24 æмæ 25-æм ноябры РХИ-йы Культурæйы министрады цур Адæмон сфæлдыстады республикон центры хъæппæрисæй рæзгæ фæлтæры монон-хæрзæгъдаудзинады программæйы фæдыл театры къуырийы фæлгæтты Профцæдисты бæстыхайы залы уагъд æрцыд III-æм республикон фестиваль-конкурс «Æгас дуне – театр», зæгъгæ. Конкурсы  нысан уыдис хæдархайгæ театралон аивад рæзын кæнын, сфæлдыстадон фæлтæрддзинад кæрæдзийæн амонынæн уавæртæ аразын, курдиæттæ сбæрæг кæнын.

Уый размæ  та ацы центры хъæппæрисæй  киноконцертон зал «Чермен»-ы уагъд æрцыдысты дыууæ фестивалы – «Бинонтæ – курдиæтты стъалыбардз» æмæ ирон адæмон зарды æххæстгæнджыты 1-æм республикон фестиваль-конкурс «Айзæлд», афтæ ма фотоконкурс – «Хуссар Ирыстон-2019» æмæ æндæр мадзæлттæ.

Фестиваль-конкурс «Æгас дуне – театр»-ы организатортæ сæ тыхтыл нæ бацауæрстой æмæ мадзалы хорз сорганизаци кодтой. Сценæйыл цыдысты карз ерыстæ хуыздæр спектакль равдисынæй. Конкурсы номинацитæ уыдысты – «Хуыздæр спектакль», «Хуыздæр режиссерон куыст» æмæ «Хуыздæр актерон куыст». Залы хъуыстысты ирон музыкæйы æхцон зæлтæ. Сценæмæ рахызтысты мадзаламонджытæ – Центры кусджытæ Къæбысты Заринæ æмæ Санахъоты Жаннæ. Уыдон арфæ ракодтой æрæмбырдуæвджытæн,  конкурсанттæн сæ бафæндыд сфæлдыстадон æн-тыстытæ æмæ æрæмбырдуæвджыты базонгæ кодтой фестиваль-конкурсы жюрийы уæнг-тимæ: Гуыцмæзты Эльзæ, Адæмон сфæлдыстады республикон центры директор, РХИ-йы культурæйы сгуыхт архайæг, театрзонæг (жюрийы сæрдар), Дзеранты Джульеттæ – РХИ-йы Культурæйы сгуыхт кусæг, Культурæйы министры хæдивæг, Гуыцмæзты Георги – РХИ-йы адæмон артист, вокалон-хорон жанры фæдыл республикон сфæлдыстадон центры методист. «Зынаргъ сценæмæкæсджытæ, фæнды нæ, цæмæй уæ хъусдард аздахат, сценæйыл цы баннер ис, уымæ. Уым нывгонд ис, Цæгат Ирыстоны Куырттаты комы Дзывгъисы хъæумæ æввахс районы цы мæсыг ис, уый. Уым рагæй фæстæмæ уагъд цыдысты театралон равдыстытæ æмæ фестивалы эпиграф та уыд ирон театры бындурæвæрджытæй сæ иу Бры-тъиаты Елбыздыхъойы иуактон пьесæ «Маймули -рухсаг, æгас цæуæд ирон театр!». Пьесæ мыхуыр æрцыд 1912 азы журнал «Хуры тын»-ы фыццаг номыры, кæцы Брытъиаты Елбыздыхъо уагъта Санкт-Петербурджы æмæ йæ уайтагъддæр ирон культурæ æмæ аивады зынгæ архайджытæ банымадтой ирон театралон æмæ драмон аивады манифестыл», – дзырдта мадзаламонæг. Дарддæр сфæлдыстадон центры директор Гуыцмæзты Эльзæ цыбыртæй радзырдта сæ бакæнгæ куысты тыххæй.

Фестиваль-конкурс «Весь мир – театр»-ы хайад райстой 5 хæдархайгæ театралон коллективы. Конкурсы хайадисджытæй алкæмæндæр уыд хорз зæрдæйы равг, алчи дæр сæ тырныдта йæ номыр тынг хорз сæххæст кæнынмæ. Сценæйыл фыццаг сæ арæхстдзинад равдыстой нæ горæты 9-æм астæуккаг скъолайы коллектив Битеты Миленæйы къухдариуæгадæй. Уыдон æрæмбырдуæвджыты размæ рахастой инсценировкæ «Сидзæртæ». Ахуырдзаутæ афтæ хорз ахъазыдысты сидзæр сабиты ролы æмæ сæ тæригъæдмæ кæсгæйæ, æрæмбырдуæвджытæй бирæты цæсгæмттыл æруадысты цæссыгтæ. Тынг актуалон темæ уыд, уæлдайдæр та – мады дунеон боны.

Уый фæстæ та сæ арæхстдзинад равдыстой Знауыры астæуккаг скъолайы ахуырдзаутæ сæ аивадон къухдариуæггæнæг Тедеты Нонайы сæргълæудæй. Ацы аз зынгæ революционер Айдарты Знауыры райгуырды юбилейон азы æмæ районæн та Знауыры ном радтыны боныл 90 азы кæй сæххæст, уый сæраппонд уыдон равдыстой  скъуыддзаг Саулохты Мухтары пьесæ «Знауыр»-æй. Знауыры роль сæххæст кодта Джиоты Радион. Коллектив ирдæй равдыста уыцы уæззау дуджы цард.

Банысан кæнын хъæуы уый дæр, æмæ ацы аз фестиваль уагъд кæй цæуы ног форматы, ома жюрийы скондмæ фæхуыдтой хæдархайгæ театралон коллективты минæвæрттæй фæйнæ дыууæ адæймаджы æмæ уыдон дæр аргъ кодтой  спектаклтæн, загътой-иу сæ хъуыдытæ сценкæты фæдыл. Хъæлæсæппæрсты фæстиуæгæн «Приз зрительских симпатий» фæцис 9-æм астæуккаг скъолайы.

Дыккаг бон – 25 ноябры та сæ арæхстдзинад равдыстой Дзауы районы Кировы æмæ Хуыцъейы хъæуты æмæ Цхинвалы районы Дменисы хъæуы театралон коллективтæ. Фыццаг уал сценæмæ рахызтысты Кировы хъæуы коллектив сæ аивадон къухдариуæггæнæг, РХИ-йы Культурæйы  сгуыхт кусæг Танделаты Луизæйы сæргълæудæй. Уыдон равдыстой Санахъоты Георгийы фыст пьесæ «Гацыры хабæрттæ». Спектаклы райдианы фæссценæйæ райхъуыстысты ирон музыкæйы æхцон зæлтæ æмæ зарæг, кæцыйы азарыд Джиоты Къоста. Гацыры роль дæр æххæст кодта  ацы курдиатджын æвзонг лæппу. Хуыцъейы хъæуы театралон коллектив та РХИ-йы Культурæйы сгуыхт кусæг Гæззаты Фатимæйы сæргълæудæй равдыста скъуыддзаг Хетæгкаты Къостайы «Фатимæ»-йæ. Фатимæйы роль сæххæст кодта Козаты Анастасия æмæ Наибы роль та – Тедеты Игорь. Спектаклы размæ коллективы уæнгтæ Гаглойты Владислав æмæ Козаты Наташæ тынг хорз сæххæст кодтой Къостайыл фыст зарæг, фæндырыл сын цагъта Хуыгаты Вячеслав.

Уый фæстæ сценæмæ рахызтысты Цхинвалы районы Дменисы хъæуы хæдархайгæ театралон коллектив сæ аивадон къухдариуæггæнæг, РХИ-йы Культурæйы сгуыхт кусæг Икъаты Анусийы сæргълæудæй. Уыдон равдыстой инсценировкæ Къостайы «Сидзæргæс»-æй. Сидзæрты мады роль хорз ахъазыд Джиголаты Моникæ, фæстæ нæ фæлæууыдысты сидзæрты ролтæ æххæстгæнджытæ дæр.

Конкурсы хайадисджыты алкæцы ралæуды фæстæ дæр жюрийы профессионалон æмæ æнæпрофессионалон уæнгтæ кæй дзырдтой сæ хъуыдытæ спектаклты тыххæй.

Фестиваль-конкурсы кæрон центры директор Гуыцмæзты Эльзæ банысан кодта, зæгъгæ, хæдархайгæ драмон кружокты хайадисджытæ сæхи бацæттæ кодтой хорз, азæй азмæ хуыздæр кæй кæны сывæллæтты арæхстдзинад.

Сценæмæ фæхуыдтой хæдархайгæ театралон коллективты аивадон къухдариуæггæн-джыты. Уыдон иууылдæр хорзæхджын æрцыдысты Кады грамотæтæ, дипломтæ æмæ зæрдылдарæн лæвæрттæй. Жюрийы уынаффæмæ гæсгæ «Приз зрительских симпатий» лæвæрд æрцыд Хуыцъейы хъæуы театралон коллективæн. Хуыздæр актерон куысты номиниацийы 1-аг бынат бацахста Джиоты Къоста, 2-аг бынæттæ та бацахстой Хуыцъейы хъæуы минæвæрттæ Козаты Анастасия æмæ Тедеты Игорь. Ацы номинацийы 3-аг бынæттæ та бацахстой Дменисы хъæуы æмæ Знауыры минæвæрттæ Джиголаты Моникæ æмæ Джиоты Радион. Хуыздæр спектаклы номиниацийы 1-аг бынат бацахста Хуыцъейы хъæуы коллектив, 2-аг бынат та – Дменисы хъæуы коллектив. Хуыздæр режиссурæйы куысты номинацийы 1-аг бынат бацахста нæ горæты 9-æм астæуккаг скъолайы коллектив æмæ 2-аг бынат та – Дменисы хъæуы хæдархайгæ театралон коллектив. Уæлахиздзаутæн лæвæрд æрцыд фæйнæ 5 мин сомы, дыккаг бынæтты хицæуттæн – фæйнæ 3 мин сомы æмæ æртыккаг бынæттæ чи бацахста, уыдонæн та – 2 мин сомы.

Жюрийы уæнгтæ уæлдай бузныджы ныхæстæ загътой  Кировы æмæ Дменисы хъæууон клубты сæргълæуджытæ Танделаты Луизæ æмæ Икъаты Анусийæн, кусынæн сын уавæртæ кæй нæй, уымæ нæ кæсгæйæ, сæхи алыхатт дæр хорз кæй бацæттæ кæнынц, уый тыххæй. Хорз уаид, Дзауы æмæ Цхинвалы районты администрациты сæргълæуджытæ куы бацархаиккой æмæ ацы куыстуарзаг сылгоймæгтæн сæ куысты уавæртæ иу чысыл  уæддæр куы фæхуыздæр кæниккой, уæд сын уаид ноджы хуыздæр æнтыстытæ.

Бузныджы ныхæстæ зæгъын хъæуы Адæмон сфæлдыстады республикон центры кусджытæн сæ директор Гуыцмæзты Эльзæйы сæргълæудæй. Уымæн æмæ фæд-фæдыл ахæм мадзæлттæ ауадзын æнцон куыст нæу.

Джиоты Екатерина

Comments are closed, but trackbacks and pingbacks are open.