Ныр цалдæр азы дæргъы нæ республикæйы барадхъахъхъæнæг органтæ архайынц, цæмæй, куыд горæт Цхинвалы, афтæ ма районон центрты æмæ республикæйы æппæт фæндæгтыл, дæр æвæрд æрцæуой къамисæн æмæ видеофыссæн камерæтæ. Уымæн æмæ автотранспорты нымæц бонæй-бонмæ кæны фылдæр æмæ уæд ахæм темптæй хъуамæ фылдæр кæной фæндагон змæлды æдасдзинады инспекторты нымæц дæр. Фæлæ алкæцы шофыры цур нæй гæнæн æмæ инспектор сæвæрай, стæй уый æххуыс дæр ницы у фæткхалæн цаутæ ма æруадзынæн.

Ӕгас дунейы размæдзыд паддзахадтæ дæр рагæй фæстæмæ пайда кæнын райдыдтой техникон ифтонггæрзтæй æмæ йæ, практикæ куыд равдыста, афтæмæй камерæтæ сты эффективон. Уымæн æмæ адæймагæн йæ туджы ис фæтк фехалын, кæнæ закъоны сæрты ахизын, æмæ иварæй куы нæ фæтæрсынц, уæд сын сæхи цæсгоммæ нæй æнхъæлмæ кæсæн – нæ фæчъил уыдзысты. Рагæй фæстæмæ дæр афтæ уыд, уымæн æмæ историмæ куы акæсæм, уæд рагзаманты дæр алыгъуызон къæрныхтæ æмæ фыдгæнджытæ æрмæстдæр тарстысты бафхæрынæй. Карздæр-иу кæм уыдысты закъæттæ, уым-иу фыдракæндты нымæц къаддæр уыдис.

Фæлæ нырыккон дуджы карзæй бафхæрыны методтæй нæй спайда кæнæн – ома нын цивилизаци бар нæ дæтты. Уымæ гæсгæ уадзын хъæуы æндæр профилактикон мадзæлттæ, цæмæй фæткхалджытæ æмæ фыдгæнджытæ сæхи æдас ма хатой. Камерæтæ сæвæрыны тыххæй уал ныридæгæн республикæйы къухдариуæгад рахицæн кодта æхцайы фæрæзтæ æмæ æлхæд æрцыдысты ифтонггæрзтæ. Ацы аппаратон-программон комплекс схуыдтой «Ӕдас горæт» æмæ йæ программæйы фидаргонд сты йæ арæзтады æртæ этапы. Азы кæронмæ æвæрд хъуамæ æрцæуой æмæ сæ стæй баиу кæной иумæйаг центрмæ. «Ӕдас горæт»-ы проекты техникон ифтонгады монтажон куыстытæ æххæст кæны «Юг-Телеком».

РЕСПУБЛИКÆЙЫ ФÆНДÆГТЫЛ РАЙДЫДТОЙ КАМЕРÆТÆ ÆВÆРЫН

Ног азæй фæстæмæ та æрæвналдзысты ацы проекты æртыккаг этапы арæзтадмæ. Бацæттæ кæндзысты æм-бæлон специалистты, кæцытæ арæхсдзысты ацы аппаратурæимæ архайын, æрнывыл кæндзысты фæткхалыны цауты фиксаци æмæ ивары гæххæттыты барвитыны куысты процесс. Æдде бакæсгæйæ афтæ зыны, ома дзы бирæ ницыуал хъæуы саразын, фæлæ дзы нырма лыстæг куыстытæ бакæнинаг бирæ ис. Зæгъæм, камерæтæ кæм æвæрд хъуамæ уой, уым фæндаджы уæлæ урс хæххытæ тынг хорз хъуамæ зыной, кæннод камерæйæн йæ бон нæ уыдзæн фæткхалæн цау сбæлвырд кæнын. Хъуамæ йæ ма хъыгдарой бæлæсты къалиутæ дæр. Æрбæстон кæнын ма хъæуы нæ республикæйы машинæты хицæутты номхыгъдтæ æмæ æвдисæйнæгтæ дæр, цæмæй ивары гæххæт постхæссæг æнæкъуылымпыйæ хæццæ кæна йæ хицаумæ.

Ӕдæппæт уал азы кæронмæ æвæрд æрцæудзæнис 86 камерæйы. Милицийы фæндагон змæлды æдасдзинады управленийы сæргълæууæг Джиоты Алан куыд зæгъы, афтæмæй ацы къахдзæф хорзæрдæм хъуамæ бандава шофырты æмбæлон фæткыл скъæрыны хъуыддагыл æмæ хъуамæ фæкъаддæр уой фæндагон фæткойтæ фехалыны нымæц æмæ аваритæ дæр.

«Ӕппæт фæткхалæн цауты информаци æмбырд кæн-дзысты иумæйаг центры, цыран бæстонгонд цæудзæнис, æмæ-иу дарддæр та автотранспорты хицаумæ арвитдзысты фыстæг, кæцыйыл бæлвырдæй фыст уыдзæн фæткхалæн цауы факт, кæм æрцыдис, цы рæстæджы æмæ ивары аргъ. Кæд фæткхалæг йæ ивар рæстæгыл ма бафида, уæд хъуыддаг æрвыст æрцæудзæнис Юстицийы министрадмæ æмæ дарддæр тæрхондоны приставтæ семæ кусдзысты», – банысан кодта Джиоты Алан.

Камерæтæ фиксаци кæндзысты æппæт фæткхалæн цаутæ дæр, фæлæ дзы уæлдай хъусдард здæхт цæудзæнис ахæмтæм, куыд светофоры сырх рухсыл ахизын, стыр тагъдадæй цæуын, фæндаджы нысæнттæм ма кæсын, дæ ныхмæ цæуæг машинæйы фæндагмæ рахизын, иу фæндагæй иннæмæ азилыны цаутæм. Уымæ гæсгæ Фæндагон змæлды æдасдзинады управлени сиды шофыртæм, цæмæй ма халой фæндагон змæлды фæткойтæ æмæ сæхи бахизой фыдбылызтæй.

Камерæтæ сæвæрын ма стыр ахъаз фæуыдзæнис алыгъуызон фыдракæндтæ раргом кæнынæн. Ныридæгæн дæр бирæ магазинтыл æмæ æндæр бæстыхæйттыл æвæрд ис хуымæтæджы камерæтæ æмæ уыдоны фæрцы дæр барадхъахъхъæнæг органты кусджытæ сбæлвырд кæнынц фыдгæнджыты æмæ фæткхалджыты. «Ӕдас горæт»-ы проекты фæлгæтты цы камерæтæ хъуамæ æрцæуой æвæрд, уыдон, кæй зæгъын æй хъæуы, фаг не сты, фæлæ та, æвæццæгæн, дарддæр дæр фылдæр кæндзæнис сæ нымæц. Дуджы домæнтæ ахæмтæ сты.

              ДЖИОТЫ Алыксандр

Comments are closed, but trackbacks and pingbacks are open.