Афæдз рацыд, Республикæ Хуссар Ирыстоны адæм Президентæй Бибылты Анатолийы куы равзæрстой, уыцы бонæй. Уæдæй абонмæ кусы æмæ архайы,  2017 азы 21 апрелы инаугурацийы рæстæджы йæ разы цы хæстæ æрæвæрдта, уыдон æххæст кæныныл.

Бибылты Анатоли ард бахордта, Президенты æххæстбартæ æххæст кæнгæйæ кæй кад кæндзæн æмæ хъахъхъæндзæн адæймаг æмæ æмбæстаджы бартæ æмæ сæрибардзинæдтæ, кæй хъахъхъæндзæн Республикæ Хуссар Ирыстоны Конституци, йæ суверенитет æмæ хæдбардзинад, æдасдзинад æмæ территориалон æнæхъæндзинад, æнувыдæй кæй лæггад кæндзæн йæ адæмæн.

Йæ æвæджиагдæр хæстыл уый нымайы республикæйы мидæггагон æмæ æддагон политикæ раст равæрын æмæ йæ æххæст кæнын. Æмæ йын æнтысгæ дæр кæны – йæ афæдзон архайдыл цæст ахæсгæйæ, ирдæй зынынц йæ саразгæ къахдзæфтæ куыд мидæггагон, афтæ æддагон политикæйы дæр.

Президент кусы, цы бынтæ йын баззад йæ размæйы къухдариуæгадæй, уыдон адарддæр кæныныл дæр æмæ йæхæдæг ногæй бындур цы хъуыддæгтæн æрæвæрдта, уыдон кæронмæ акæныныл дæр.

Уæрæсейы Федерациимæ амахастыты тыххæй Бибылты Анатолийæн цы политикæ ис, уый фæлгæтты рæзынц æмæ фидарæй фидардæр кæнынц дыууæ паддзахады ‘хсæн ахастытæ. Ацы ахастытæ ноджы фенгомдæр сты, Уæрæсейы Федерацийы Президент Владимир Путинимæ Сочийы куы фембæлд, уый фæстæ.

Фембæлды рæстæджы дыууæ паддзахады сæргълæуджытæ ноджыдæр бафидар кодтой Хуссар Ирыстон æмæ Уæрæсейы Федерацийы ‘хсæн æмцæдисон ахастытæ райрæзын æмæ сфидар кæныны фæндондзинад, уынаффæ кодтой политикон, экономикон æмæ социалон здæхты къорд фарстатыл. Цæуыл бадзырдтой, уыдон сæххæст кæныны фæлгæтты Бибылты Анатоли Сочийы фембæлд акционерон æхсæнад «Роснефть»-ы сæйраг æххæстгæнæг директор Игорь Сечинимæ дæр. Фембæлды рæстæджы уыдон бадзырдтой, цæмæй «Роснефть»-ы компани Хуссар Ирыстоны сараза æртаджы станцæтæ.

Уыцы балцы рæстæджы хуссарирыстойнаг паддзахады сæргълæууæг фембæлд акционерон æхсæнад «Газпром»-ы правленийы Сæрдар Алексей Миллеримæ дæр.

Дыууæ фарсы уынаффæ кодтой Республикæ Хуссар Ирыстоны газификацийы фарстатыл.

Уый фæстæ дæр Бибылты Анатолийæн официалон фембæлд уыд Владимир Путинимæ.  Фембæлды рæстæджы дыууæ Президенты ныхас кодтой Хуссар Ирыстон æмæ Уæрæсейы Федерацийы ‘хсæн æмкуысткæнынады фарстатыл.

Официалон балцы рæстæджы Бибылты Анатоли Мæскуыйы  фембæлд Республикæ Науруйы Пезидент Барон Дивавеси Вакаимæ.

Республикæйы къухдариуæггæнæг тырны Уæрæсейы Федерацийы регионтимæ æнгом æмахастытæ райрæзын кæнынмæ дæр.

Уый фæстиуæгæн Бибылты Анатолийæн фембæлдтытæ уыд уæрæсейаг регионты къухдариуæггæнджытимæ, уыцы нымæцы Республикæ Татарстаны президент Рустам Миннихановимæ. Бибылты Анатоли æмæ Рустам Минниханов фембæлдысты Санкт-Петербурджы æхсæнадæмон экономикон форумы æмæ æруынаффæ кодтой Татарстан æмæ Хуссар Ирыстоны ‘хсæн æмгуыстады фарстытыл.

26 ноябры Хуссар Ирыстонмæ официалон балцы æрцыд Республикæ Абхазы делегаци Президент Рауль  Хаджимбайы сæргълæудæй. Республикæ Абхазы Президенты йæхимæ райста Президент Бибылты Анатоли. Дыууæ хæлар республикæйы сæргълæуджытæ ныхас кодтой хуссарирыстойнаг-абхазаг ахастытæ дарддæр дæр фидар кæныныл, дзырдтой æхсæнадæмон актуалон фарстатыл дæр.

Уый фæстæ Хуссар Ирыстоны Ахуырад æмæ зонады министрадты æмæ Абхазы Ахуырады министрадты ‘хсæн арæзт æрцыд сразыдзинад ахуырады фадыджы æмгуыст кæныны тыххæй.  Сразыдзинад арæзт æрцыд дыууæ республикæйы Хъæууон хæдзарадты министрадты ‘хсæн дæр.

Уæрæсейы  Федерациимæ æмахастытæ фидар кæнынц ахуырады фадыджы дæр.

2018 азы 29 январы Мæскуыйы паддзахадон юридикон академийы бæстыхайы фембæлдысты Тыбылты Алыксандры номыл Хуссар Ирыстоны паддзахадон университеты ректор Тедеты Вадим æмæ О. Е. Кутафины номыл Мæскуыйы паддзахадон юридикон университеты ректор Виктор Блажеев.

Фембæлды фæлгæтты къухтæ фыст æрцыдысты Хуссар Ирыстоны паддзахадон университет æмæ Мæскуыйы паддзахадон юридикон университеты ‘хсæн академион æмæ зонадон æмгуыстады тыххæй сразыдзинадыл.

Æрæджы Хуссар Ирыстон æмæ Уæрæсейы Федерацийы хицауадты ‘хсæн къухтæ æрфыстæуыд ахуырад æмæ квалификациты тыххæй кæрæдзийы дипломтæ нымайыны фæ-дыл сразыдзинадыл.

Ирон æмæ уырыссаг адæмтæн чырыстон дины историйы иумиаг ратæдзæнтæ бирæ кæй ис, уый бæлвырдгонд у, æмæ сын цæмæй ныр дæр дины хъуыддаджы æнгом бастдзинæдтæ уа, иумиаг традицитæ дард-дæр дæр фидар цæуой æмæ рæзой, уыцы нысанæн Бибылты Анатоли фембæлд Мæс-куыйаг æмæ æппæт Уæрæсейы Патриарх Кириллимæ.

Фембæлды рæстæджы уынаффæ цыд дины фадыджы фарстатыл, афтæ ма Цхинвалы Уырыссаг Чырыстон аргъуаны арæз-тадыл æмæ нæ республикæйы Хуссар Ирыстоны æмбæстæгты Уæрæсейы духовон семинариты æмæ академиты сахуыр кæныны фарстатыл.

Бибылты Анатоли æрмæст Уæрæсеимæ æмахастытæ фидар кæныныл нæ архайы, фæлæ ма кусы æфсымæрон фæсарæйнаг республикæтимæ дæр æнгом ахастытæ саразыныл. Президенты бынатмæ бахизгæ-йæ, уый йæ фыццаг официалон балцы ацыд Республикæ Аб-хазмæ æмæ фембæлд ацы бæстæйы Президент Рауль Ха-джимбаимæ.

Фембæды уынаффæ цыд экономикон æмахастытыл, культурæйы фарстатыл, гуманитарон сферæйыл,  дыууæ республикæйы æхсæнады минæвæртты бастдзинæдтыл.

Æфсымæрон республикæты сæргълæуджытæ лæмбынæг æруынаффæ кодтой дыууæфарсон æмгуысткæнынады рæзты перспективæтыл. Дыууæ паддзахады Фæсарæйнаг хъуыддæгты министрадтæ æмæ Æхсæнадон палатæты ‘хсæн арæзт æрцыд сразыдзинæдтæ. Сразыдзинæдтыл къухтæ æрфыстæуыд президенттæ Бибылты Анатоли æмæ Рауль Хаджинбайы хайадистæй.

Æнгом ахастытæ рæзынц Республикæ Хуссар Ирыстон æмæ Донецкы Адæмон Республикæйы ‘хсæн дæр. Кæд республикæйы раздæры къухдариуæгады рæстæджы Донецкы дæр æмæ Цхинвалы дæр баконд æрцыдысты  минæварадтæ, уæддæр уыдон нæ уыдысты æххæстхъомыс дипломатон мисситæ. Уый фæстиуæгæн Хуссар Ирыстоны ныры къухдариуæгады рæстæджы дыууæ республикæйы Фæсарæйнаг хъуыддæгты министртæ  сæ къухтæ æрфыстой дипломатон ахастытæ саразыны тыххæй Суагъæйыл.

Дыууæ республикæйы сæргълæуджытæ сæ къухтæ æрфыстой Хæлардзинад, æмгуыстад æмæ кæрæдзийæн æххуысы тыххæй бадзырдыл.

Хуссар Ирыстоны Президент Бибылты Анатоли Санкт-Петербурджы фембæлд Сербаг Республикæйы президент Милорад Додикимæ. Фембæлды нысан уыд дыууæ паддзахады ‘хсæн æмахастытæ саразын.

Сербаг Босни æмæ Герцоговинайы Республикæйы президент Милорад Додикы фæхуындмæ гæсгæ ацы азы райдианы Бибылты Анатоли официалон балцы ацыд Сербаг Республикæмæ.

Делегацийы уæнгтимæ уый хайад райста Сербаг Республикæйы сырæзтыл 26 азы сæххæсты цытæн бæрæгбонон мадзæлтты. Уый фæстæ фамбæлд Сербаг Республикæйы президент Милорад Додикимæ. Фембæлды рæстæджы дыууæ президенты ныхас кодтой дыууæ паддзахады ‘хсæн æмгуыстады рæзты перспективæтыл.

Дыууæ паддзахады сæргълæуджыты хайадистæй Хуссар Ирыстоны Фæсарæйнаг хъуыддæгты министр Медойты Димитр æмæ Сербаг Республикæйы Экономикон ахастыты æмæ регионалон æмгуыстады министр Златан Клокич сæ къухтæ æрфыстой дыууæ паддзахады ‘хсæн Æмгуыстады тыххæй сразыдзинадыл. Арæзт ма æрцыд æмгуыстады сразыдзинад Парти «Иугонд Ирыстон»  æмæ Сербаг Республикæйы Хæдбар социал-демократты цæдисы ‘хсæн дæр.

Æмгуыстад фидар кæны Луганскы Адæмон Республикæ æмæ Приднестроваг Молдаваг республикæимæ дæр.

РХИ-йы Экономикон рæзты министрады делегаци, министр Кокойты Геннадийы сæргълæудæй кусæгон балцы уыд Луганскы Адæмон Республикæйы.  Сæ балцы рæстæджы хуссарирыстойнаг делегацийы минæвæрттæ фембæлдысты Луганскы Адæмон Республикæйы Адæмон Советы Сæрдар Денис Мирошниченкоимæ æмæ æндæр бæрнон адæймæгтимæ. Уыдон æруынаффæ кодтой цардифтонгады архайды алыгъуызон фадгуыты республикæты ‘хсæн æмахастыты рæзты перспективæтыл.

Йæ архайд зынгæ фæактивондæр кодта РХИ-йы Фæсарæйнаг хъуыддæгты министрад. Йæ сæргълæууæг Медойты Димитр хайад райста Брюсселы XI Европæйаг форум «Евро-цæдис 2017 æмæ Уырыссаг революци 1917: Æнæсахуыргонд уроктæ»-йы, цыран хайад райстой Европæ æмæ Уæрæсейæ политиктæ, дипломаттæ æмæ эксперттæ.

Форумы уый сарæзта доклад ахæм темæйыл: «Хуссар Ирыстон  Уæрæсе: дыууæ æмæ æрдæг æнусы иумиаг истори».

Хуссар Ирыстоны Фæсарæйнаг хъуыддæгты министр Медойты Димитр францаг ирон диаспорæйы президент Дзанайты-Айрис Лорайы фæхуындмæ гæсгæ уыд Францы. Парижы фембæлд Уæрæсейаг зонад æмæ культурæйы къухдариуæггæнæг Екатеринæ Солоцинскаяимæ. Фембæлды рæстæджы ныхас цыд гуманитарон æмæ культурон æмгуыстад рæзыны перспективæйыл, иумиаг проектты реализацийыл, афтæ ма кæрæдзийæн цымыдисон æндæр фарстатыл.

Медойты Димитр официалон балцы уыд Науруйы дæр. Уым фембæлд Республикæ Науруйы Парламенты спикер господин Сирил Бураманимæ. Фембæлды рæстæджы РХИ-йы министр Хуссар Ирыстоны адæмы номæй бузныджы ныхæстæ загъта Науруйы къухдариуæгадæн, Хуссар Ирыстоны хæдбардзинад кæй банымадтой, уый тыххæй.

Министр фембæлд Республикæ Индонезийы Хицауады сæрмагонд минæвар Николас Мессетимæ. Уыдон ныхас кодтой æхсæнадæмон æмæ регионалон темæтыл, афтæ ма Хуссар Ирыстоны историйыл æмæ дунеон бæстæтимæ йæ ахастытыл.

Науруйæ раздæхгæйæ, Медойты Димитр цыбыр рæстæг-мæ æрлæууыд Республикæ Кореяйы горæт Сеулы. Уым фембæлд хуссаркорейаг компани «Juan»-ы президент господин Мунимæ. Ацы компани æмæ Хуссар Ирыстон 2012 азы сарæзтой Суагъæ Хуссар Ирыстоны территорийыл бастдзинад æмæ телекоммуникацийы рæзты тыххæй.

Италимæ  Медойты  Димитры кусæгон балц та райдыдта зындгонд композитор Россинийы райгуырæн горæт Пезаройæ, цыран нырыккон аивæдты галерея Alexander Museum Palace-йы  байгом ирон нывгæнджыты равдыст. Ацы равдысты уыдысты Хуссар Ирыстон æмæ Цæгат Ирыстоны нывгæнджытæ Чилæхсаты Магрез, Кæсойты Лаврент, Есенаты Æхсар, Гæбæраты Георги, Басаты Олег, Пухаты Вадим, Къадзты Вадим æмæ æндæрты конд нывтæ.

Йæ балцы рæстæджы Медойты Димитр хайад райста къорд мадзалы æмæ фембæлд политикон æмæ культурон фадыджы минæвæрттимæ. Министр ма фембæлд Европарламенты РХИ-йы минæвар Джульетто Кьезаимæ дæр. Фембæлды рæстæджы Медойты Димитр Джульетто Кьезайæн радта Хуссар Ирыстоны дипломатон паспорт.

Медойты Димитр цыбыррæстæгон балцы уыд Каталонийы дæр æмæ хайад райста, Барселонайы бакондæрцæуæг Хуссар Ирыстоны Фæсарæйнаг хъуыддæгты министрады минæварады офис байгом кæныны церемонийы. Минæварады офисы байгом фæахъаз уыдзæн дыууæфарсон бастдзинæдтæ аразынæн, фыццаджы фыццаг культурæ æмæ гуманитарон фадыджы.

Уымæй дарддæр ма фыццаг хатт Хуссар Ирыстонмæ æрцыд стыр делегаци Италийæ. Делегацийы сконды уыдысты Италийы Республикæ Хуссар Ирыстоны минæвар Марио Мурджа, журналист, политолог Джульетто Кьеза, Pandora TV-йы сæйраг редактор Маргерита Фурлан, эксперттæ æмæ амалиуæггæнджытæ.  Делегацийы уæнгты йæхимæ райста РХИ-йы Президент Бибылты Анатоли.  Химæрайсты рæстæджы ныхас цыд дыууæ бæстæйы ‘хсæн экономикон, культурон ахастытыл. Уый банысан кодта, Хуссар Ирыстон æмæ Италийы бизнесы ‘хсæн экономикон ахастыты ахсджиагдзинад æмæ перспективæтæ.

Ахæм уыдис цыбыртæй нæ республикæйы разамынады æддагполитикон архайд президентон фыццаг азы.

Осиаты Индирæ

Comments are closed, but trackbacks and pingbacks are open.