Уагъд æрцыдис РХИ-йы Хицауады радон рабадт Пухаты Эрикы сæргълæудæй. Рабадт райдыдта, министрадтæ æмæ ведомствотæн цы хæслæвæрдтæ лæвæрд æрцыдысты, уыдон куыд æххæст цæуынц, уымæй. Хицауады Сæрдар йе ‘нæразыдзинад равдыста уыдон æххæст кæныныл куыст бынтон мæгуырау кæй цæуы, уый фæдыл. Цæвиттон, Президенты комкоммæ бахæсмæ гæсгæ министрадтæ æмæ ведомствоты сæргълæуджытæн хæсгонд æрцыд, цæмæй регуляронæй æмбæлой республикæйы цæрджытимæ, зонгæ кæной бынæтты хъуыддæгты уавæримæ, цæуыл тыхсынц, уыдæттæ хынцгæйæ. Уыдон уый фæдыл хъуамæ хъусын кодтаиккой бæстæйы сæргълæууæгæн, фæлæ абоны онг дæр нырма ничи ницы сарæзта Мидхъуыддæгты министрадæй дарддæр. Йæ ныхæстæм гæсгæ кæд ацы фарстыл арæх фæдзурынц, уæддæр хæс-лæвæрдтæ æххæст кæныны хъуыддаг нырмадæр ис ныллæг æмвæзадыл æмæ уый та дзурæг у, къухдариуæггæнджытæ сæ куыстмæ æбæрн ахаст кæй æвдисынц. «Хицауад хъуамæ куса æппæт тыхтæй дæр æмæ æхсæнады цардмæ хæсса зынгæ позитивон ивындзинæдтæ. Æмæ дарддæр дæр хæслæвæрдтæ æххæст кæныны æмгъуыдтæ хъахъхъæд куынæ цæуой, уæд мæн бахъæудзæн фæдзæхсынæй карздæр мадзæлттæ райсын», — загъта Хицауады Сæрдар. Уый ма ноджыдæр банысан кодта ацы фарсты ахсджиагдзинад, зæгъгæ, уæвæг проблемæтимæ фембæлдтытæй хуыздæр амал нæй, афтæ, æмæ Хицауад хъуамæ йе ‘ргом аздаха адæмы ‘рдæм, араза æппæт дæр, цæмæй сын сæ цард фæрогдæр кæна.

Рабадты дарддæр уынаффæ цыдис, боны фæткмæ цы фарстытæ хаст æрцыдысты, уыдоныл. Райдианы уал æркастысты организацион фарстытæм. Дзауы районы администрацийы сæргълæууæджы фыццаг хæдивæгæй нысан æрцыд Цхуырбаты Вадим. Йæ кандидатурæ йын бавдыста районы администрацийы сæргълæууæг Магкоты Уырызмæг. Йæ ныхæстæм гæсгæ уый у инициативæджын, активон æмæ ныфс бавæрдта, йæ хæстæ, куыд æмбæлы, афтæ кæй æххæст кæндзæн. Уый дзуапп дæтдзæн ахуырад, культурæ æмæ æнæниздзинад хъахъхъæныны къабæзтæн. Цхуырбаты Вадим æндæр æмæ æндæр азты куыста районы скъолаты ахуыргæнæгæй, Мидхъуыддæгты æмæ паддзахадон æдасдзинады органты, фæстаг азты та кодта амалиуæгадон архайд. Ацы бынаты уый раивта Козаты Роланды, кæцы йæ куыст ныууагъта йæхи куырдиатмæ гæсгæ.

Знауыры районы администрацийы сæргълæууæджы хæдивæгæй та нысан æрцыд Дзанайты Гиви. Уый та раздæр куыста районы администрацийы хъæууон хæдзарады хайады сæргълæууæгæй, ис æм фæсивæдон политикæ æмæ спорты къабазы куысты фæлтæрддзинад.  Йæ бынатæй сæрибар æрцыд Экологион, технологион æмæ арæзтадон хъусдарды комитеты сæрдары хæдивæг Зæгъойты Феликс.

Хицауады уæнгтæ ивындзинæдтæ бахастой хицæн къамистæ æмæ советы скондмæ, уый та баст у сæ эффективон архайды нысанæн кадрон ивындзинæдтимæ. Цæвиттон Хицауады Сæрдары раздæры фыццаг хæдивæг Тъехты Аланы бæсты Национ бангон советы скондмæ нысан æрцыд экономикон рæзты министр Кокойты Геннади. Паддзахадон унитарон куыстуæтты архайдыл контролы фæдыл Æхсæнведомствæйон къамисы скондмæ та баконд æрцыд Парламенты минæвар. Ахæм уынаффæ æмбæлон кæй у, уый тыххæй йæ хъуыды загъта Кокойты Геннади. Йæ ныхæстæм гæсгæ къамисы рауæрæхгонд сконды куыст фæахъаз уыдзæн республикæйы бирæ паддзахадон унитарон куыстуæтты потенциал раргом кæнынæн, сæ архайды ног æмвæзадмæ сæ ракæнынæн.

Рабадты фидар æрцыд ацы азы дыккаг кварталæн цæрджыты сæйрагдæр социалон-экономикон къордты иу адæймагæн цæрыны минимумы бæрц. Экономикон рæзты министр Кокойты Геннади куыд банысан кодта, афтæмæй уый куыстхъом цæрджытæн уыдис 10034 сомы æмæ 30 къапеччы, песиисджытæн  8176 сомы æмæ 16 къапеччы, сывæллæттæн та — 10830 сомы æмæ 28 къапеччы. Ивгъуыд аз та республикæйы ацы бæрæггæнæн уыдис 9959 сомы.

Рабадты æруынаффæ кодтой æмæ райстой «Æххæст-кæнынадон кондады тыххæй Республикæ Хуссар Ирыстоны 2011 азы 11 июны райсгæ закъонмæ ивындзинæдтæ бахæссыны тыххæй» РХИ-йы закъоны проект. Бавдыста йæ Юстицийы министр Лалыты Залинæ. Ивындзинæдтæ бахæссын бахъуыд тæрхондонон приставты службæйы кусæгон документаци аразыны цухдзиндæтæ кæй уыдис, уымæ гæсгæ.

Афтæ ма рабадты хайадисджытæ хорзыл банымадтой «Сæйрагдæр, иумиагахуырадон программæты паддзахадон аккредитацитæ кæмæ ис, æмæ ахуырадон архайд чи æххæст кæнынц, уыцы хисæрмагонд скъолайы агъоммæйы организациты, скъолайы агъоммæ райдиан иумиаг, сæйраг иумиаг ахуырад, астæуæккаг иумиаг ахуырад, хисæрмагонд иумиаг ахуырадон организациты скъолайы агъоммæ ахуырад райсын сифтонг кæнынæн 2017 азы РХИ-йы паддзахадон бюджетæй субсидитæ радтыны фæтк сфидар кæныны тыххæй» Хицауады уынаффæйы проект. Уынаффæ кæнынмæ йæ рахаста Ахуырады министр Гасситы Натали.

Ацы фæткмæ гæсгæ бæлвырд цæуынц субсидитæ дæттыны фæткойтæ æмæ уавæртæ, цæмæй баххæст æрцæуой ахуыргæнджыты куыстмыздты æмæ ахуыргæнинæгты хæлцадыл хæрдзтæ. Субсидитæ райсыны бар ис республикæйы территорийыл сæ архайд чи æххæст кæнынц, уыцы хисæрмагонд организацитæн, кæцытæн ис паддзахадон аккредитаци æмæ ахуырадон архайд кæныны тыххæй лицензи.

Бестауты Валя

Comments are closed, but trackbacks and pingbacks are open.