Республикæйы цытджын æмбæстæгтæ æмæ уазджытæ!

Æмбæлттæ салдаттæ, сержанттæ æмæ прапорщиктæ!

Æмбæлттæ афицертæ æмæ инæлæрттæ!

Цалдæр минуты фæстæ цытджын маршы зæлты бын парадон расчеттæ рæнхъы цыдæй рацæудзысты Республикæ Хуссар Ирыстоны сæйраг горæты централон фæзуаты. Ацы парады алы къахдзæф дæр мах бæттæм нæ республикæйы историон фæндагимæ, кæцыйыл рацыдыстæм  1990 азы 20-æм сентябрæй абоны боны онг.

Абоны бæрæгбон фидар æрцыд хъысмæтскъуыддзаггæнæн цауы мысыны тыххæй, кæцы ссис Хуссар Ирыстоны суверенон паддзахаддзинады историйы райдиан.1990 азы 20-æм сентябры Хуссар Ирыстоны адæмон депутаттæ райстой Хуссар Ирыстоны автономон область Республикæ Хуссар Ирыстонмæ рацаразыны тыххæй Уынаффæ.

Ацы барадон Уынаффæ хъуамæ бахъахъхъæдтаит Хуссар Ирыстоны автономийы, кæцыйы,  Тбилисы сæ фæндондзинад чи хъардта, уыцы фашистон зондахастыл хæст националисттæ фæнд кодтой фехалын.

Агрессивон националистон пропагандæ цырын кодта истерион æнæуынондзинад æнæгуырдзиаг цæрджытæм æмæ, фыццаджыдæр та, ирæттæм. Гуырдзиаг неонацисттæ домдтой ирæтты Кавказы хохы фалæмæ арвитын æмæ ма дзы чи баззадаид, уыдонæн та гуырынад фæкъаддæр кæнын.

1989 азы ноябры гуырдзиаг национал-экстремисттæ Цхинвалмæ сорганизаци кодтой бирæминон марш, кæцыйы нысан уыд ирæтты фæтæрсын кæнын. Фæлæ тæрсынгæнæн акцийæн къухты нæ бафтыд йæ нысан. Цхинвалмæ марш фæсыкк, нæ адæмы фæндвидардзинад æмæ æхсардзинадыл сæмбæлгæйæ. Хуссар Ирыстоны уæвынадæн комкоммæ тæссагдзинады уавæры мах сдзуапп кодтам Фыдыбæстæ æмæ сæрибардзинады сæраппонд кæй æрбангом стæм, уымæй. Национ æмæ адæймагон намыс бахъахъхъæнын, нæ фыдæлты зæххыл цæрыны барыл стох кæныны иунæг фадат уыд хисæрмагонд паддзахаддзинад саразын.

Барадон гарантитæ сифтонг кæнынмæ Хуссар Ирыстоны бафæлвæрдыл Тбилисы сæмбæлдысты æрра фыдзæрдæдзинадимæ. Гуырдзыстоны Уæлдæр Совет фехъусын кодта Хуссар Ирыстоны автономон область сликвидаци кæныны тыххæй. Гуырдзыстоны  ирæтты фæдыл зилын рахызт этниконæй сæ асыгъдæг кæныны фазæмæ. Хуссар Ирыстонмæ æрвыст æрцыдысты бирæминон хæстон къордтæ ирæтты басæттыны тыххæй.

Знаджы аргессийы ныхмæ лæууыны уавæрты йæ паддзахаддзинад аразгæйæ, Хуссар Ирыстонæн йæ бон ссис хъахъхъæнынад сорганизаци кæнын, кæцы баурæдта агрессоры æрбабырстытæ, тыхты критикон æнæмсæрдзинадмæ нæ кæсгæйæ. Æппæт гæнæнуæвæн фыдæвзарæнтæн бафæразгæйæ, дæргъвæтин азты фæстæ республикæ райста йæ хæдбардзинады банымад. Сæрибардзинад æмæ хæдбардзинады сæрыл тох кæныны рæстæджы Хуссар Ирыстоны адæмыл æрцыд уæззау зиæнттæ, фæлæ уæддæр сæ фæндагæй иу къахдзæф дæр фæстæмæ нæ алæууыдысты, кæцы бæрæг æрцыд 1990 азы 20-æм сентябры историон уынаффæйæ. Тыхджын æмæ гæрзифтонг ныхмæлæууæджы бауромыны тыххæй бахъуыд нæ адæмы æнахуыр фæразондзинад, æхсардзинад æмæ удуæлдайдзинад равдисын.

Сæрибардзинады сæрыл тохы Хуссар Ирыстоны адæм иунæг нæ уыдысты. Мах федтам Абхаз, Приднестровье, Хæххон Къарабахы, бирæ бæстæты хæлар фæндоны адæмы фарсхæцынад.

Кæддæриддæр нæ фарсмæ лæууыдысты Цæгат Ирыстоны адæм, алы ирон дæр, кæцы йæхи иууон нацийы сконды æнкъары æмæ Фыдыбæстæйы хъысмæты хайад исы, уыдон се ‘ппæт дæр.

Хъысмæтскъуыддзаггæнæн ссис Уæрæсейы фарсхæцынад. Уæззау рæстæджыты-иу Уæрæсе æрцыд æххуысмæ. Мах Уæрæсейыл æууæндыдыстæм, Уæрæсейы руаджы нæ зæххыл уæвынад кæны сабырдзинад. Уæрæсеимæ бæттæм нæ ныфсытæ.

Æрæджы мах банысан кодтам Уæрæсейы Федерацийы ‘рдыгæй Хуссар Ирыстоны хæдбардзинад банымады 10-азон бæрæгбон. Уæрæсе нын нæ паддзахадон хæдбардзинад кæй банымадта, уый махæн нысан кæны Хуссар Ирыстоны адæмы Фыды-бæстæйон хæсты фæуæлахиз, уый байгом кодта сабырадон рæзты, æдас æмæ фи-дæныл æууæнкдзинады дуг.

Хуссар Ирыстоны адæмы номæй Уæрæсейæн, Президент Владимир Путины сæргълæудæй Уæрæсейы Федерацийы къухдариуæгадæн зæгъын стыр бузныг, нæ адæмы мæлæтæй кæй фервæзын кодтой, ирон зæххыл сабырдзинады, æфсымæрон æххуыссы, нæ адæм сæ фидæныл кæй баууæндыдысты, уый тыххæй.

Зынаргъ хæлæрттæ!

Нæ адæм кæддæриддæр бузныг уыдзысты, Хуссар Ирыстоны паддзахаддзинады райдианты чи лæууыд, республикæ чи хъахъ-хъæдта, уыцы патриоттæй.

Абоны цытджын бæрæгбоны циндзинад немæ чи хъуамæ дих кодтаиккой, уыдонæй бирæтæ нал сты нæ фарсмæ, æмæ уыдонæй алкæмæн дæр ацы ирд бæрæгбон арæм сæ рухс нæмттæ.

Сæ ном сын ссарæм иу уысм æнæдзур-гæйæ алæугæйæ.

 

***

Зынаргъ хæлæрттæ!

Хуссар Ирыстон æнувыдæй хъахъхъæны национ  историон мысынад. Уыимæ иумæ нæ адæм тырнынц рухс фидæнмæ. Сæ тохæй, фидардзинадæй, сæрибардзинадыл æнувыд-дзинадæй нæ адæм сбæлвырд кодтой сæ Райгуырæн бæстæйы аккаг кæй сты, æмæ махæй алкæйы дæр фæнды ноджы йæ фæхуыздæр, фæрæсугъддæр кæнын. Махмæ ахæм амонд æрхауд, æмæ цæрæм нæ Фыдыбæстæйы æндидзынады  дуджы. Мах фæуæлахиз стæм сæрибардзинады сæрыл тохы, æмæ ныббиноныг кæндзыстæм, нæ фыдæлты бæллиц нæ диссаджы Райгуырæн бæстæйы дидинæфтыды тыххæй!

Цытджын æмбæстæгтæ!

Республикæйы бæрæгбон у Хуссар Ирыстоны адæмы иудзинады цытджын символ. Ацы бæрæгбон у алкæйы дæр, уæззау азты нæ паддзахаддзинад чи арæзта æмæ йæ чи фидар кодта, Хуссар Ирыстоны сæрибардзинады тыххæй чи тох кодта æмæ сабырад чи хъахъхъæдта, зæхкуыст чи кодта, цæфтæн чи хос кодта, сывæллæтты чи ахуыр кодта, тæрхы фарсмæ чи куыста, кæнæ чиныг чи фыста, æппæт уыдоны бæрæгбон. Ацы бæрæгбон у, Фыдыбæстæйы сабыр фидæн æмæ дидинæфтыды тыххæй абон намысджынæй чи службæ æмæ фæллой  кæны, уыдонæй се ‘ппæты дæр.

Сæрибардзинады сæрыл тохы азты иумиаг хъуыддаджы хайадисты æнкъарынад нæ адæмæн радтой фидар тых, ныфсхастдзинад, уыдон систы уæлахизы нысан. Æмæ абон национ иудзинад у бæстæйы хæрзиуæджы сæраппонд æнтыстджын фæллойы нысан,  кæцыйы мах хъуамæ адæттæм ног фæлтæртæм, йæ фæрныгад ын бирæ хатт фæфылдæр кæнгæйæ æмæ йын йе ‘дасдзинад сфидар кæнгæйæ.

Нæ адæмæн уый бар ис æмæ сæрбæрзонд уой, сæхæдæг кæй сарæзтой, ахæм хъæбатырæй кæй бахъахъхъæдтой, йæ ныры æмæ сомы фидæны амондджын царды тыххæй æрвылбондæр кæй тыххæй фæллой кæнынц,  уыцы паддзахадæй, уыцы республикæйæ.

Мах сымахимæ стæм ахæм рæсугъд, хъæлдзæг бæрæгбон  Республикæйы боны аккаг!

Зынаргъ хæлæрттæ, арфæ уын кæнын бæрæгбоны цытæн!

Уадз, фидар кæнæд национ иудзинад æмæ æнгомдзинад!

Уадз, фылдæрæй фылдæр кæнæд нæ къухыбафтгæ æнтыстытæ!

Уадз, дидин æфтауæд нæ рæсугъд Фыды-бæстæ!

Кад Хуссар Ирыстоны хъæбатыр адæмæн!

Уæлахиз уæд нæ Республикæ!

Comments are closed, but trackbacks and pingbacks are open.