Рæстдзинад æмæ закъондзинадыл æнувыд уæвгæйæ

Кæд Советон Цæдисы ныппырхимæ бирæ-бæрцæй банымæг сты коммунистон партийы идейæтæ, уæддæр коммунизмы идеологийы фарсхæцджытæ абон дæр кусынц æмæ архайынц адæмы, æхсæнады раз сæ позицитæ фæхуыздæр кæныныл. Нæ республикæйы Коммунистон партийы горæтон хайады архайды тыххæй нæ уацхæссæг ныхас кодта йæ сæрдар Кокойты Асиатимæ.

– Асиат, Хуссар Ирыстоны Республикон Коммунистон партийы Цхинвалы горæ-тон хайады цал уæнгы ис æмæ куыд активон сты æхсæнадон царды?

– Нæ хайады ис 376 коммунисты. Æхсæнадон царды сты активон. Горæты нын цы 36 райдиан партион организацийы ис, уыдонæй алчи дæр æххæст кæны йæ разылæууæг хæстæ. Алчи дæр сæ архайы хорз, фæлæ уал абон ракæндзынæн Гæбæраты Екатеринæ, Тедеты Нона, Тедеты Заремæ, Æлборты Анатоли æмæ æндæрты кой. Уыдон сæхи хъæппæрисæй æрыгон коммунистты разæнгард кæнынц рæстдзинад, куыст æмæ фыдыбæстæ уарзынмæ.

– Фаронимæ абаргæйæ уæ коммунисттæ фылдæр фесты æви фæкъаддæр сты?

– 2019 азы нæм æрбацыд дæс æвзонг лæппу æмæ чызджы. Не ‘хсæн сты æмæ патрион царды сæхи активондæрæй æвдисынц Бестауты Аллæ, Козаты Ушанг, Æлборты Феликс, Цхуырбаты Анжелæ, Тедеты Ацæмæз æмæ æндæртæ.

– Советон Цæдисы Коммунистон партийы идейæтæй цы бахъахъхъæдтат, кæнæ дзы уæ къух цæуыл систат?

– Советон Цæдисы Коммунистон партийы идейæтæй æппаргæ ницы акодтам. Уымæн æмæ иууылдæр дзурæг сты адæм æмæ паддзахады фæрныгадыл. Нæ абоны сæйраг хæстæ дæр уыдон сты. Парахат кæнæм рæстдзинад, адæм æмæ фыдыбæстæм уарзондзинад. Ис нын æнтыстытæ. Нæ коммунисттæ алы хатт дæр хайад райсынц æхсæнадон хъуыддæгты .

– Ацы азæй рацыд фараст мæйы, цы куыст бакодтат æмæ ма уын азы фæуд-мæ цы ис бакæнинаг?

– Азы райдианæй нæ сæйрагдæр хæс уыд, цæмæй нæхи бацæттæ кæнæм Хуссар Ирыстоны радон парламентон æвзæрстытæм. Сæххæст кодтам, нæ разы цы хæс-тæ æвæрдтам, уыдон. Нæ партийæ æвзæрстыты хайад иста 23 кандидаты, уыдонæй цыппæрдæс уыдысты иумандатон зылдтæй. Бацахстам цыппæрæм бынат. Нæ кандидаттæ дыууæйæ – Уырыгаты Инал æмæ Гаглойты Малхаз систы депутаттæ. Уырыгаты Инал Парламенты æвзæрст æрцыд Ахуырад æмæ зонады комитеты сæрдарæй. Сæ дыууæ дæр ныридæгæн цалдæр хатты фембæлдысты се ‘взарджытимæ. Æрдзурынц аскуыддзагкæнинаг фарстатыл. Мæй иу хатт ауадзæм бюройы рабадт, æртæ мæй иу хатт та – пленум. Ныхас сæм фæцæуы бюройы уæнгтæн хæстæ раттын, партийы рæнхъытæм ног уæнгтæ райсын æмæ æндæр фарстатыл. Ныртæккæ нæхи цæттæ кæнæм ног бюро ауадзынмæ цæмæй лæмбынæг æрдзурæм афæдзы райдианæй фæстæмæйы куыстыл, æруынаффæ кæнæм, аразинаг нын цы баззад, уыдоныл.

– Уæ хайады уæнгтæ, сæйраджыдæр, цахæм хæстæ æвæрынц сæ разы, цы у сæ архайды нысан?

– Нæ партийы уæнгтæ сты закъæттæ æххæсткæныныл æнувыдæй чи архайы, рæстдзинад йæ царды сæйраг нысан кæмæн у, ахæм, æууæнкджын æмбæстæгтæ. Райдиан партион организациты архайдæй зæрдæ рухс кæны.  Æцæг, ивгъуыд аз нæ партийы уæнгтæй иу адæймаг фехæлдта æгъдау æмæ фæткы нормæтæ æмæ уый тыххæй ацух æрцыдис нæ рæнхъытæй.

– Фæстаг парламентон æвзæрстыты уæ партийы къухыбафтгæ фæстиуджытæн цахæм аргъ кæныс?

– Æнхъæлмæ кастыстæм хуыздæр фæстиуджытæм. Афтæ уымæн зæгъын æмæ æвзæрстыты размæ хорз бакуыстам. Уæлдай активондæрæй сæхи равдыстой горæты ахуырады хайады раидиан партион организаци, йæ сæргълæууæг Тыбылты Эдуард.

– Бирæтæ, стæй мæхæдæг дæр нымайын, партион фиддонты бæрц æгæр цъус кæй у. Иу мæй 10 сомы йедтæмæ кæй нæу, уый тыххæй та цахæм у дæ хъуыды?

– Нæ сæйраг хæс фылдæр фæрæзтæ æрæмбырд кæнын нæу. Ис æндæр, ахсджиагдæр фарстытæ æмæ нæ тыхтæ дæр здахæм уыдонмæ. Нæ коммунистты иу хай сты пенсиисджытæ, кæцыты, хостæй дарддæр, æлхæнын хъæуы æндæр æнæмæнгхъæуæг продукттæ, уæлæдарæс, фиддонтæ. Коммунисттæй бирæтæ бахæссынц фиддонтæ фæфылдæр кæныны фæндон, фæлæ нæма хъавæм йæ фæфылдæр кæнын.

– Цахæм бастдзинæдтæ уын ис коммунистон партийы æндæр горæтты коммунистон партон организацитимæ?

– Хорз бастдзинæдтæ нын ис Дзæуджыхъæу æмæ Мæскуыйы раидиан партион организацитимæ. Уымæй дарддæр ма нæ делегаци Мæскуымæ исты мадзæлтты тыххæй куы ацæуы, уæд нын фембæлдтытæ вæййы Беларус, Украинæ, Туркмени, Узбекистан, Азербайджан, Сомих æмæ æндæр бæстæты райдиан партион организациты разамонджытæ æмæ минæвæрттимæ. Уыдон се ‘ппæт дæр зонгæ сты нæ куыстимæ, æмбарынц нæ æмæ нæм равдисынц хорз ахаст.                                                                                               

Гӕззаты Иван