Республикæ банысан кодта Стыр Уæлахизы 72 азы бон

1941-45 азты Стыр Фыдыбӕстӕйон хӕсты Советон Цæдисы Уӕлахизы цытӕн бӕрӕгбонон мадзӕлтты фӕлгӕтты цы мадзӕлттӕ уагъд цӕуынц, уыдонӕй сӕйраг у ӕфсӕддон парад.

Нӕ республикӕйы сӕйраг горӕт Цхинвалы Театралон фӕзуатмæ бӕрӕгбон нысан кӕнын-мӕ, кӕрӕдзийӕн арфӕтӕ кӕнынмӕ ӕмӕ парадмӕ бакӕсын-мӕ бӕрӕгбонвӕлыстӕй ӕрбацыдысты нӕ республикӕйы цӕрджытӕ стырӕй, чысылӕй.

Цытджын трибунӕйӕ республикӕйы къухдариуӕгадимӕ, Президент Бибылты Анатолийы сӕргълӕудӕй, парадмӕ кӕсынӕн фадат уыд Стыр Фыдыбӕстӕйон хӕсты ветерантӕн, афтӕ ма Хуссар Ирыстоны Уӕрӕсейы Федерацийы Ӕххӕстбарджын минӕвар Къарджиаты Эльбрус, Хуссар Ирыстоны Абхазы минӕвар Елбачиты Алан, Хуссар Ирыстоны Приднестроваг Молдоваг Республикӕйы официалон минӕварады сӕргълӕууӕг Коц-ты Егор, экс-президент Кокойты Эдуард ӕмӕ ӕндӕр официалон адӕймæгтæн.

Театралон фӕзуаты Цытджын трибунӕйы размӕ республикӕйы Хъахъхъӕнынады министрады Цытджын караул ӕрбахастой Уӕлахизы ӕмӕ РХИ-йы Паддзахадон тырысатӕ.

Стыр Фыдыбӕстӕйон хӕсты Уӕлахизыл 72 азы сӕххӕсты цытӕн ӕфсӕддон парад иста Хъахъхъӕнынады министры хӕстӕ ӕххӕстгӕнӕг Гассеты Ибрагим. Парадыл командӕ кодта министрады Генералон штабы къухдариуӕггӕнӕг Виктор Федоров.

Республикӕ Хуссар Ирыстоны Президент Бибылты Анатоли Стыр Фыдыбӕстӕйон хӕс-ты ветерантӕ ӕмӕ нӕ республикӕйы адӕммæ ацы стыр бӕрӕгбоны – Уӕлахизы боны цытӕн арфӕйы хӕдразмӕ бахатыд, тохы быдырӕй чи нал сыздӕхт, уыдоны рухс нӕмттӕ ссарыны цытӕн иу минут ӕмырӕй алӕууыны. Банысан кодта, Хуссар Ирыстоны хӕстхъом фӕсивӕды егъау хайбавӕрд стыр Уӕлахизмӕ. Зӕрдыл ӕрлӕууын кодта, уыцы тугуарӕн хӕсты стыр зиӕнттӕ – тохы быдырӕй нал сыздӕхт се ‘мбисы бæрц. Хӕст Хуссар Ирыстоны цӕрджытӕн ӕрхаста стыр демографион зиӕнттӕ.

Зӕрдыл ӕрлӕууын кодта уый дӕр, ӕмӕ 1941-45 азты фронтӕй цӕфтӕй цы хӕстонтӕ ӕрыздӕхтысты, уыдоныл тынг кæй бандӕвта ирон адӕмы 1989 азӕй суанг 2008 азмӕ геноцид.

Президент ма хъусдард аздӕхта уыцы хъуыддагмӕ дӕр, зӕгъгӕ, символикон у, абон хуссарирыстойнаг ӕфсӕддон службӕгӕнджытимæ иумæ парады хайад кæй исынц уӕрӕсейаг ӕфсӕддон базӕ ӕмӕ Федералон Ӕдасдзинады службӕйы Арӕнгӕрон управленийы службӕгӕнджытӕ.

Стыр Фыдыбӕстӕйон хӕсты советон адӕмы Уӕлахизы боны цытӕн ӕфсӕддон парад байгом Хъахъхъӕнынады министрады тырысахӕсджыты къордӕй. Дарддӕр цыдысты министрады дӕлхӕйттӕ, Мидхъуыддӕгты, Уӕлвӕткон уавӕрты министрадты дӕлхӕйттӕ, Паддзахадон Ӕдасдзинады комитеты Арӕнхъахъхъæнæг службӕ, Кадетон скъола, уӕрӕсейаг 4-ӕм ӕфсӕддон базӕ ӕмӕ Федералон Ӕдасдзинады службӕйы Арӕнхъахъхъæнæг управленийы службӕгӕнджытӕ ӕмӕ УФ-йы Уӕлвӕткон уавӕрты министрады сӕйраг тӕссагдзинады ирвӕзынгӕнӕг операцитӕ уадзыны фӕдыл уӕрӕсейаг центр «Лидер»-ы сапертӕ.

Дарддӕр фӕзуаты рацыд ӕфсӕддон техникӕ.

***

«Ӕнӕмӕлгӕ полк» – кад ӕмӕ уын цыт!

Æрвылаз Хуссар Ирыстон дӕр мысынц, фронтӕй чи нал сыздӕхт, уыцы хæстонты нæмттæ. «Ӕнӕмӕлгӕ полк»-ы нымӕц азӕй-азмӕ фылдӕр кӕны. Ацы аз ныр ӕртыккаг хатт ӕфсӕддон парады рацыд ацы полк. Йӕ хайадисджыты нымӕц схызт 5000 адӕймагмӕ.

«Ӕнӕмӕлгӕ полк»-ы рахастой, Стыр Фыдыбӕстӕйон хӕсты хайадисджытӕй дарддӕр 1989-2008 азты гуырдзиаг ныхмӕлӕууынады рӕстӕджы цы лӕппутӕ фӕмард, уыдоны къамтӕ дӕр.

«Ӕнӕмӕлгӕ полк»-мӕ ӕрбаиу Президент Бибылты Анатоли дӕр. Уый та хаста йӕ фыды фыды ‘фсымӕр Бибылты Суликъойы къам.

Нӕ горӕты 3-ӕм гвардион скъолайы ахуыргӕнинӕгтӕ фӕзуаты суагътой сабырдзинады ӕмӕ фӕрныгады нысанӕн урс бӕлӕтты. Уӕларвмӕ ма ахуыргӕнинӕгтӕ уагътой Хуссар Ирыстон ӕмӕ Уӕрӕсейы Федерацийы Паддзахадон тырысаты хуызӕгтӕй къоритæ.

Хуссар Ирыстоны цӕрджытӕй алчи дӕр стыр цымыдисимӕ каст «Ӕнӕмӕлгӕ полк»-ы цыдмӕ. Махӕй алчи дӕр хорз зоны, хӕст цы у ӕмӕ нӕ хъайтарты куыд сафӕм, уый. Ӕмӕ цалынмӕ цӕрӕм, уӕдмӕ хъуыды ӕмӕ кад кӕндзыстӕм нӕ хъайтартӕн, уымӕ гӕсгӕ нӕ рох ницы ӕмӕ ничи уыдзӕн.

Нӕ уацх.