Республикæ Хуссар Ирыстоны уавæр карзæй карздæр кæны. Республикæ Хуссар Ирыстоны Централон æвзарæн къамис цы æнæзакъонон уынаффæтæ исы, уыдон æхсæнады тауынц дихдзинад, халынц нæ паддзахады конституцион бындуртæ. Ахæм уынаффæтæ тæссаг сты, канд хицауиуæгады институтты легитимондзинадæн нæ, фæлæ ма нæ республикæйы паддзахиуæгадæн йæхицæн дæр.

Паддзахадон хицауиуæгады органтæ Конституцион закъон кæй халынц, уый у фыдракæнд нæ адæмы ныхмæ. Мах, Республикæ Хуссар Ирыстоны депутаттæ, домæм, цæмæй æххæст цæуой республикæйы Конституци æмæ йæ закъæттæ, æмæ афтæмæй хъахъхъæд цæуой нæ адæм.

Алы ахæм æнæзакъонон уынаффæ хæссы стыр зиан республикæйы æмæ йæ цæр-джыты номæн. Растдæр йæ ахæм архæйдтыты тыххæй хицауад сафы адæмы æууæнк, æмæ æнæ уымæй та саразæн нæй æнæниз æхсæнад æмæ барадон паддзахадæн. Махæн, адæм се ‘ууæнк кæуыл сæвæрдтой, сæ уыцы минæвæрттæн, нæ бон нæу æнæмæтæй кæсын, Республикæ Хуссар Ирыстоны Централон æвзарæн къамис хицæн адæймæгтæ æмæ бæлвырд структурæты пайдайæн цы æнæзакъонон уынаффæтæ хæссы, уыдонмæ.

Мах сидæм, Закъоны разамынады фарс чи у, уыдонмæ се ‘ппæтмæ дæр, цæмæй ма бауадзой нæ адæмы æрныллæг кæнын æмæ нæ Конституцийыл балæгæрдын.

Республикæ Хуссар Ирыстоны Парламент сиды Республикæ Хуссар Ирыстоны Централон æвзарæн къамисмæ, цæмæй раздæха барадон архайдмæ æмæ аива, æнæзакъон чи у æмæ Республикæ Хуссар Ирыстоны закъондæттынады ныхмæ чи у, йæ раздæры уыцы уынаффæ.

Comments are closed, but trackbacks and pingbacks are open.