Сæрды бонты, уæлдайдæр та, ацы сæрды тæвд бонты адæймаджы йæ зæрдæ фæхæссы донбылмæ. Советон дуджы нæ æрдзы æнæнизгæнæн миниуджытæ дардыл хъуыстгонд уыдысты. Цы туристтæ-иу нæм æрцыд, уыдон Ирыстонæй здæхтысты райгондæй. Фæстаг азты бирæ дзырд цæуы нæ республикæйы улæфæн индустри райрæ-зын кæныны тыххæй, фæлæ хъуыддаг йæ бынатæй нæма фенкъуыст.

Уый хыгъд фæзынд хицæн адæймæгтæ, кæцытæ бындур æрæвæрдтой уыцы хъуыддагæн. Нæ ныхасы сæр Цхинвалы районы Къостайыхъæуы цæрæг Тедеты Тамаз, Къостайыхъæуы кæрон цы цад ис, уым улæфæн комплекс «Шад» кæй аразы, ууыл.

Ацы бынат у фенддаг. Уалдзæг æмæ фæззæджы ам æрбынат кæнынц алыгъуызон хъæддаг мæргътæ. Рагæй фæстæмæ ацы цад уарзон у канд Цъунары цæрджытæн нæ, фæлæ ма нæ горæты цæрджытæй дæр бирæтæн. Сæрдыгон æнтæф бон цады был бадгæйæ, адæймаг уæлдæфы сатæг уддзæфæй исы æхцондзинад. Ныр ам уавæртæ арæзт куы æрцæуа, уæд æм улæфджытæ цæудзысты æнæзивæгæй.

Тедеты Тамаз нын йæ амалиуæгадон архайды тыххæй радзырдта: «Ам уал ныридæгæн æвæрд æрцыд сæрдыгон мæнгагъуыстытæ, уырыссаг абана, дарддæр дзы арæзт æрцæудзæн ресторан».

Йæ фæнд у цады былгæрæтты 1,400 метры дæрддзæгæн алыгъуызон хиирхæфсæнтæ саразын. Ам ныридæгæн арæзт æрцыд сабиты хъазæн фæзуат, фæлæ йæ фæстæдæр баххæст кæндзысты ноджыдæр спортивон фæ-зуæттæй. Ныртæккæ дзы цы сæрдыгон къæбиц ис, уым бар нæй карз нозт уæйкæнынæн. «Махмæ уыдзæн ирон къæбицы равзаргæ хæринæгтæ. Нозтæй нæм иууыл карздæр ис бæгæны. Адæм хъуамæ сахуыр уой æнæ нозтæй рæстæг æрвитыныл. Æрдзы хъæбысы æнæмæнг нæу фыднозт кæнын. Æз бар нæ дæтдзæн цады алыварс чъизи кæнынæн дæр», — зæгъы Тедеты лæппу.

Къостайыхъæуы цады былыл улæфæн зонæ кæд нырма ацы аз райдыдта рæзын, аразинæгтæ дзы нырма бирæ ис, уæддæр Тедеты Тамаз йе уонг нæ уадзы. «Шад» йæ ныхæстæм гæсгæ хъуамæ суа канд сæрдыгон найæн нæ, фæлæ æрвылсезонон улæфæн бынат. Зæгъы, зæгъгæ, афæдзы алы афон дæр ам уыдзæн улæфынæн хорз фадæттæ. Фæззæг æмæ уалдзæджы ам вæййы диссаджы рæсугъд мæргътæ. Цуангæнджытæ уыдоны фæмарынц æнæвгъау. Тамаз куыд зæгъы, афтæмæй æмбæлон структурæты æххуысæй уый хъавы ацы мæргъты марын мауал уадзын. «Хърихъуппытæ æмæ пеликантæ æнцон æхсæн сты, уыдон амарынц, аннæ мæргътæ та цуангæнджытимæ цы цуанонтæ вæййы, уыдон тасæй сæ сæртæ фесафынц. Мæн фæнды уыцы мæргъты адæмыл æрцахуыр кæнын», — загъта ма уый.

«Æз хъомыл кодтон Знауыры районы Аунеуы хъæуы. Мæ зæрдыл лæууы, Советон дуджы-иу ардæм куыд кодтой туристты. Бæлццæттæ-иу дис кодтой ацы бынаты рæсугъддзинадыл. Ныр æз бæллын ацы бынат ноджы тынгдæр срæсугъд кæнынмæ. Æртæ мæнгагъуыст йедтæмæ нæм нæй арæзт, фæлæ æз мæ фыд æмæ ме ‘фсымæртимæ хъавын комплекс ноджы фæуæрæхдæр кæнын. Къостайыхъæуы цад горæтмæ бынтон хæстæг у, цæмæннæ ис гæнæн ам саразын велосипеды фæндæгтæ, цæмæй фæсивæд æнæниз цардуаг кæной. Ивгъуыд къуыри нæм уыд чындзæхсæв дæр», — загъта ма Тедеты лæппу.

Уый ма нын радзырдта йæ планты тыххæй дæр. Зымæджы бонты йæ зæрды кæй ис ацы бынаты уырыссаг абана æмæ бассейн саразын дæр. Уыцыиу рæстæджы ам сырæздзæнис, нырыккон домæнтæн дзуапп чи дæтта, азæм ресторан дæр. Ам цыдæриддæр арæзт цæуы, уыдон сты бынæттон дур æмæ хъæдæрмæгæй конд. «Ресторан арæзт æрцæудзæн рагон ирон колорит чи хæсса, ахæм элементтæй — æртыкъахыг ирон фынг, бандæттæ, рухсгæ-нæнтæ. Кухнийы цы хæринæгтæ уа, уыдон дæр уыдзысты националон», — зæгъы амалиуæггæнæг.

Уый ма нын куыд загъта, афтæмæй ацы бынат арендæйы райста 2030 азмæ. Ны-ридæгæн ныссыгъдæг кодта цад брæттæй. Ауагъта дзы кæсаджы цалдæр мыггаджы дæр.

Уазæгты М.

Comments are closed, but trackbacks and pingbacks are open.