1941-1945 азты Стыр Фыдыбæстæйон хæсты Советон адæмы Уæлахизы 75 азы юбилейон бæрæгбоны мысæн мадзæлттæ уагъд цæудзысты нæ бæстæйы территорийыл. Стыр Уæлахизы 75 азы сты, уал азы йæхи нывондæн чи ‘рхаста, уыдон лæгдзинады, сæрыстырдзинады, удуæлдайдзинад æмæ хъæбатыр адæмы æгæрон сгуыхтдзинæдты мысæн азтæ.
Ныртæккæ кæд карантины уавæрты ис республикæ, уæддæр бæстæйы къухдариуæгад æмæ ацы ахсджиаг бæрæгбон нысан кæнын комкоммæ цы организацитæ æмæ уагдæттæм хауы, уыдон уæхскуæзæй архайынц йæ бацæттæ æмæ банысан кæныныл. Ууыл хæст сты республикæйы Ветеранты совет дæр.
Ветеранты совет кæны æвæлмæцгæ архайд
Ветеранты советы сæрдар Бесаты Вячеслав нын куыд радзырдта, уымæ гæсгæ æрвыл аз дæр Уæлахизы боны агъоммæ организаци сног кæны ветеранты номхыгъдтæ. Ацы аз Стыр Фыдыбæстæйон хæсты Уæлахизы боныл сæмбæлдзысты хæсты 13 хайадисæг ветераны. Уымæй дарддæр Ветеранты советы регистраци сты 1500 ветеранæй фылдæр. Уыдон сты фæсчъылдымы фæллойгæнджытæ, Фыдыбæстæйон хæсты ветеранты идæдзтæ, фæллойы ветерантæ, инвалидтæ æмæ æндæр категориты ветерантæ.
Ныртæккæ Ветеранты совет уæхскуæзæй сæхи цæттæ кæнынц Стыр Уæлахизы 75 азы юбилейон бонмæ. Организацийы кусджытæ ногæй бакуыстой Фыдыбæстæйон хæсты ветерантæ æмæ фæсчъылдымы фæллойгæнджыты номхыгъдтæ сног кæныныл.
Куыд зонæм, афтæмæй нæ республикæйы территорийыл 1941-1945 азты хæсты ветерантæн æмæ фæсчъылдымы фæллойгæнджытæн нæ бæстæйы сæргълæууæджы Барамындмæ гæсгæ фыст цæудзысты æхцайы фæрæзтæ.
«Республикæ Хуссар Ирыстоны Президенты Администрацийы бахæсмæ гæсгæ нæ организаци бавдыста ветеранты номхыгъдтæ, уыдонмæ гæсгæ хицæн æрцæудзысты æхцайы фæрæзтæ майы мæйы. Стыр Фыдыбæстæйон хæсты хайадисæг ветерантæн уыцы фæрæзтæ уыдзысты Уæлахизы юбилейы азты бæрц – 75 мин сомы æмæ фæсчъылдымы фæллойгæнджытæн та – 50 мин сомы», – банысан кодта Вячеслав.
Ветеранты совет æхсæнадон организаци кæй у, уымæ гæсгæ йын æмбæлон фадæттæ нæй, цæмæй æмбæлон хъусдард здæхт цæуа ветерантæм. Фæлæ, уымæ нæ кæсгæйæ, райгонд сты Хуссар Ирыстоны Президенты Администрацийæ, Хуссар Ирыстоны Уæрæсейы Федералон Æдасдзинады службæйы Арæнгæрон управленийæ æмæ Уæрæсейы Хъахъхъæнынады министрады 4-æм гвардион базæйæ, Юстицийы министрады Тæрхондонон приставты службæйæ, Хуссар Ирыстоны Уæрæсейы минæварадæй æмæ æндæр уагдæттæ æмæ æхсæнадон организацитæй. Фæлæ уæддæр, Ветеранты советы сæрдары ныхæстæм гæсгæ сæйраг æмæ нысанмæздæхт æххуыс организацийæн кæны бæстæйы сæргълæууæг.
Уæлдæр ранымадгонд уагдæттæ æмæ организацитæ æрвыл аз дæр Уæлахизы бæ-рæгбоны цытæн организаци кæнынц бæрæгбонон мадзæлттæ, æххуыс кæнынц хæлцадон продукттæй, ветерантæн бакæнынц зæрдылдарæн лæвæрттæ.
Хорзæхтæ – ветерантæн
«Æрвыл аз дæр нæ Республикæйы ветерантæ рох не сты Уæрæсейы къухдариуæгадæй дæр. Фыдыбæстæйон хæсты ветерантæ æмæ фæсчъылдымы фæллойгæнджыты номыл æрвыл аз Уæрæсейы Федерацийы Президент Владимир Путины номыл æрцæуы арфæйы фыстæджытæ. Ацы аз ма уыдон, Уæрæсейы Федерацийы къухдариуæгады номæй арфæйы фыстæджытæй дарддæр РХИ-йы Уæрæсейы минæварады кусджытæ схорзæхджын кодтой Стыр Уæлахизыл 75 азы сæххæсты цытæн юбилейон майдантæй», – зæгъы Ветеранты советы сæрдар.
Иумиагæй сисгæйæ, тохы быдыры сæрибардзинады сæрыл чи хæцыд æмæ бонæй- бонмæ уæлахизмæ чи тырныдта, абон уыцы ветеранты æрмæст Уæлахизы боны нæ хъуыды кæнæм. Ветеранты советы къухдариуæгады лæмбынæг хъусдарды бын сты ветерантæм ахасты фæдыл сæвзæргæ проблемæтæ.
Президентимæ æмархайды руаджы ветеранты бинонтæн æххуыс цæуы цæрæнуат цалцæг æмæ сæндидзын кæнын, хæдзæртты æмбæрзтытæ раивын, æмæ фадæттæм гæсгæ æндæр ахсджиаг проблемæтæ бæстон цæуынц.
«Стыр Фыдыбæстæйон хæсты ветеран Гатыгкоты Захарæн арæзт æрцыд ног хæдзар, æндидзыд æрцыд Цоциты Амираны хæдзар… сылгоймаг ветеран Æлборты Евгенийæн йæ сæдæ азы юбилейы цытæн сæрмагондæй арфæ ракодта Президент Бибылты Анатоли», – дзырдта Вячеслав.
Сæйраг у æнæниздзинад
Фыдыбæстæйон хæсты ветерантæн ныртæккæ сæйраг у се ‘нæниздзинад, уымæ гæсгæ сæ æрвитын фæхъæуы улæфынмæ, цыран вæййынц дохтырты хъусдарды бын. Уый тыххæй организаци хæсджын у æмæ хъусын кæна къухдариуæгадæн, цæмæй рæстæгыл бæстон æмæ скъуыддзаг цæуой сæ проблемæтæ. Бесайы фырты ныхæстæм гæсгæ ивгъуыд аз санаторитæ æмæ курорттæм се ‘нæниздзинад æмбæлон уагмæ æркæныны нысанæн æрвыст æрцыд 35 ветераны.
Нæ республикæйы Æнæниздзинад хъахъхъæныны министрады скъуыддзаг кæнынц, йе ‘нæниздзинад кæмæн куыд цудыд у, уымæ гæсгæ йæ кæцы хосгæнæндонмæ хъæуы æрвитын, уый. Ветерантæ æнæаргъ балцæгтæ райсынц Нагутнийы донæй хосгæнæндон «Ныфс»-мæ, арæхдæр «Тамиск»-мæ æмæ Цæгат Ирыстоны æндæр санаторитæм. Уыцы хъуыддаг адарддæр уыдзæн ацы аз дæр æмæ ветерантæй бирæтæ баулæфдзысты бæрæг бынæтты.
Ветеранты советы сæрдар ма нын куыд радзырдта, уымæ гæсгæ ныртæккæйы рæс-тæджы ветерантæй бирæтæ се ‘нæниздзи-нады уавæрмæ гæсгæ нал хизынц хæдза-рæй. Уымæ гæсгæ Уæлахизы бон немæ Театралон фæзуаты нысан кæнынмæ рацæудзысты æрмæстдæр æртæ ветераны.
Уымæй дарддæр ма ацы Ветеранты Со-вет активон хайад исы бæрæгбонон ма-дзæлттæ организаци кæныны, æнгом æмархайд кæны «Æнæмæлгæ полчы» штабимæ, æндæр организацитæ æмæ паддзахадон уагдæттимæ.
Арфæтæ
Уавæрæй пайдагæнгæйæ, Республикæ-йы Ветеранты советы сæрдар Бесаты Вя-чеслав дæр æрбаиу, ацы бонты нæ кадджын ветерантæ цы бирæ зæрдиаг арфæтæ ис-дзысты, уыдонмæ. Уадз, зæгъгæ, ноджыдæр юбилейтæ уæнгрогæй, райзæрдæйæ нысан кæнæд, хæсты хайадисджытæ дæр æмæ уыцы уæззау рæстæджы фæсчъылдым йæ-хиуыл чи нæ ауæрста, æмæ Стыр Уæлахиз-мæ йæ æгæрон хайбавæрд чи хаста, æппæт уыдон дæр.
Стыр Фыдыбæстæйон хæсты хайадисæг хæстонты номыл нæ республикæйы территорийыл цы цыртытæ, мемориалон фæйнæ-джытæ æмæ æндæр ахæмтæ ис, уыдон цы административон территоритыл сты, уым ар-хайынц, сæ номы кадæн ацы стыр юбилеон бонмæ уыдон æмбæлон уагмæ æркæныныл.
Ацы бон махæн у нæ буц ветеранты мысынады, сæрыстырдзинады, нæ фыдæлты кады, сæ хъæбатыр архайдтыты æмæ Фыдыбæстæмæ сæ уарзондзинады бон. Уымæ гæсгæ мах хæсджын стæм, цæмæй уыцы фæрнджын хъуыддаг сæрыстырæй фæлтæрæй фæлтæрмæ хæссæм.
КЪÆБУЛТЫ Маринæ
Comments are closed, but trackbacks and pingbacks are open.