Ӕрвылбон дӕр Хуссар Ирыстоны Ӕмбӕстӕгты хӕрзиуӕгад ӕмӕ фӕлхасгӕнджыты бартӕ хъахъхъӕныны фадыгмӕ хъусдард здахыны фӕдыл комитет аразы иртасӕнтӕ коронавирусы иуӕг рабӕрӕг кӕныны тыххӕй. Инфекцион низӕй рынчынты нымӕц ӕрвылбон ивы – куы фылдӕр вӕййынц, куы – къаддӕр. Фӕлӕ бӕрӕг у иу хъуыддаг – нырма ис йӕ тыхы ӕмӕ нӕ лӕмӕгъ кӕны.

Бӕстӕйы Сӕйраг санитарон дохтыр Коцты Маринӕ знон куыд фехъусын кодта, уымӕ гӕсгӕ иу суткӕйы дӕргъы рабӕрæг 44 коронавирусӕй рынчынты нымӕц.

Уагъд ӕрцыд 187 иртасӕн куысты, кӕцыты фӕстиуӕгӕн рабӕрӕг уал рынчыны. Иумӕйагӕй сисгӕйӕ, ме­дицинон уагдӕтты ӕмӕ хӕдзарон хиизоляцийы сты 1181 рынчыны. Уыдонӕй медицинон хосгӕнӕн уагдӕтты хос цӕуы 231 адӕймагӕн.

Ацы низ уӕлдай тӕссаг у зӕрдӕ, рӕуджытӕ ӕмӕ иннӕ улӕфӕн органтӕ рынчын кӕмӕн сты, ахӕм адӕймӕгтӕн. Нӕ ауӕрды, йе ‘нӕниздзинад лӕмӕгъ кӕмӕн у, ахӕм- тыл. Хъыгагӕн, хынцыд цӕуы ацы низы фӕстиуӕгӕн амӕлӕты цаутӕ. Зноны бонмӕ уыдоны нымӕц у 21.

Сентябры ӕмбисӕй нымайгӕйӕ, инфекцион низӕй рынчынты иумӕйаг нымӕц у 1405, уыдонӕй сӕнӕниз 224 æмбæстаджы.

Медициной центры уагдӕтты уагъд цӕуынц туаггуыры хызӕгтӕ

Коронавирусон инфекцийы рапарахатӕй хъуагдзинад ӕнкъардӕуыд ацы рынчынтӕн ӕнӕмӕнгхъӕуӕг туаггуырӕй. Ныртӕккӕ ӕрӕвнӕлдӕуыд Хуссар Ирыстоны Бирӕпрофилон медициной центры палатӕтӕм туаггуыры хызӕгтӕ уадзыныл. Республикӕйы Ӕнӕниздзинад хъахъхъӕныны министрады пресс-службӕйӕ куыд хъусын кӕнынц, уымӕ гӕсгӕ ныридӕгӕн уыцы куыстытӕ цӕуынц медицинон центры инфекцион хайады. Ӕмӕ ацы хайад иу ӕрцӕудзӕн туаггуырӕй ифтонгады централон системӕмӕ. Ахӕм ӕнгӕс куыстытӕ ма специалисттӕ бакӕндзысты республикон сывӕллӕтты рынчындоны дӕр. Уымӕй бирӕ фӕрогдӕр уыдзӕн медицинон центры туаггуырӕй ифтонг кӕныны хъуыддаг, уымӕн ӕмӕ ныронг уыцы уӕззау баллонтӕ палатӕтӕм хӕссын хъуыд къухӕй.

Банысан кӕнын хъӕуы уый, ӕмӕ ацы ахсджиаг ӕмӕ ӕнӕмӕнгхъӕуӕг куыстытӕ конд цӕуынц, Хуссар Ирыстоны Президенты цур Хъусдарӕн совет цы ӕхцайы фӕрӕзтӕ рахицӕн кодта, уый фӕлгӕтты.

Низы ныхмæ тох кæнынц уæрæсейаг æфсæддон медиктæ дæр

Нæ горæты стадионы мобилон госпиталы уæрæсейаг æфсæддон медиктæ ныридæгæн баххуыс кодтой дыууæ мин пациенты бæрцæн. Йæ райтынгæй фæстæмæ Уæрæсейы Хъахъхъæнынады министрады бирæпрофилон госпиталы æфсæддон специалистты цæугæ бригадæ нæ горæты медицинон центры исы æмбæстæгты, уадзы сын консультацитæ.

Госпиталы къухдариуæггæнæджы хæдивæг, медицинон службæйы майор Рамазан Муртазалиев куыд фехъусын кодта, уымæ гæсгæ боны дæргъы райсынц 200 адæймаджы бæрц. Уæрæсейаг специалисттæ кусынц Хуссар Ирыстоны бирæпрофилон центры специалисттимæ иумæ. Бынаты, ацы низæй зæрдæхсайгæ æмбæстæгтæн лæвæрд цæуы компьютерон томографи, ПЦР диагностикæ кæнæ æфсæддон госпиталы стационармæ рекомендацитæ.

Йæ ныхæстæм гæсгæ æфсæддон госпиталы квалификациджын медицинон специалистты хъусдарды бын сты 70 адæймагæй фылдæр. Уыдонæн цæуы æмбæлон медицинон æххуыс.

Нæ уацх.

Comments are closed, but trackbacks and pingbacks are open.