Хъæууонхæдзарадон фадыджы дыууæфарсон æмгуысткæнынады райрæзты перспективæтыл уынаффæ кодтой Республикæ Хуссар Ирыстоны Хъæууон хæдзарады министрады сæргълæууæг Пухаты Лев æмæ Уæрæсейы Федерацийы Хъæууон хæдзарады министры хæдивæг Евгени Громыко. Уæрæсейы Федерацийы Хуссар Ирыстоны минæварады пресс-службæ куыд фехъусын кодта, афтæмæй дыууæ министрады къухдариуæггæнджытæ фембæлдысты Уæрæсейы Федерацийы Хъæууон хæдзарады миистрады.

«Фембæлды рæстæджы уынаффæ цыд хъæууон хæдзарады фадыджы дыууæфарсон æмгуысткæнынады рæзты перспективæтыл, уыцы нымæцы республикæйы фосдарды æмæ халсаргуыст райрæзын кæнын, афтæ ма ветеринарон æмæ фитосанитарон хъусдарды фадыджы æмархайды фарстатыл. Уыимæ иумæ уынаффæ цыд Уæрæсейы Хъæууон хæдзарады министрады фондæй хъæууонхæдзарадон техникæ райсын æмæ хуссарирыстойнаг аграрон проектты реализацийæн баххуыс кæныныл», — радзырдтой пресс-службæйы.

Евгени Гормыко хуссарирыстойнаг фарсæн бацамыдта хъусдард аздахын мæры культивацимæ,  къорд комплексон мадзал бацæттæ кæнын æмæ ауадзынмæ, кæцытæ домдзысты алыгъуызон фадгуыты специалистты иумиаг хайадист. Министры хæдивæг ма цæттæдзинад равдыста 2017 азы фæззæджы хуссарирыстойнаг кадрты квалификаци фæбæрзонддæр кæнынæн баххуыс кæнын.

Пухаты Лев бузныг загъта Евгени Громыкойæн, конструктивон фæмбæлды тыххæй æмæ ныфс бавæрдта уæрæсейаг специалисттимæ æнгом æмархайдæй республикæйы аграрон къабаз кæй рæздзæн эффективонæй æмæ динамиконæй. Хуссарирыстойнаг министр ма фехъусын кодта, зæгъгæ, Президент Бибылты Анатолийы инициативæйæ Хуссар Ирыстоны Хъæууон хæдзарады министрады  кадрон резервы æвæрд æрцы-дысты хъæууон хæдзарады уæлдæр ахуыргæнæндæтты студенттæ æмæ ахуыргæнинæгтæ.

Фембæлды хайад райстой Уæрæсейы Федерацийы Республикæ Хуссар Ирыстоны Уæлвæткон æмæ æххæстбарджын минæвар Гасситы Знауыр æмæ Республикæ Хуссар Ирыстоны Хъæууон хæдзарады министры хæдивæг Дзукъаты Алан.

Comments are closed, but trackbacks and pingbacks are open.