Республикæ Хуссар Ирыстоны Президент Бибылты Анатоли, знон, 13-æм декабры фембæлд Уæрæсейы Федерацийæ делегациимæ, йæ сæргъ Уæрæсейы Федерацийы Хицауады Сæрдары хæдивæг Александр Хлопонин, афтæмæй. Уазджытæ нæ республикæмæ æрцыдысты кусæгон балцы, цæмæй хайад райсой Республикæ Хуссар Ирыстон æмæ Уæрæсейы Федерацийы ‘хсæн социалон-экономикон æмгуыстады фæдыл Æхсæнхицауадон къамисы 18-æм рабадт.

Бибылты Анатоли бузныг загъта уазджытæн се ‘рцыды тыххæй æмæ сын раарфæ кодта Уæрæсейы Федерацийы Конституцийы боны цытæн. «Фæнды мæ, сæрмагондæй мæхи æмæ Хуссар Ирыстоны адæмы номæй Уæрæсейы Федерацийы æппæт бирæнацион адæмæн паддзахадон бæрæгбон — Конституцийы боны сæраппонд раарфæ кæнын. Æмбæстæгты бартæ æмæ сæрибардзинæдтæ хъахъхъæныны гарант — Конституци, ахъаз кæны Уæрæсейы æппæт барадон системæйыл бындуриуæг кæнгæйæ, демократон паддзахад саразынæн.

Хуссар Ирыстон дæр уæрæсейаг паддзахадон-барадон рацарæзты раззагон фæлтæрддзинад исгæйæ, рæзын кæны хисæрмагонд закъондæдтынад, кæцы ахсджиаг у æмæ къух дæтты дыууæфарсон ахастыты рæзтæн», — загъта Президент.

Уæлдай бузныджы ныхæстæ загъта Александр Хлопонинæн, Уæрæсе æмæ Хуссар Ирыстоны ‘хсæн æмгуыстад дарддæр æмæ уæрæхдæр кæнынмæ йæ хайбавæрд кæй хæссы, уый тыххæй. «Уæрæсейы Федерацийы æххуысæй Инвестпрограммæйы фæлгæтты арæзт цæуынц арæзтадон объекттæ, эффективонæй æххæст цæуынц. Экономикæ æмæ æнæниздзинад хъахъхъæныны фарстатæ, кæцытæ ахъаз сты республикæйы социалон-экономикон райрæзтæн», — банысан кодта Президент.

Йæ ныхæстæм гæсгæ дыууæ фарс дæр æркæсдзысты бирæ вазыгджындæр фарстатæм. «Мах абон æруынаффæ кæндзыстæм иуæй-иу проблемон фарстытыл, азы фæудмæ цы объекттæ арæзт æмæ эксплуатацимæ лæвæрд хъуамæ æрцæуой, уыдоныл дæр. 2015-17 азты Инвестицион программæмæ цы объекттæ хаст æрцыдысты, уыдонæй ис афтæ зæгъæн, æмæ æххæст æрцыдысты 90 процентæй.

Бибылты Анатоли ма загъта, зæгъгæ, уынаффæ цæудзæнис 2018-19 азты пълæнттыл Инвестицион программæмæ хаст ахсджиаг объектты арæзтадыл. Фидæны инвестпрограммæмæ хаст æрцыдысты республикæйы рæзты приоритетон здæхтыты фæдыл объекттæ. Сæрмагонд хъусдард æрцыд экономикæйы реалон сектормæ, туризм, инженерон хызæгты арæзтад, бастдзинад æмæ æндæр социалон нысаниуæджы объекттæм.

УФ-йы Хицауады Сæрдары хæдивæг Александр Хлопонин та загъта: «Уæрæсе æмæ Хуссар Ирыстоны ‘хсæн социалон-экономикон фарстаты нæй проблемæтæ, ис нæм æрмæстдæр кусæгон фарстатæ. Æхсæнхицауадон рабадтыты мах æруынаффæ кæнæм Уæрæсейæ финансон æххуыс исыны фарстатæм, цæмæй дзы уа фæстиуæг. Уый нысанæн æрцæуынц нæ эксперттæ ардæм дæр», — загъта Александр Хлопонин.

Уый ма банысан кодта Уæрæсе 2018-19 азтæн кæй рахицæн кæндзæнис 4 миллиард сомы Инвестицион программæйы фæлгæтты. Ис ахæм фарстытæ, кæцытæ ха-уынц, тарифон политикæмæ, инфраструктурæмæ, фæлæ, зæгъгæ, уыдон скъуыддзаг цæудзысты куысты рæстæджы. Инвестпрограммæмæ хаст æрцæудзæнис 24 мадзалы æмæ, зæгъгæ, мæн ныфс ис, уыдон дæр æнтыстджынæй кæй аскъуыддзаг кæндзыстæм, иумæ.

А. Хлопонин æмæ делегацийы уæнгтæ сæ куыст адарддæр кодтой Æхсæнхицауадон къамисы 18-æм рабадты. Уый тыххæй æрмæгимæ базонгæ уыдзыстут нæ газеты радон номыры.

Уазæгты Марфа

Comments are closed, but trackbacks and pingbacks are open.