ПУХАТЫ Эрик: «Хицауады куысты тыххæй йæ алы уæнг дæр хæссы бæрндзинад»

РХИ-йы Хицауады Сæрдар Пухаты Эрикы разамындæй уагъд æрцыд рауæрæхгонд æмбырд министрадтæ æмæ ведомствоты къухдариуæггæнджыты, горæтты æмæ районты администрациты сæргълæуджыты хайадистæй, цыран 2017 азæн куысты сфидаргонд планы фæлгæтты Хицауады уæнгтæ бавдыстой бакæнгæ куысты тыххæй сæ хыгъдтæ.

Æмбырды райдайæны Пухаты Эрик банысан кодта, зæгъгæ, банысангонд рæстæгмæ республикæйы Хицауадмæ хыгъдтæ бавдыстой æрмæстдæр Паддзахадон таможнæйон комитет æмæ Фиддонты комитет. Уый бузныг загъта ацы ведомствоты къухдариуæггæн-джытæн сæ куысты хорз бæрæггæнæнты æмæ æнтысгæ куысты тыххæй.

«Мæн фæнды бузныг зæгъын ацы дыууæ ведомствойы къухдариуæггæнджытæн. Сымахæн ис хорз бæрæггæнæнтæ, æгæрыстæмæй, плæнттæ уæлдайджынтæй æххæст æрцыдысты азы фыццаг æмбисы. Фæлæ ууыл æрлæууын нæ хъæуы, хъæуы дарддæр дæр афтæ кусын. Хицауады дырыс куыст кæнгæ у йæ алы уæнгæй æмæ нæ алчи дæр бæрндзинад хæссы нæ иумæйаг куысты тыххæй», – банысан кодта Хицауады Сæрдар.

Дарддæр уынаффæ цыд  хъæууонхæдзарадон куыстытæм техникæйы цæттæдзинады фарстытыл, тыллæг æфснайынмæ техникæ куыд цæттæ у, ууыл. Æрæмбырдуæвджытæн уый фæдыл информаци сарæзта Хъæууон хæдзарады министр Пухаты Лев.

«Абоны бонмæ Хъæууон хæдзарады министрад кусы, республикæйы æппæт районтæй техникæйы уавæр æмæ цæттæдзинады тыххæй информаци æмбырд кæныны фæдыл æмæ нæ зонæнтæм гæсгæ, тыллæг æфснайынмæ цæттæ у йæ 80-90 проценты. Тыллæг æфснайыны æмгъуыдтæ кæнгæ сты æрмæст техникæйы цæттæдзинадæй нæ, фæлæ боныгъæдæй дæр», – загъта уый.

Хъæууон хæдзарады ведомствойы сæргълæууæгæн Хицауады Сæрдар бахæс кодта, цæмæй развæлгъау бæлвырд æрцæуой нæмыгон культурæты æфснайæн бынæттæ, уымæн æмæ æфснайыны уавæртимæ баст   æркæнгæ продукцийы дарддæры гъæд. Пухаты Эрик ма банысан кодта, зæгъгæ, нæм цы техникæ ис, уый дзæгъæлы ма хъуамæ лæууа, хъуамæ рæстæгыл лæвæрд цæуа фермертæм æмæ уыимæ ныфс бавæрдта, хъæууонхæдзарадон техникæйæ ифтонг кæныны фарст республикæйы разамынад кæй скъуыддзаг кæндзæн цадæггай.

Æнæниздзинад хъахъхъæныны æмæ социалон рæзты министр Тотчиты Георги фехъусын кодта, зæгъгæ, ныртæккæ йæ дæлбар ведомствойы куыст цæуы республикæйы хосгæнæн препараттæй ифтонг кæныныл. Йæ ныхæстæм гæсгæ, фарст скъуыддзаг цæуы уыцы закъондæттынадон бындурыл, кæцы ис республикæйы, бæлвырддæрæй та «Хосгæнæн препаратты æрзылды тыххæй» закъонмæ гæсгæ. Ацы закъоныл æнцой кæнгæйæ, Æнæниздзинад хъахъхъæныны министрад сарæзта тендерон къамис, кæцы бæлвырд кæны иу кæнæ иннæ хосæрвитæджы.

«Закъазтæ æрвыст æрцыдысты асты бæрцы алыгъуызон хосæрвитджытæм æмæ дзуаппæн райстам коммерцион фæндæттæ. Уыдонæн анализ арæзт æрцæудзæнис æмæ равзардзыстæм ахæм механизм, кæцы нын дарддæр фадат ратдзæн Республикæ Хуссар Ирыстоны территоримæ хосгæнæн препараттæ легалон æгъдауæй ласын, ифтонг кæнынæн. Мах æрæвнæлдтам коммерцион фæндæттæн аргъ кæнынмæ, цæмæй сбæрæг кæнæм иууыл хæрзвадатдæр æргъты политикæ. Æмæ æрбалæугæ къуырийы æмбисмæ мах аскъуыддзаг кæндзыстæм, хосгæнæн препараттæ нæм чи ласа, уыцы компаниты равзарыны фарст», – загъта Тотчиты Георги.

Уый ма куыд бамбарын кодта, афтæмæй æнæнæиздзинад хъахъхъæныны къабазы Инвестицион программæйы фæлгæтты цъус медицинон уагдæттæ арæзт не ‘рцыдысты æмæ ма уæрæсейаг коллегæтимæ куыст цæуы, цæмæй ифтонг æрцæуой кадртæй.

Республикæйы астæуккагахуырадон скъолатæ рог цалцæг скæнынмæ куыд цæттæ сты, уый тыххæй æмбырды радзырдта Ахуырад æмæ зонады министры хæдивæг Гаглойты Элиса. Йæ ныхæстæм гæсгæ,  горæт  Цхинвалы администраци ныфс æвæры уыцы куыстытæ 10 августмæ фæуын.

Министры хæдивæг ма банысан кодта, зæгъгæ, цы фæрæзтæ сэкономи кодтой, уыдоны хыгъдæй министрад фæнд кæны скъолатæн æппæт æнæмæнгхъæуæг ахуыргæнæн чингуытæ балхæнын.

«Махæн рауад чысыл экономи «Хæлц» статьямæ гæсгæ æмæ скъуыддзаг æрцыд, цæмæй уыцы фæрæзтæ ахыгъд æрцæуой библиотекæты фондмæ. Горæты скъолатæн фарастæм къласмæ æлхæд æрцыдысты æппæт æнæмæнгхъæуæг ахуыргæнæн чингуытæ, районон скъолатæн та – æппæт кълæстæн дæр. Ацы куыст, зæгъæн ис, æххæст æрцыд æмæ ныртæккæ бадзырдтæ фæуд кæнынц, кæмæй сæ ласæм, уыдонимæ», – радзырдта Гаглойты Элисо.

Культурæйы министрады ныртæккæ цæуы, афæдзы райдианмæ плангонд чи уыд, уыцы куыст. Уыдон сты республикæйы районтæм цæугæ мадзæлттæ æмæ концертон програм-мæтæ. Министр Зассеты Жаннæйы информацимæ гæсгæ, æрвылбонон куысты æдтейæ ма ведомство кусы йæ дæлведомствойон организацитæн, бæлвырддæрæй та Галаты Барисы номыл Паддзахадон ансамбль «Симд» æмæ Хетæгкаты Къостайы номыл Паддзахадон драмон театрæн кадрон резерв бацæттæ кæныныл.

«Махæн тынг нæ фаг кæнынц кадртæ. Уæлдайдæр та режиссертæ уырыссаг æмæ ирон хайадтæн. Хъæуынц техникон кусджытæ дæр. Кадртæ баххæст кæныны Программæмæ гæсгæ, мах Хицауадæй домдзыстæм, цæмæй нын баххуыс кæна», – загъта Зассеты Жаннæ.

Æмбырды кæронбæттæны Пухаты Эрик æрсидт алкæмæ дæр  æххæсткæнынадон дисциплинæмæ, министрадты æмæ ведомствоты æнгом, дырыс куыстмæ.

РХИ-йы Хицауады официалон сайт