1 декабры РХИ-йы Парламентæн уыд æстæм сессийы фæндзæм рабадт.

Æддагон политикæ æмæ æхсæнпарламентон бастдзинæдты фæдыл комитеты сæрдар Дриаты Заза уынаффæмæ рахаста дунейы парламенттæм УФ-йы Федералон Æмбырды палатæты сидт бактериологион (биологион) æмæ токсикон хæцæнгæрзтæ уадзын, фæсауæрцтæ сæ кæнын æрæхгæныны æмæ сæ скуынæг кæныны фæстиуæгæн Конвенцийы ре-жим сфидар кæныны æнæмæнгхъæуындзинады тыххæй.

Сидты уæрæсейаг парламентаритæ катайдзинад æвдисынц дунейы æппæт бæстæты цæрджыты биологион тæссагдзинады фæдыл.

Депутаттæ сидты райстой æмхъæлæсæй.

Бюджет æмæ хъалонты фæдыл комитеты сæрдар Джиоты Еленæ уынаффæмæ рахаста «„2022 азы РХИ-йы Паддзахадон бюджеты тыххæй“ РХИ-йы закъонмæ ивындзинæдтæ бахæссыны тыххæй» закъоны проект.

Уый депутатты базонгæ кодта, закъонмæ цы ивындзинæдтæ хаст цæуы, уыдонимæ.

Ивындзинæдтæ хаст цæуынц, цæмæй закъоны бæрæг æрцæуой Хуссар Ирыстон æмæ Уæрæсейы Федерацийы ’хсæн социалон-экономикон æмгуыстады фæдыл æхсæнхицауадон къамисы æмсæрдæртты 2022 азы 18 ноябры уынаффæтæ, афтæ ма РХИ-йы Гарзджын тыхты æфсæддонты, Паддзахадон æдасдзинады комитеты кусджыты æмæ Æддагон развæдсгæрсты службæйы кусджыты, Уæлвæткон уавæрты министрады æмæ Таможнæйон комитеты кусджыты куыстмыздтæ этапгай фæфылдæр кæныны тыххæй дыууæ паддзахады Хицауадты ’хсæн сразыдзинæдты реализацийы тыххæй.

Уымæй дарддæр ма хъуамæ фæфылдæр уой Æнæниздзинад хъахъхъæныны ассигнованитæ республикæйы Бирæпрофилон медицинон центры кусджытæн мыздтæ фидыны тыххæй.

Ацы закъоны проект дæр райст æрцыд хъæлæсæппæрс-ты фæстиуæгæн.

Уынаффæ цыд «Æфсады чи службæ кæнынц, уыцы адæймæгты æмæ сæ бинонты пенсийæ сифтонг кæныны тыххæй» РХИ-йы закъонмæ ивындзинæдтæ бахæссыны тыххæй” закъоны проектыл дæр. Уынаффæмæ йæ рахаста Социалон политикæ æмæ æнæниздзинад хъахъхъæныны фæ-дыл комитеты сæрдар Плиты Александр.

«Æфсады чи службæ кæны, уыцы адæймæгты æмæ сæ бинонты пенсийæ сифтонг кæныны тыххæй» РХИ-йы закъоны 44 статьямæ гæсгæ, æппæт бафтауæггæгтæ, пенситы минималон бæрцтæ, пенситæм бафтауæггæгтæ, пенситæ фæфылдæр кæнын, кæцытæ нысан æрцыдысты закъоны, бæрæг цæуынц Хицауады снысангонд зæронддзинады минималон пенсимæ гæсгæ.

О, фæлæ республикæйы закъоны бæрæг нæу «минималон пенсийы бæрц». Уый фæстиуæгæн æххæстгæнæн хицауиуæгады органтæн сæ бон нæу, æфсады чи службæ кæны, уыдоны пенситæм бафтауын, фæфылдæр сæ кæнын.

Закъоны проектмæ гæсгæ, «пенсийы минималон бæрц» ивд хъуамæ æрцæуа «социалон пенсийы бæрц»-æй.

Уыимæ ма нысан æрцыд, цы ивындзинæдтæ хъавынц бахæссын, уыдонæн финансон ифтонгад кæй нæй. Фæлæ уымæ нæкæсгæйæ, депутат Тъехты Аланы ныхæстæм гæсгæ, ивындзинæдтæ æнæмæнгхъæуæг сты æмæ уал сæ райсын хъæуы. Уый фæстæ финансон фæрæзтæ дæр ссардæуыдзæн. Ацы фæндоныл Æлборты Алан не сразы. Бирæ дискусситы фæстæ Парламенты спикер фæндон бахаста, цæмæй уал закъоны проект райст æрцæуа фыццаг бакасты.

Райст æрцыд «Ахуырады тыххæй» РХИ-йы закъонмæ ивындзинæдтæ бахæссыны тыххæй” закъоны проект, кæцыйы депутатты размæ уынаффæмæ рахаста Ахуырад æмæ зонады фæдыл комитеты сæрдары хæдивæг Уалыты Розæ.

Дзырд цыд, УФ казнæйон службæйы бæрæггæнæн куысты тыххæй Акт куыд æххæст цæуы, уый фæдыл дæр.

Депутат Санахъоты Давид бацымыдис кодта, цы куыст цæуы ацы фарсты фæдыл, дыууæ кæнæ фылдæр бынæтты чи кусы, уыдоны фарст куыд æххæст цæуы æмæ а. д.

Хъыгагæн, Санахъойы фырт йæ фарстатæн æмбæлон дзуаппытæ нæ райста.

Депутаттæ уынаффæ кодтой Украинæйы Уæрæсейы сæрмагонд хæстон операцийы хайадисæг хæстонтæн, уыцы операцийы рæстæджы чи фæмард, уыдон бинонтæн льго-тæты тыххæй.

Парламенты Сæрдары хæдивæг Чилæхсаты Владимиры фæндонмæ гæсгæ, бакусын хъæуы, Хуссар Ирыстоны чи тох кодта, чи фæцæф, кæнæ — фæмард, уыдоны тыххæй, афтæ ма Донбассы сæрмагонд хæстон операцийы хайад чи исы, чи фæцæф, чи фæмард, уыдоны бинонты тыххæй льготæтыл, цæмæй фидой коммуналон хæрдзтæн æрмæстдæр сæ 50 проценты.

Парламенты спикер Æлборты Аланы зæрдæмæ фæцыд ацы фæндон æмæ бахатыд профилон комитетмæ, цæмæй бакуса æмæ цыбыр рæстæгмæ æмбæлон дзуапп радта ацы фарстæн.

Парламенты депутат Тадтаты Алан фехъусын кодта, зæгъгæ, Централон æвзарæн къамисы финансон-хæдзарадон архайды тыххæй Контролон-нымайæн палатæмæ фыстæг куы арвыстой, уымæй кæд æртæ мæйы рацыд, уæддæр дзуапп нæма райстой. Уый бахатыд Парламенты Сæрдармæ, цæмæй куырдиат фæлхатгонд æрцæуа.

Æлборты Алан ныфс бавæрдта, контролон-нымайæн па-латæйæ кæй æрдомдзæн æмбæлон дзуапп.

Сессийы уынаффæ цыд æндæр фастатыл дæр.

Осиаты Индирæ