Нæ республикæйы фæстаг рæстæджы байгом ис бирæ тренажерон залтæ. Уыдон арæзт цæуынц Хуссар Ирыстоны физикон культурæ æмæ спорт райтынг кæныны концепцийы фæлгæтты бакуыстгонд программæ «Спорт в шаговой доступности»-йы руаджы. Ацы программæйы фæрцы нæ республикæйы сæйраг горæты æмæ районты байгом ис бирæ тренажерон залтæ. Уыдон ахъаз фæуыдзысты сомбоны æнæниз фæлтæр схъомыл кæнынæн, афтæ ма фæси-вæдæн уыдзæн, сæ сæрибар рæстæг кæм æрвитой, ахæм бынат.
Иу ахæм тренажерон зал та байгом ис 1-æм марты нæ горæты Хъайтарты уынджы, нæ Паддзахадон телеуынынады районмæ хæстæг бирæуæладзыгон хæдзæртты цур цы артгæнæн уыдис, уым. Артгæнæн бирæ азты дæргъы йæ куыст кæй нал кодта, уымæ гæсгæ æдзæллаг уавæрмæ æрцыдис. Уæд ацы районмæ хæстæг цæрæг фæсивæды минæвæрттæ ам сфæнд кодтой тренажерон зал саразын. Уыдон ын йæ агъуыст цалцæг кæнынмæ бавнæлдтой сæхи тыхтæй. Сæ фарсмæ æрбалæууыдысты нæ республикæйы къух-дариуæгад æмæ иумиаг тыхтæй арæзт æрцыд уæлдæр загъдгонд бынаты тренажерон зал. Спортивон ифтонггæрзтæй та ифтонг æрцыдис «Спорт в шаговой доступности»-йы руаджы. Иу дзырдæй, ацы районы фæсивæдæн ахæм тренажерон зал æнæмæнгхъæуæг кæй уыдис, уымæ гæсгæ æхсæвæй бонæй зæрдиагæй архайдтой æмæ йæ саразын сæ къухы бафтыд.
Ацы тренажерон зал байгом кæнынмæ æрбацыдысты нæ республикæйы Президент Тыбылты Леонид, Президенты паддзахадон уынаффæгæнæг Джиоты Руфин, горæт Цхинвалы администрацийы сæргълæууæджы хæдивæг Пухаты Димитр æмæ æндæртæ. Тренажерон зал гом кæнынмæ ма æрбацыдысты ацы районмæ хæстæг цæрджытæ æмæ фæсивæд. Уыдон иууылдæр æвдыстой сæ цины æнкъарæнтæ, сæ цæрæн хæдзæрттæм хæстæг сын ахæм тренажерон зал кæй фæзынд, уый тыххæй.
Тренажерон зал куыд арæзт æрцыдис, цавæр спортивон инвентарæй æрцыдис ифтонг, йæ бæстыхайы иумæйаг уавæры тыххæй æмæ æппæт уыдæттимæ базонгæ ис Президент Тыбылты Леонид. Уый ацы залы саразыныл чи бакуыста, уыдоны æмæ æппæт æрæмбырдуæвджыты раз йæ хъуыдытæ загъта:
– Мæнæн æхсызгон у сымах ацы тренажерон залы саразыныл кæй бакуыстат æмæ йыл кæй цин кæнут. Уымæ гæсгæ уын арфæ кæнын, ахæм зал уын абон кæй байгом ис, уый тыххæй!
Ацы зал цы программæйы фæлгæтты байгом ис «Спорт в шаговой доступности», зæгъгæ, уымæй йæ куыст ууыл нæ фæци, мах ыл дарддæр дæр хъуамæ кусæм, цæмæй нæм ноджы фæзыной ахæм тренажерон залтæ нæ горæты æндæр рæтты дæр афтæ ма республикæйы районты æмæ хъæуты дæр. Уый та ахъаз фæуыдзæн, фидæны æнæниз фæлтæр схъомыл кæнынæн.
Мæн та абон бузныг зæгъын фæнды ацы зал саразыныл чи бакуыста æппæт уыцы лæппутæн, сымах алцыдæр уæхи къухæй сарæзтат æмæ уын дзы рæсугъд зал кæй рацыд, уый мын тынг æхсызгон у. Æнæмæнгхъæуæг спортивон инвентарь та уын æлхæд æрцыдис Президентон фондæй æмæ уын мæ зæрдæ зæгъы, цæмæй сæ зæрдæрухсæй пайда кæнат. Уымæн æмæ йæ абоны цард куыд уынын кæны, афтæмæй æнæ спортæй цард зын у. Уымæн æмæ спорт у æнæниздзинады сæйраг фæрæз æмæ адæймаг æнæниз куы вæййы, уæд царды фæзыны бирæ ног хъуыдытæ æмæ фæндтæ. Ахæм хорз хъуыдытимæ мах дæр хъуамæ аразæм нæ фидæн.
Ноджыдæр ма йæ æз зæгъдзынæн: ацы зылды цæрджытæн тренажерон зал кæй фæзынд, уый мын у æхсызгон æмæ мæн бафæндыд, цæмæй дзы кæстæр кары минæвæрттæ дæр активонæй цайдагъ кæной. Уæд, мæнмæ гæсгæ уыдонæн къаддæр уыдзæн сæ сæрибар рæстæг дзæгъæлы сафынæн. Уæдæ дзы ноджыдæр райгондæй пайда кæнут!
Ацы тренажерон зал куыд арæзт æрцыд, чи йыл бакуыста стæй æппæт йæ хæрдзты æмæ куыстыты тыххæй нæ республикæйы Президенты базонгæ кодтой Цъæхилты Игорь æмæ Дыгъуызты Вадим.
Уыдон ма нæ республикæйы Президенты базонгæ кодтой сæ дарддæры куыст куыд организаци цæудзæн, цы цухдзинæдтæ ма сын баззад аиуварскæнинаг, уыимæ. Банысан ма кодтой уыдон, зæгъгæ, ма хорз уаид йæ алыварс хæрзарæзт куы æрцæуид.
Тренажерон зал арæзт кæй æрцыд, уый тыххæй ма йæ хъуыдытæ загъта Джиоты Руфин. Уый банысан кодта, зæгъгæ, нæ фæсивæд спортмæ кæй тырнынц, уый хорз хъуыддаг у. Уымæн æмæ спорты руаджы махæн схъомыл уыдзæнис сомбоны æнæниз фæлтæр.
Уый ма бузныг загъта республикæйы къухдариуæгадæн спортмæ сæ хъус кæй дарынц, уый тыххæй.
Цæрджыты номæй та Президент Тыбылты Леонидæн бузныджы ныхæстæ загъта ацы зылды цæрæг Тадтаты Зæлинæ. Уый ма загъта, зæгъгæ, раздæр ахæм спортивон залтæ уыдтам мах Уæрæсейы горæтты. Мах-иу ахæм залтæм кодтам тæхуды, фæлæ дзы ныр сымах руаджы фæзынд нæ республикæйы бирæ рæтты æмæ уын уый тыххæй зæгъын стыр бузныг, загъта йæ раныхасы Тадтаты Зæлинæю
Тыбылты Леонид ацы залмæ æрбацæугæйæ æппæт фарстатимæ куы базонгæ ис, уæд ма загъта, зæгъгæ, ацы зал лæвæрд æрцæудзæнис горæты спорты хайады балансмæ æмæ уæд иннæ проблемæтæ дæр цадæггай иуварс цæудзысты. Нæ республикæйы сæргълæууæг ма, залы чи архайдзæн, уыдонæн та лæвары хуызы балхæндзæн телевизор спутникон антеннæимæ.
Туаты Ларисæ
Comments are closed, but trackbacks and pingbacks are open.