Кæд æмæ 27 июнæй фæстæмæ нæ горæты райдыдта кусын аппаратон-программон комплекс «Æдас горæт», кæцы бæлвырд кæны фæндæгтыл æрцæугæ фæткхалæн цаутæ, уæддæр нырма патрулон экипажтæн бирæ куыст ис. Фиксацийы камерæтæ алцæуыл не ххæссынц, стæй ма нырма куысты процессы хъуагдзинæдтæ дæр ис, кæцыты иуварс кæнынц æвæстиатæй. Камерæтæ сты дыууæ хуызы – иутæ дзы фиксации кæнынц стыр тагъдадæй скъæрæг шофырты, иннæтæ та сты азилæнты æвæрд æмæ фыссынц алцыдæр.

Ацы камерæтæ сты бæрзондтехнологон аппараттæ æмæ сын хъæуы æмбæлон уавæртæ аразын. Зæгъæм, фæндæгтыл разметка куы нæ уа, кæнæ куы нæ зына, уæд ацы аппаратæн йæ бон нæу фæткхалæджы сбæлвырд кæнын. Бæлвырд æй скæндзæнис, фæлæ шофыр куы бахъаст кæна, уæд тæрхондоны йæхи сраст кæндзæнис, ома дзы фæткхалæн цауы факт нæй. Ацы хъуыддаг стыр зындзинæдтæ взарын кæны инспекторты куыстæн æмæ цалынмæ ацы хъæндзинад иуварс æрцæуа, уæдмæ шофыртæ сæ ивартæ нæ фиддзысты. Уымæй уæлдай ма кæмдæрты бæлæсты къалиутæ дæр хъыг дарынц каме-рæты, фæлæ ацы проблемæ ‘ввахс рæстæ-джы иуварс æрцæудзæнис.

Машинæйыл скъæргæйæ ма æнæмæнг хъæуы дарын æдасдзинады ремень – конд куы нæ уа, уæд закъонмæ гæсгæ шофырмæ æмæ ма бæлццонмæ ивар æмбæлы. Нæ республикæйы та автотранспорты бæрæг хайæн сæ æвджытæ сты сау æмæ камерæтæ нæ фиксаци кæнынц, шофыртыл ис конд æдасдзинады ремень, æви нæй.

Æппæт уавæртæ хынцгæйæ бæрæг у, патрулон экипажтæн дарддæр дæр кæй уыдзæн бирæ куыст. Уымæ гæсгæ, Фæндагон змæлды æдасдзинады инспектортæ спецкъордты æмæ патрулон-постон службæйы кусджытимæ иумæ, æрвылбон дæр уадзынц профилактикон рейдон мадзæлттæ. Рейдты рæстæджы уæлдай хъусдард здахынц нозтджын шофыртæм, басгарынц бары гæххæттытæ, бауромынц  фæткойтæ халджыты. Сæ зæрдæ искæмæ куы фехсайы, уæд ын басгарынц йæхи дæр æмæ йæ машинæ дæр, ома дзы ма разына наркотиктæ, æхсæнгарз, кæнæ æндæр ахæм æнæзакъонон дзаумæттæ æмæ буарадтæ.

Кæд æмæ-иу раздæр патрулон экипажтæ алы ран дæр алæууыдысты, уæд ныр та рейдон мадзæлттæ ауадзынц, камерæтæ æвæрд кæм нæй, ахæм азилæнты. Уымæн æмæ æппæт горæты фæндæгтыл аххæссæн нæй æмæ сын ныр та бæрæг фенцондæр ис – сæ куысты иу хай сын камерæтæ райдыдтой кæнын.Фæткхалæджы камерæйы видеоафыстмæ гæсгæ дæр ис бæрндзинадмæ  æркæнæн æмæ æндæр азилæнты та милицийы кусджытæ сæхæдæг æвæрынц фæтк. Камерæты нымæц дарддæр дæр фылдæр кæндзæнис æмæ ма, æвæццæгæн, æввахс рæстæджы горæты администраци дæр фæндæгты разметкæ сног кæндзæнис. Афтæмæй фæткхалджытæн фæзындæр уыдзæнис бæрндзинадæй аирвæзын.

Рейдты рæстæджы ма инспектортæ профилактикон куыст бакæнынц бæлцæттимæ æмæ велоскъæрджытимæ дæр, цæмæй уыдон дæр ма халой фæндагон змæлды æдасдзинады фæткойтæ. Фæстаг рæстæджыты иууыл арæх фæткхалæн цаутæ сты светофоры сырх рухсыл ахизын, стыр тагъдадæй скъæрын, дæ ныхмæ цæуæг машинæйы фæндагмæ рахизын, машинæ æнæран бауромын æмæ ма шофырмæ куы нæ вæййы бары гæххæттытæ.

ДЖИОТЫ Алыксандр

Comments are closed, but trackbacks and pingbacks are open.