырбонты хорзæх уæ уæд, мæ зынаргъ æмбæстæгтæ!