Информаци æмæ мыхуыры паддзахадон комитеты пресс-центры уагъд æрцыд брифинг дзидзагуыстгæнæн завод «Растдон»-ы генералон директор Тарас Тарасовæн. Уый цыбыртæй æрдзырдта заводы архайды тыххæй, цы проблемæтыл æмбæлынц, уыдон æмæ сæ дарддæры плæнттыл. Цæуы ахæм дам-думтæ, зæгъгæ, Уанеты Вадим йæ куысты бынат кæй фесæфта, уымæ гæсгæ, гæнæн ис, æмæ завод «Растдон» æхгæд æрцæ-уа. Фæлæ журналисттæн Тарас Тарасов куыд фехъусын кодта, уымæ гæсгæ «Растдон» æхгæд не ‘рцæудзæн, фæлæ рæздзæн дарддæр дæр. «Кæд цъус йеддæмæ нæ кусæм, ома бæрцæй аз æмæ æрдæг, уæддæр нын ис æнтыстытæ. Ныры онг мах уагътам тахынæг, сосискæтæ, сарделкæтæ æмæ æндæр хуыз продукци. Ныр Ног азмæ фæнд кæнæм нæ фæлхасгæнджыты зæрдæтæ барухс кæнын бакуыстгонд фых тахынæгæй дæр. Куыст цæуы æрдæгфабрикаттæ рауадзыныл дæр, куыд зæгъæм люля, пельментæ æмæ хинкалтæ, кæцыты æввахс рæстæджы фендзыстут нæ горæты дуканиты. Ныфс мæ ис, уæ зæрдæмæ кæй фæцæудзысты, уымæй», – банысан кодта Тарас Тарасов.
Йæ ныхæстæм гæсгæ, ныртæккæ кæд завод æххæстхъомысадæй нæ кусы, уæддæр дзы кусынц 45 адæймаджы онг. Ныфс сæ ис ног азæй сæ куыст кæй рауæрæхдæр кæндзысты æмæ, зæгъгæ, уæд райсдзыстæм фылдæр кусджытæ. Куыстмызд у 16-20 мин сомы онг.
Дзидзагуыстгæнæн комбинат «Растдон» дзидзайы продукци «Нартские», зæгъгæ, уадзын райдыдта 2017 азæй. Октябры мæйæ куыстуат боны мидæг уадзы 350 килограммы продукци æмæ йын ис хорз фæстиуджытæ. «Мах фæнды æндæр этапмæ рахизын, ома, уæлдай активондæрæй бынæттон базары нæ продукци уæй кæнын. Фæнды нæ, цæмæй ныл адæм æууæндой æмæ нын нæ продукци æлхæной æнæ дызæрдыгæй. Продукци рацæуы æххæст сертификаци, профилон службæтæн нæ куыстуатмæ ницахæм фарстатæ ис» ,- банысан кодта гендиректор.
Уый загъта, зæгъгæ, райдианы проект арæзт цыд, цæмæй продукцийы 20-30 проценты цыдаит бынæттон базармæ, иннæтæ та – æддаг базармæ. «Æддагон базармæ мах нæма ахызтыстæм. Иудзырдæй, бынæттон базарыл дæр нæма аххæссыдыстæм. Мах æппæт министрадтæм æмæ организацитæм дæр арвыстам нæ коммерцион фæндæттæ, цæттæ стæм семæ кусынмæ дæр, ома сæрмагонд закъаз-тæ райсынмæ»,- загъта директор.
Ног азæй «Растдон» фæнд кæны сæ продукци дыууæ хатты фæфылдæр кæнын. «Махæн уæд нæ бон уыдзæн нæхи дарын, ома кредиты проценттæ фидын. Ног азæй фæивдзæн нæ продукцийы этикеткæ дæр. Куыстуаты продукцийы гъæд у хорз, фæлæ, хъыгагæн, алчи нæма зоны нæ продуктты. Уымæн æмæ нын фаг рекламæ нæй æмæ уыцы фарстыл дæр бакусдзыстæм»,- загъта уый.
Ацы аз уыдон райстой сертификат, цæмæй сæ продукци ласой Уæрæсемæ дæр. Ацы фарстыл активонæй куыст рагæй цыд, стыр æххуыс нын бакодта Хуссар Ирыстоны Хицауад дæр. «Фæлæ нын проблемæтæ уыд лабораторон иртасæнты. Цæмæй ныры онг æддагон базармæ ахызтаиккам, уый тыххæй нын нæ продукци хъуыд Кæсæг-Балхъары лабораторимæ ласын. Анализты фæстиуджытæм æнхъæлмæ кæсын хъуыд къуырийы бæрц, продукци цæмæй арвыстаиккам, уый тыххæй та хъуыд аст боны бæрц. Уыцы рæстæгмæ та продукттæй пайда кæныны рæстæг фæуд кодта. Ныр уыцы фарст скъуыддзаг æрцыд», – загъта уый.
Журналистты ма цымыдис кодта завод продукци аразынæн цахæм дзи-дзайæ пайда кæны, уый. Гендиректоры ныхæстæм гæсгæ ныры онг гогызы дзидза ластой «Евродон»-æй. Ныр сæ планы ис карчы фыдæй дæр спайда кæнын. Бынæттон продукциуадзæгæй уал завод æлхæны стуры фыд. «Мах цæттæ стæм, цы продукци æлхæнæм, уый гуырахст рауæрæхдæр кæнынмæ, уыимæ иумæ цæмæй æххæст цæуой æппæт домæнтæ дæр, туджы анализы фæстиуджытæ æмæ хъæуæг документтæ. Гæнæн уæвгæйæ, къаддæр кæндзыстæм нæ продукцийы æргътæ дæр»,- кæронбæттæны загъта «Растдон»-ы генералон директор Тарас Тарасов.
Кокайты Заринæ
Comments are closed, but trackbacks and pingbacks are open.