2018-æм азы бакæнгæ куыстæн хыгъд дæтгæйæ, РХИ-йы Æнæниздзинад хъахъхъæныны æмæ социалон рæзты министр Тотчиты Георги, банысан кодта, сæ архайды сæйрагдæр приоритетон фæдыздæхт кæй у рынчынтæн гъæдджын медицинон æххуыс бакæнын. Уыцы нысанæн Хицауады уынаффæмæ гæсгæ Республикон бирæпрофилон медицинон центрмæ баиугонд æрцыдысты 11 медицинон уагдоны, уыдоны нымæцы Цхинвалы горæтон æмæ Цхинвалы районон поликлиникæты дæр. Ам медицинон кусджытæн арæзт æрцыдысты æппæт уавæртæ дæр сæ куыстæн, стационары цы рынчынтæ вæй-йынц, уыдонæн бæрæг фæхуыздæр сты сæ уавæртæ.
Æдæппæтæй министрады системæйы уæвынад кæнынц 74 медицинон уагдоны (2017-æм азы та уыдысты 84).
Капиталонæй цалцæг æрцыдис рæуджыты низæй хосгæнæн диспансер, æлхæд ын æрцыдис æнæмæнгхъæуæг медицинон ифтонггæрзтæ, инвентарь æмæ министр куыд банысан кодта, уымæ гæсгæ ахъаз уыдзæнис рынчынтæн хуыздæр схос кæныны хъуыддагæн. Кусын райдыдтой операцион-хирургион корпус компьютерон тамографийы хайадимæ. Йæ куысты райдианæй нырмæ басгæрстой 270 рынчыны æмæ уый ахъаз фæцис низты диагностикæ фæхуыздæр кæнынæн.
Ныридæгæн куыст цæуы, цæмæй скусой гемодиализ æмæ тугуадзæн службæты хайадтæ. Кæронмæ фæцис медико-социалон центры арæзтад дæр æмæ кусын райдайдзæнис ацы азы фыццаг кварталы, цы ран тынг хорз уавæртæ уыдзæн æвæгæсæг зæрæдтæ æмæ сахъатджынтæн, афтæ ма паллиативон æххуыс кæндзысты инкурабелон рынчынтæн(схосгæнæн кæмæн нал ис, ахæм рынчынтæн).
Министр радзырдта, æдæппæтæй йæ дæлбаруæвæг медицинон уагдæтты дохтыртæ æмæ иннæ медперсонал штаттæм гæсгæ цас сты, стæй сæ куыст-мызд цас у, æппæт уыдæттыл. Дохтыртæн астæуккаг нымадæй йæ куыстмызд у 24 012 сомы бæрц, астæуккаг медперсоналæн та 17 658 сомы бæрц, кæстæр медперсоналæн та 11 901 сомы.
Кадртæй ифтонг кæныны хъуыддаг медицинон къабазы у иууыл ахсджиагдæр. Хыгъдон рæстæджы куыстæй ифтонг æрцыдысты 6 дохтыры. Анестезиологон службæ фæтыхджындæр кæныны тыххæй Республикон бирæпрофилон медицинон центрмæ Цæгат Ирыстон-Аланийæ кусынмæ фæхуыдтой специалисты. Министр куыд банысан кодта, афтæмæй этапгай скъуыддзаг цæудзæн медицинон кадрты дефицит. Ныртæккæ иууыл тынгдæр хъæуынц реаниматолог-анестезиолог, тагъд æххуысы станцы дохтыр, патологоанатом, цæсгомы хирург æмæ æндæр специалисттæ. Уый тыххæй активон куыст цæуы уæрæсейаг специалисттимæ, цæмæй бахъуыды рæстæджы профилон æххуыс кæной.
2018-æм азы нæ республикæйы куыстой уæрæсейаг специалисттæ эндоскопи, психиатри æмæ неврологийы, анестезиологи æмæ реаниматологи, сывæллæтты хирургийы фæдыздæхтыты. Уымæй дарддæр ма хыгъдон рæстæджы 32 дохтыры квалификаци фæбæрзонддæр кæныны курсытæ рацыдысты Уæрæсейы Федерацийы æндæр æмæ æндæр клиникæты. Цхинвалы медицинон ахуыргæнæндоны базæйыл та курсытæ рацыдысты 150 медицинон хойы. Ауагъд ма æрцыдис дохтыртæ æмæ медицинон хотæн аттестаци дæр.
Министр æрдзырдта нæ республикæйы цæрджыты фыццаг рады иууыл тынгдæр цавæр низтæ тыхсын кæнынц, уыдоныл. Фыццаг бынаты куыд æндæраз, афтæ 2018-æм азы дæр сты улæфæн органты низтæ, дыккаг бынаты зæрдæ æмæ тугдадзинты низтæ æмæ æртыккаг бынаты та – хæринагтайæн органты низтæ. Министр ма æрдзырдта республикон рынчындоны куыст æмæ уавæры тыххæй. Æдæппæт не мбæстæгтæй Уæрæсейы Федерацимæ бæрзондтехнологион æххуыс райсыны тыххæй æрвыст æрцыдысты 665 рынчыны. Уымæй дарддæр ма организацион-аналитикон куыст цæуы Гуырдзыстоны клиникæтæм æрвыст чи æрцæуы, уыцы рынчынты тыххæй. 2018-æм азы уырдæм æрвыст æрцыдис 161 рынчыны, 2017-æм азы та уыдысты 204 рынчыны. Гуырдзыстонмæ æрвыст æрцæуынц ахæм рынчынтæ, кæцытæн арвитæн нæ вæййы Цæгат Ирыстонмæ, уымæн æмæ вæййынц уæззау, критикон уавæры.
Йæ раныхасы министр банысан кодта, гуырæн хæдзар гинекологион хайадимæ кæй у нæ республикæйы иунæг ахæм медицинон уагдон, цыран медицинон æххуыс бакæнынц сывæрджын сылгоймæгтæн æмæ гинекологион рынчынтæн. Ног бæстыхайы сырæзтимæ ам зынгæ фæхуыздæр уыдзысты хос кæныны фадæттæ æмæ уавæртæ. Ног гуырæн хæдзар ныртæккæ ис арæзтадон процессы æмæ дзы уыдзæнис 35 бынаты. Ивгъуыд аз уырдæм бахаудта 363 сылгоймаджы æмæ дзы райгуырд 363 сывæллоны (2017 азы та 331).
Республикон тагъд æххуысы станц лæггад кæны Цхинвал æмæ Цхинвалы районы хъæуты цæрджытæн. Вæййы ма афтæ дæр æмæ сæ бахъæуы республикæйы районтæм тагъд æххуысмæ атындзын дæр, кæд районты ис ахæм бригадæтæ, уæддæр. 2018 азы уыдон ацыдысты 24158 рынчынмæ тагъд медицинон æххуыс сын бакæныны тыххæй.
Тотчиты Георги ма æрдзырдта диспансерты куысты тыххæй дæр. Рæуджыты низæн хосгæнæн диспансеры ныртæккæ хыгъды лæууынц 341 рынчыны. Уыдонæй активон туберкулезимæ ис 26 рынчыны. Ивгъуыд аз схос кодтой 12 рынчынæн. Аст мæйы дæргъы стационар уыдис цалцæггæнæн куыстыты.
Психоневрологион диспансеры та хыгъды лæууынц 1728 рынчыны, уыдонæй сывæллæттæ сты 271 (2017 азы – 410). Стационарон хоскæнынмæ Цæгат Ирыстон-Аланимæ психиатрон рынчындонмæ та æрвыст æрцыдис 23 рынчыны. Амбулаторон рынчынтæ ифтонг цæуынц æнæмæнгхъæуæг психотропон хостæй.
Республикон наркологон диспансер æххæст кæны наркомани æмæ нозтыл хæст чи у, уыцы рынчынты сбæрæг кæныны куыст. Консультативон æмæ диагностикон æххуыс бакæны ахæм рынчынтæн. Афтæ ма нæ республикæйы скъоладзаутæн фæуадзынц профилактикон куыст дæр. Цæстарды бын ис 383 рынчыны.
Пансионат «Забота»-йы ис 30 бынаты æмæ дзы ныридæгæн цæры 19 адæймаджы. Ныртæккæ скъуыддзаг цæуы пансионат ног бынатмæ рахæссыныл, кæцы уæвынад кæндзæнис ногарæзт медико-социалон центры.
Министр дарддæр æрдзырдта цæрджытæй хатырон медицинон лæггæдтæй чи пайда кæны, уыдоны лæвар хостæй ифтонг кæныны хъуыддаг æвæрд кæй у æмбæлон æмвæзадыл. Æххæстæй ифтонг сты стационарон æмæ амбулаторон хосгæнæн уагдæттæ æнæмæнгхъæуæг хостæй æмæ бæттæн æрмæджытæй. Бæрæг куыд у, афтæмæй сæкæрниз, рæуджыты низ, онкологион низтæ, гепатит С, психикон æмæ ма æндæр низтæй рынчынтæ дæр ифтонг цæуынц æнæаргъ хостæй.
Тотчиты Георги радзырдта цæрджытæн социалон æххуысы тыххæй дæр. Хыгъдон рæстæджы хатырон категорийы æмбæстæгтæн социалон æххуысы фæдыл бахардз 5 138 400 сомы бæрц. Адресон социалон æххуыс та райстой 1249 адæймаджы 13 359 719 сомы.
Хыгъдон æмбырды хайад райста Республикæйы Хицауады Сæрдар Пухаты Эрик æмæ йæ хъуыдытæ загъта, министрады бакæнгæ куысты фæдыл. Банысан кодта, азæй азмæ медицинон æххуысы гъæд кæй рæзы æмæ хуыздæр кæй кæны, уый.
Цхуырбаты Ларисæ
Comments are closed, but trackbacks and pingbacks are open.