Хуссар Ирыстоны Хетæгкаты Къостайы номыл Паддзахадон драмон театры артисттæ ивгъуыд мæйы хайад райстой æртæ æхсæнадæмон фестивалы — Санкт-Петербурджы камерон театрты æмæ спектаклты фестиваль «Art Окраина»-йы, горæт Налцыччы фестиваль «Южная сцена»-йы æмæ горæт Дзæуджыхъæуы национ театрты VIII фестиваль «Сцена без границ»-ы.  Нæ артисттæ æртæ фестивалæй дæр æрæздæхтысты хорзæхтимæ. Хуссар Ирыстоны драмон театры аивадон къухдариуæггæнæг Дзуццаты Тамерлан æмæ театры сгуыхт артисткæ Мæргъиты Ингæ информацион агентад Sputnik-ы пресс-центры журналисттæн бæлвырддæрæй радзырдтой фестивалты сæ æнтыстджын хайадист æмæ тæлмæнты тыххæй.

Хуссарирыстойнаг артисттæ фестивалмæ бацæттæ кодтой Фернандо Аррабалы «Фандо и Лис», Александр Островскийы «Лес» æмæ Гаглойты Владимиры «Тугæйдзаг чындзæхсæв»-йы спектаклтæ. «Санкт-Петербурджы нæ театрæй дарддæр хайад райстой Серби, Узбекистан æмæ Монголæй. Режиссер Ян  Яновскийы сæвæрдмæ гæсгæ æвæрд спектакль «Фандо и Лис» нымад æрцыд «Art Окраина»-йы фестивалы лауреатыл. Артисттæ сæ ролтæ ахъазыдысты иттæг хорз æмæ сæ хорз райстой сценæмæкæсджытæ. Иудзырдæй, спектакль сценæмæкæсджытæй алкæйы зæрдæйы дæр ныууагъта хорз тæлмæнтæ. Нæ театры артисттæ ма хайад райстой Налцыччы уагъдцæуæг фестиваль «Южная сцена»-йы дæр, уым та равдыстам спектакль «Лес».  Хайад райстам æртæ номинацийы  нырыккон уырыссаг классикæйы номинацийы хорзæх лæвæрд æрцыд спектаклы режиссер Цисарук Андрейæн. Фестивалы хуыздæр сылгоймаджы роль сæххæст кæныны тыххæй хорзæх та адих кодтой нæ артисткæтæ Мæргъиты Ингæ æмæ Хуссар Ирыстоны сгуыхт артисткæ Гæджиты Ингæ. Фестиваль «Сцена без границ»-ы хуссарирыстойнаг артисттæ райстой дыууæ хорзæхы. Артисттæй цалдæрæн-лæвæрд æрцыд Цæгат Ирыстон-Аланийы сгуыхт артисты кадджын нæмттæ»,- банысан кодта Дзуццаты Тамерлан.

Театры куыстыл дзургæйæ, Тамерлан банысан кодта, зæгъгæ, театр иуран лæугæйæ, размæ никуы ацæудзæн. «Театр хъуамæ арæх цæуа гастролты, хайад иса алыгъуызон фестивалты, æвдиса йæ спектаклтæ æмæ зынгæ артисты дæсныдзинад, цæмæй театралон дунейы нæхи æвдисæм»,- банысан кодта уый.

Йæ ныхæстæм гæсгæ Хуссар Ирыстон фæнд кæны йæхи æхсæнадæмон театралон фестиваль ауадзын дæр, фæлæ банхъæлмæ кæсын хъæуы æрмæст ног театры бæстыхайы арæзтад фæуынмæ нæ, фæлæ ма уазæгдоны арæзтады фæудмæ дæр. «Фестивалæн йæ ном хуындзæн «Кавказский дом». Фидæн аз махмæ æнхъæлмæ кæсынц радон гастролтæ æмæ æхсæнадæмон фестивалтæ. Ног театр мах бакæндзыстæм Хетæгкаты Къостайы «Фатимæ»-йæ. Мах фæнды, цæмæй йæ ахæссæм æмæ йæ равдисæм республикæйæн æддейæ дæр»,- загъта уый.

РХИ-йы Паддзахадон драмон театры артисткæ  Мæргъиты Ингæ банысан кодта, зæгъгæ, ахæм егъау фестивалты хайад райста фыццаг хатт. Хуссарирыстойнаг театры сценæйыл спектакль «Лес»-ы йæ роль у фыццаг куыст.  «Мах фæндыд  æрмæст нæ спектаклтæ равдисын нæ, фæлæ ма æндæр спектаклтæм бакæсын дæр. Фæлæ нын, хъыгагæн, уый фадат нæ уыд. Горæт Налцыччы фестиваль раст организацигонд нæ уыд. Мах æрцыдыстæм, нæ спектакль равдыстам æмæ фæстæмæ раздæхтыстæм. Мæ хъуыдымæ гæсгæ та фестивалты нысан у, кæрæдзийæн нæ фæлтæрддзинад амонын. Мæн ныфс ис æмæ фидæны Хуссар Ирыстоны уагъдцæуæг фестивалтæ кæй уыдзысты бæрзонд æмвæзадыл”, — загъта Мæргъиты Ингæ.

Дзуццаты Тамерлан банысан кодта, зæгъгæ, цахæмфæнды фестиваль дæр вæййы нысаниуæгджын. Йæ ныхæстæм гæсгæ фæсарæйнаг сценæмæкæсджыты зæрдæмæ тынг цæуынц нæ ирон национ спектаклтæ. Уый бæрæг уыд 2004 азы фестиваль «Радуга»-йы хайадисты рæстæджы дæр. «Уым мах равдыстам спектакль «Амыран». Мах се ‘ппæты дæр дисы баппæрстам нæ хорз хъазтæй. Нæ спектакль стыр тæлмæнтæ ныууагъта критиктыл”, — загъта театры аивадон къухдариуæггæнæг.

Уый ма фехъусын кодта 2019 азы Мæскуыйы Щепины номыл ахуыргæнæндон Хуссар Ирыстонæй ногæй кæй райсдзæн студентты, кæцыты царды æмæ ахуыры  уавæртыл развæлгъау батыхсдзæн нæ республикæйы къухдариуæгад. Йæ ныхæстæм гæсгæ, стыр хъыгагæн, æвзонг фæсивæдмæ нæй ахæм фæндон, цæмæй сахуыр кæной критик кæнæ драматургы фæдыл. Уый журналисттæм бахатыд, цæмæй арæхдæр фыссой æмæ дзурой бынæттон артистты тыххæй. Мæргъиты Ингæ дæр банысан кодта, зæгъгæ, йын нæ фаг кæны профессионалон критикæ. Уый, зæгъгæ, стыр ахъаз у артисты куысты рæзтæн.  «Тынг зын у иу паддзахады фæл-гæтты рæзын. Зæгъæм, Кæсæг-Балхъары ис цыппар театры, Цæгат Ирыстоны —  аст, Дагъыстаны — цыппæрдæс æмæ Хуссар Ирыстоны та — иунæг театр. Мах тынг уарзæм куы нæ феппæлынц, фæлæ нын хатт нæ фæфаг кæны хорз, профессионалон критикæ, кæцы спектаклы равзара лæмбынæг. Цæмæй махæн дæр фадат уа фиппаинæгтыл ахуыр кæнынæн»,- загъта Мæргъиты чызг.

Кокайты Зæринæ

Comments are closed, but trackbacks and pingbacks are open.