Республикæ Хуссар Ирыстоны Президент Бибылты Анатоли æмæ Уæрæсейы Федерацийы Президент Владимир Путины фембæлд

Республикæ Хуссар Ирыстоны Президент Бибылты Анатоли æмæ Уæрæсейы Федерацийы Президент Владимир Путинæн кусæгон фембæлд уыд Сочийы.

Фембæлды рæстæджы дыууæ паддзахады сæргълæуджытæ ноджыдæр бафидар кодтой Хуссар Ирыстон æмæ Уæрæсейы Федерацийы ‘хсæн æмцæдисон ахастытæ райрæзын æмæ сфидар кæныны фæндондзинад.

Бибылты Анатолийы ныхæстæм гæсгæ «Хуссар Ирыстоны æрæджыйы æвзæрстытæ ацыдысты æндыгъд конкуренцийы уавæрты, фæлæ мидполитикон проблемæтæм ахасты цыфæнды хицæндзинады рæстæджы дæр æмæ æппæт политикон цауты рæстæджы дæр, республикæйы æнæфæивгæйæ баззайдзæн Уæрæсейы Федерациимæ интеграци æмæ æмцæдисады рæзт».

Владимир Путин ноджыдæр раарфæ кодта Бибылты Анатолийæн, Президенты бынаты кусын кæй райдыдта, уый тыххæй æмæ банысан кодта, зæгъгæ, Уæрæсе дарддæр дæр æххуыс кæндзæн Хуссар Ирыстонæн æдасдзинады, социалон æмæ экономикон рæзты фарстаты.

«Фæнды мæ раарфæ дын кæнон æвзæрстыты фæстиуæджы сæраппонд. Зонын æй, ды дæ алы здæхтыты дæр Уæрæсеимæ ахастытæ рæзын кæныны карз фарсхæцæг. Не ‘хсæн реализаци цæуы Бадзырд стратегион партнердзинады тыххæй æмæ мæн фидарæй уырны, дæ къухдариуæгадæй республикæ æппæт дæр кæй сараздзæн ацы Бадзырды реализацийы тыххæй», – загъта уый.

Уæрæсейы Федерацийы Президент ма зæрдыл æрлæууын кодта æдасдзинады фарстаты, экономикæйы райрæзты æмæ æмахастыты фарстаты, социалон  фадыджы  фарстаты  фæдыл æмкуысткæнынады стыр программæйы тыххæй.

«Уæрæсе финанс кæны социалон характеры тынг бирæ фарстатæ, æмæ мах дарддæр дæр фæнд кæнæм уыдæтты се ‘ппæт дæр аразын, рæзын кæндзыстæм республикæйы инвестицион здæхт æмæ инфраструктурæ, уавæртæ араздзыстæм экономикæйы рæзтæн», – загъта Владимир Путин.

Фембæлды рæстæджы уынаффæ цыд политикон, социалон æмæ экономикæйы сферæты къорд фарстатыл.

РХИ-йы Президенты

пресс-службæ