Æппæтуæрæсейон этнографион диктанты хуссарирыстойнаг уæлахиздзау

Уæрæсейы 3 наябрæй 8 ноябрмæ ауагъдæуыд Æппæтдунеон акци «Большой этнографический диктант», кæцы у рухсадон проект æмæ дзы хайад райстой милуангай адæймæгтæ. Ацы диктант уадзынц 2016 азæй фæстæмæ æмæ йæ хайадисджытæ азæй-азмæ фылдæр кæнынц. Вæййы дзы 30 тестон хæслæвæрды — 20 фарсты федералон тематикæйæ, 10 та — национ спецификæимæ баст. Банысан кæнын хъæуы уый, æмæ фарстытæй иу дæр нæ вæййы скъолайы программæйæ ист, гъе, уымæ гæсгæ диктанты хайадисæгæн йæ эрудицийы æмвæзад хъуамæ уа бæрзонд.

Уæрæсейы Мидхъуыддæгты министрады Нижегородскы академийы курсанттæ дæр балæууыдысты акцийы хайадисджыты рæнхъыты æмæ уыдоны ʻхсæн уыдысты æхсæз хуссарирыстойнаг ахуырдзауы дæр. Хуссар Ирыстоны курсанттæ иууылдæр иттæг хорз сæххæст кодтой сæ хæслæвæрдтæ, раст сдзуапп кодтой фарстытæн æмæ райстой максималон 100 баллы.

Хорз этнокультурон зонындзинæдтæ чи равдыста, уыдонæй иу у экономикон æдасдзинады факультеты 3-æм курсы курсант Хъуылымбегты Алыксандр. Хорз бæрæггæнæнтæ йын æрмæст йæ ахуыры нæй, фæлæ ма йæ нывтæ конд сты академийы спортсменты стендыл дæр. Уымæй уæлдай ма активон хайад исы ахуыргæнæн уагдоны культурон царды дæр. Хуссар Ирыстонæй дзы цы курсанттæ ах-уыр кæны, уыдон дзы сарæзтой кафты ан-самбль «Симд» æмæ йæ солисттæй иу у Алыксандр. Ацы ансамбль арæх фæисы хайад Нижний Новгороды уагъдцæуæг алыгъуызон фестивалты æмæ алыхатт дæр бацахсынц призон бынæттæ.

Алыксандры зæрдæмæ тынг цæуы ахуыры процесс, йæ ныхæстæм гæсгæ курсанты цард цымыдисон у. Хорз тæлмæнтæ уадзы æрыгон лæппуйыл академийы ахуыр, уæлдайдæр та йын ам ис уавæртæ йæ курдиат райтынг кæнынæн. Хъуылымбегты лæппу хорз арæхсы гуымсæгыл цæгъдынмæ æмæ ныр йæхи цæттæ кæны фестивалмæ, цæмæй музыкалон инструменттæй цæгъдын дæр бакæной сæ программæйы. Ссардтой ма фæндырдзæгъдæг дæр — хуссарирыстойнаг курсант Гæбæраты Ирбегы. Алыксандр æмæ Ирбег сæ ныййарджытæм фæдзырдтой, цæмæй сын сæ музыкалон инструменттæ академимæ арвитой æвæстиатæй.

Йæ професси Алыксандр равзæрста йæхæдæг, скъолайы ма куы ахуыр кодта, уæд. Милицийы куыст нымайы кадджыныл æмæ æнæмæнгхъæуæгыл. Фæнды йæ, цæмæй йæ ахуыр æнтыстджынæй фæуа æмæ фæстæмæ æрцæуа йæ райгуырæн бæстæмæ, йæ адæмæн лæггад кæнынмæ. Æцæг бынтон æнæнхъæлæджы нæ равзæрста милицийы фæндаг — йæ фыд Алан ныр 18 азæй фылдæр кусы милицийы мигрантты фæдыл фарстаты управленийы. Алыксандрæн ма ис ноджы æртæ æфсымæры — дыууæйæ дзы нырма скъоладзаутæ сты, йæ хистæр æфсымар та кусы Контролон-нымайæн палатæйы. Йæ фыд Алан йæ фыртты æфтауы, Райгуырæн бæстæмæ уарзондзинадыл, йе ʻмтуг адæмæн иузæрдион лæггад кæныныл æмæ культурон хæзнатæн аргъ кæнын æмæ хъахъхъæныныл. Бантысæт сын ноджы фылдæр!

ДЖИОТЫ Алыксандр

Comments are closed, but trackbacks and pingbacks are open.