Хуссар Ирыстоны Национ музей азæй-азмæ хъæздыгдæр кæны йæ экспонаттæй. Æрæджы та уыдон баххæст æрцыдысты ноджыдæр иу экспонатæй — приднестроваг нывгæнæг, Приднестроваг Молдоваг Республикæйы аивæдты сгуыхт архайæг, ССР Цæдисы Нывгæнджыты цæдисы уæнг Геннади Зыковы нывæй ахæм символикон номимæ «08.08.08». Музейæн æй балæвар кодта Хуссар Ирыстоны Приднестроваг-Молдоваг Республикæйы Минæварады сæргълæууæг Витали Янковский.

Нывгæнæджы куыст музейæн лæвар кæныны церемонийы уыдысты РХИ-йы фæсарæйнаг хъуыддæгты министр Медойты Димитр æмæ культурæйы министр Зассеты Жаннæ.

Геннади Янковский куыд загъта, афтæмæй Приднестровьейы адæм  сæ зæрдæмæ æввахс айстой 2008 азы августы трагикон цаутæ, уыдон сæхæдæг дæр, зæгъгæ, бавзæрстой, хæст цы у, уый. Нывгæнæг йæхæдæг дæр бавзæрста хæсты зындзинæдтæ æмæ йе ‘нкъарæнтæ равдыста ацы нывы.

Музейы директор Зассеты Мераб дæр банысан кодта, зæгъгæ, Ирыстонæн зынаргъ у нæ историмæ ахæм хæларзæрдæ, æфсымæрон ахаст.

«Музейæн цы ныв æрцыдис лæвар, уый у ирд, стыр эмоционалон тых кæм  ис, ахæм, æмæ ноджыдæр у иу бæлвырдгæнæн, махмæ хъарм, зæрдæбын ахастæн, нæ республикæты ‘хсæн æмгуысткæнынады рæзтæн. Фæнды мæ банысан кæнын, нæ музейы кæй фæзындзæн нæ дыууæфарсон ахастыты историйы фæдыл экспозици, кæцы дзурæг уыдзæн, Приднестровье  æмæ Хуссар Ирыстоны республикæтæ куыд цæрынц æмæ сæ ахастытæ куыд рæзын кæнынц, ууыл. Мах дæр нæ рады архайдзыстæм ууыл, цæмæй мах тыххæй фылдæр зоной Приднестровьейы», — загъта уый.

Фылдæр сау æмæ сырх фæлгъуызтæ кæм ис, уыцы ныв æххæст æрцыд гæххæттыл гуашæй æмæ йын ис арф философон мидис. Нывы фæзуат иууылдæр йемыдзаг у фæрæттæй, кæцытæ здæхт сты галиуæрдæм. Арв ахуырст у сæуæхсиды сырх ахорæнæй æмæ дзуапп дæтты йæ эмоционалон мидисæн.

Геннади Зыков зындгонд у, куыд курдиатджын график, йæ куыстытæ æвæрд сты Приднестроваг Молдоваг Республикæйы бæстæзонæн æмæ историон музейты, афтæ ма хисæрмагонд коллекцитæ æмæ галерейты.

 

 

 

Comments are closed, but trackbacks and pingbacks are open.